قازاقستان تاريحىنداعى قايتالانباس تۇلعالار جايلى تۋىندىنى 12 ناۋرىزدان باستاپ ەلىمىزدىڭ كينوتەاترلارىنان تاماشالاۋعا بولادى. كارتينانىڭ سيۋجەتىنە قاراساي سونداي-اق, ونىڭ دوسى اعىنتاي مەن تايماس باتىرلاردىڭ ەرلىگى وزەك بولعان.
«قازاق كينوسىندا قازىرگى زاماننىڭ باتىرى جوق. ماسەلەن, قاراساي باتىر تۋعان ەلى مەن جەرى ءۇشىن كۇرەسكەن ناعىز ءباھادۇر. ونىڭ بالالارى سوعىستا شەيىت بولعان. ءوزى 19 جەكپە-جەككە قاتىسىپ, بىرەۋىنەن دە جەڭىلىس كورمەگەن. ول قازاق حالقىنىڭ بىرلىگىن اڭساعان. كينوفيلمدى كورگەن جاستار ءوز اتا-بابالارىنىڭ ەلىمىزدىڭ جارقىن بولاشاعى ءۇشىن قالاي كۇرەسكەنىن كورە الادى», دەيدى كينوكارتينا رەجيسسەرى اسقار ۇزاباەۆ.
ەڭبەك جولىندا العاش رەت تاريحي جانردا تولىقمەتراجدى «باتىرلار» كينوكارتيناسىن تاسپالاعان رەجيسسەر كەشەگى زامانداعى قازاق باتىرلارىنىڭ بارىنە ءبىر عانا ورتاق مۇددە, ورتاق قاسيەت ءتان ەكەنىن ايتادى. ول – وتانىنا, حالقىنا دەگەن شەكسىز سۇيىسپەنشىلىك. كورەرمەن ورتا عاسىرداعى سوعىس پەن قانتوگىسكە تولى زامانا شىندىعىنا كۋا بولادى. وسىنداي قيىن-قىستاۋ زاماندا دۇنيەگە كەلگەن بوزبالانىڭ تاعدىر-تالايى ءبىر عانا جولدى قالدىرعان ەدى. جاستايىنان ەر مىنەزدى قاراسايدى اكەسى باتىرلىق پەن باتىلدىققا باۋلىپ وسىرەدى. قاراپايىم بوزبالا قولباسشى اتاعىنا قالاي جەتتى؟ قازاقتىڭ كەڭ دالاسىن ساقتاپ قالۋ ءۇشىن ول قانداي قادامدارعا باردى؟ وسى سۇراقتاردىڭ جاۋابىن «باتىرلار» كينوتۋىندىسىندا قاراما-قارسى كەيىپكەرلەر ارقىلى ۇلتتىق دۇنيەتانىمنىڭ قاينار كوزىنەن ءوربىتىپ شىعارادى.
فيلمدە باستى رولدەردى – ەرجان نۇرىمبەت, نازار شەرحان, مۇرات بيسەنبين, سامال ەسلاموۆا سىندى اكتەرلەر سومداپ, عاسىردان-عاسىرعا جالعاسىپ كەلە جاتقان قازاقتىڭ مىنەزى مەن بولمىسىن شىنايى كورسەتەدى.
