شاڭىراقتىڭ يەسى مارقۇم انارباي قوجامبەرديەۆ 2005 جىلى قايتىس بولعان. التىن قۇرساقتى انانىڭ ۇلكەن ۇلى جۇمان 62 جاستا بولسا, ءۇيدىڭ كەنجەسى پەريزات 38 جاستا. بۇگىندە ءانجىر اجە كەنجە ۇلى ەرلان مەن كەلىنى سارسەنكۇلدىڭ قولىندا, بەس نەمەرەنىڭ قىلىعى مەن ەركەلىگىن قىزىقتاپ, ءتالىم-تاربيەسىنە ءوز ۇلەسىن قوسۋدا. جۋىردا «اۋىل» پارتياسىنىڭ وكىلدەرى كوپ بالالى انانىڭ شاڭىراعىندا قوناقتا بولدى.
«اۋىل» حالىقتىق-دەموكراتيالىق پاتريوتتىق پارتياسىنىڭ توراعاسى ءالي بەكتاەۆتىڭ قۇتتىقتاۋىن جەتكىزگەن تۇركىستان وبلىستىق فيليالىنىڭ توراعاسى نۇرجان اجىمەتوۆ ءانجىر اجەگە ورامال جاۋىپ, ءبىر قۇشاق راۋشان گ ۇلى مەن ارنايى سىيلىعىن تابىس ەتتى. ء«بىز جاستارعا التىن قۇرساقتى, دۇنيەگە كوپ بالا اكەلگەن اسىل انالارىمىزدى كوبىرەك ناسيحاتتاۋىمىز كەرەك. مەنىڭ ومىردەن ءبىر تۇيگەنىم, وسىنداي كوپ بالالى وتباسىدان شىققان بالالار باۋىرمال, ءبىر-بىرىنە جاناشىر, مەيىرىمدى بولىپ كەلەدى. قازىر جاستار ءبىر-ەكى بالامەن شەكتەلگەندى ءجون كورەدى, مەنىڭشە ونداي بالالار ءوزىمشىل بولىپ وسەدى. سوندىقتان ءبىر-ەكى بالامەن توقتاماي, كوپ بالالى بولعان جاقسى دەپ ويلايمىن», دەيدى نۇرجان اجىمەتوۆ.
ءوزىن ارنايى ىزدەپ كەلىپ, قۇرمەت كورسەتكەن پارتيا وكىلدەرىنە العىسىن بىلدىرگەن قاريا قۋانىشتان كوزىنە جاس الدى. «دەندەرىڭ ساۋ بولسىن, مەنىڭ جاسىما جەتىڭدەر! ءومىر بويى وسى اۋىلدا ەڭبەك ەتىپ, زەينەتكە شىقتىم. قوي دا باقتىق, مارقۇم شالىمىز ەكەۋمىز تەمىر جولدا دا جۇمىس ىستەدىك. بالالارىم, ۇرپاعىم امان بولسىن, وسىلاردىڭ ارقاسىندا امان-ەسەن نەمەرە-شوبەرەلەرىمنىڭ قىزىعىن كورىپ وتىرمىن. سەندەرگە دە جۇعىستى بولسىن, ەلىمىز امان, اسپانىمىز اشىق بولسىن!», دەپ ءانجىر اجە قوناقتارعا اق باتاسىن بەردى.
تۇركىستان وبلىسى
