قالاي دەگەنمەن دە ادامزات تەحنولوگيانى دامىتىپ, بەلگىلى ءبىر جەتىستىكتەرگە دە جەتتى. ەندى وسى تەحنولوگيا كوروناۆيرۋسقا قارسى تۇرۋدا ادامعا قانداي كومەك كورسەتە الىپ جاتىر؟
قىتاي بانكتەرى قاعاز اقشالاردى ارنايى وڭدەۋدەن وتكىزىپ, دەزينفەكتسيا جاساۋ تەحنولوگياسىن اۋقىمدى پايدالانۋدا. سونىمەن قاتار ەلەكتروندى اقشا اينالىمى جونىنەن باسقا ەلدەردەن الدەقايدا العا كەتكەن كورشىمىز تەك ينتەرنەت ارقىلى عانا قارجى وپەراتسيالارىن ىسكە اسىرۋعا كوشكەن. وسىنداي ءادىستى ۆەتنام ەلى قولعا الىپ وتىر. دۇنيەجۇزىلىك دەنساۋلىق ساقتاۋ ۇيىمى ۆيرۋستىڭ قاعاز اقشالاردان جۇعۋ ىقتيمالدىعى از دەگەنمەن دە, وسىنداي ساقتىق شارالارى دۇرىس جۇزەگە اسىرىلۋدا.
كوروناۆيرۋس وشاعى بولىپ وتىرعان قىتاي بلوكچەين-تەحنولوگيانى اۋرۋدىڭ الدىن الۋ ماقساتىندا ءساتتى پايدالانىپ, دارىگەرلىك ونلاين كەڭەس پەن سكرينينگتى وسىلاي جۇرگىزۋدە.
Alipay تولەم جۇيەسى بولسا, قايىرىمدىلىق قورىن باقىلايتىن ارنايى پلاتفورماسى بار ءموبيلدى قولدانبانى ىسكە قوسقان. بۇل پلاتفورما مەملەكەتتىك ورگاندارمەن قويان-قولتىق ەپيدەميا پروفيلاكتيكاسىن جۇرگىزىپ, قاي جەردە قانداي قاجەتتىلىكتەر بار ەكەنىن انىقتايدى, سونداي-اق, ماتەريالدىق جانە قارجىلاي قامتاماسىز ەتەدى.
بلوكچەين نەگىزىندە جۇمىس ىستەيتىن قىتايلىق سيان حۋ باو ونلاين-پلاتفورماسى ساقتاندىرۋ پرينتسيپىندە كومەك كورسەتە الادى. بۇل جۇيەگە تىركەلگەن 100 ملن ادامنىڭ ارقايسىسى تەك 0,01 يۋان عانا جارنا تولەسە, اۋرۋعا شالدىققان ادامعا 100 مىڭ يۋان (14 300 اقش دوللارى) مولشەرىندە ءبىر جولعى قارجىلاي كومەك كورسەتىلەدى. بۇل جەردە بلوكچەين تەحنولوگياسى الاياقتىققا جول بەرمەۋ ءۇشىن قولدانىلادى.
ءدال وسى بلوكچەين دارىگەرلىك قۇجاتتى قاعازدان ەلەكتروندى فورماتقا كوشىرىپ, قۇجات الماسۋدى ءبىر جەڭىلدەتسە, ەكىنشى جاعىنان قاعاز ارقىلى اۋرۋدىڭ جۇعۋىن بولدىرمايدى. ەپيدەميا كەزىندە Blue Cross Insurance ءموبيلدى قولدانباسىن پايدالانىپ جاتقان قىتايلىق دارىگەرلەر كوپ جۇمىستىڭ جەڭىلدەگەنىن ايتادى.
تەحنولوگيا زامانىندا ادام جۇمىسىن جەڭىلدەتەتىن قۇرىلعىنىڭ ءبىرى دروندى دا قىتايلىق ماماندار اۋرۋعا قارسى كۇرەستە قولدانۋدا. تەرموكامەرا ورناتىلعان درون كومەگى ارقىلى ادامدار كوپ جينالعان جەردە ۆيرۋستى انىقتايتىن جاقسى ءتاسىل دە ءوز ناتيجەسىن بەرۋدە. ال ەندى توتەنشە جاعداي ەنگىزىلگەن ەلدى مەكەندەردە درون ازىق-ت ۇلىك نەمەسە ءدارى-دارمەك جەتكىزۋ ءۇشىن تاپتىرماس قۇرالعا اينالعان.
كورشى ەلدەگى ساۋدا نەمەسە ويىن-ساۋىق جاعىنا كەلسەك, ول ەپيدەميا تاراعان ايماقتاردا تولىعىمەن ونلاين فورماتقا وتكەن دەۋگە بولادى. ءبىلىم بەرۋ سالاسى بويىنشا دا وسىنداي جاعدايدى كورەمىز. Twitter سياقتى الپاۋىت كومپانيالار كوروناۆيرۋس تاراعان ەلدەردە تەك ۇيدە وتىرىپ قانا جۇمىس ىستەۋگە شاقىردى.
سونىمەن قاتار جاقىندا عانا قىتايلىق عالىمدار كوروناۆيرۋستى باسقا ادىستەردەن 10 ەسە ءتيىمدى انىقتايتىن تەحنولوگياعا قول جەتكىزگەندەرىن ايتىپ, ءۇمىت وتىن جاقتى. قىتايدىڭ Hai Kang Life Corporation كومپانياسى بۇل تەحنولوگيانى بارلىق مەديتسينا مەكەمەلەرىنە تەگىن تاراتاتىنىن دا مالىمدەدى.
اينالىپ كەلگەندە, "جامان ايتپاي جاقسى جوق" دەمەكشى, ادامزات ءۇشىن كەز كەلگەن قيىن جاعداي ودان شىعۋدىڭ جولىن تاۋىپ, جاڭا تەحنولوگيالاردىڭ دامۋىنا جول اشادى دەۋگە ابدەن نەگىز بار.
