«بۇدان بۇرىن مالىمدەگەنىمىزدەي, ەلىمىزدە كوروناۆيرۋس تىركەلگەن جاعدايدا ۇكىمەت جانىنداعى ۆەدومستۆوارالىق كوميسسيا ءتيىستى ءىس-شارالار جوسپارىن بەكىتكەن ەدى. «ب» جوسپارى بۇگىن كۇشىنە ەندى. ءبىرىنشى پاتسيەنت 9 ناۋرىزدا, ەكىنشىسى 12 ناۋرىزدا كەلگەن. ولاردىڭ كىم ەكەنىن جاريالاي المايمىز. ءبىر ەر ادام مەن ءبىر ايەل. ەكەۋى دە قازاقستانعا ۇشاقپەن كەلگەن. بورتتا كوروناۆيرۋستى جۇقتىرعاندارمەن بىرگە بولعانداردىڭ ءبارى دە كارانتينگە جاتقىزىلادى. ياعني, 9 ناۋرىزدا بىرگە ۇشقان 73 ادامنىڭ كىم ەكەنى انىقتالدى. ولار باقىلاۋدا. قايدا ەكەنىن بىلەمىز. كارانتينگە جاتقىزۋ شارالارىنا كىرىستىك. ولار اۋرۋ ادامدار ەمەس», - دەدى ە. ءبىرتانوۆ.
سونداي-اق مينيستر بورتتا ەكى قازاقستاندىقپەن ۇشىپ كەلگەن جولاۋشىلاردىڭ ءتىزىمى بار ەكەنىن ايتتى. 12 ناۋرىزدا كەلگەن ۇشاقتاعى 12 ازامات قازىرگى تاڭدا كارانتيندە جاتىر.
ەسكە سالا كەتسەك, بۇعان دەيىن دەنساۋلىق ساقتاۋ ءمينيسترى ەلجان ءبىرتانوۆ قازاقستاننىڭ ەكى ازاماتىنان كوروناۆيرۋس ينفەكتسياسى تابىلعانىن مالىمدەگەن ەدى.
