مىنا سۋرەت ايگىلى ءارتىستىڭ 1984 جىلدىڭ جازىندا جامبىل وبلىسىنىڭ ەڭ شالعايداعى مويىنقۇم اۋدانىنا ساپارى كەزىندە تۇسىرىلگەن. اتاپ ايتقاندا, شۋ اۋدانى مەن مويىنقۇم اۋدانىنىڭ شەكاراسىندا ۇلكەن ونەر يەسىن قۇشاق جايا قارسى الۋدىڭ ءبىر ءساتى بەينەلەنگەن.
الدىڭعى پلاندا شىعارىپ سالۋشى شۋ اۋپارتكومىنىڭ ەكىنشى حاتشىسى جانىبەك مايحانوۆ, ونىڭ سول جاعىندا مويىنقۇم اۋپارتكومىنىڭ ءۇشىنشى حاتشىسى جۇمابەك ورىنباەۆ, وڭ جاعىندا «ايدارلى» سوۆحوزىنىڭ ديرەكتورى ەسەنامان وشاقباەۆ تۇر.
– سول كۇنى كەشكە, – دەپ ەسىنە الادى بىرنەشە شارۋاشىلىقتى باسقارعان, ۇزاق ۋاقىت اۋداندىق ءماسليحاتتىڭ حاتشىسى بولعان ەسكەڭ, ەسەنامان اعا, – شولپان اپامىز باستاعان اۋەزوۆ تەاترىنىڭ ءبىر توپ ءارتىسى, ىشىندە نۇكەتاي مىشباەۆا, قۇدايبەرگەن سۇلتانباەۆ جانە ت.ب بار, اۋىل كلۋبى جانىنداعى الدىن الا ارنايى دايىندالعان الاڭدا (تار بولعاندىقتان كلۋبقا كوپ ادام سىيمايتىن), تاماشا ونەر كورسەتىپ, حالىققا كەرەمەت كوڭىل كۇي سىيلادى. شولپان جانداربەكوۆا مەن نۇكەتاي مىشباەۆا ءبىزدىڭ ۇيگە قوندى. ال قۇدايبەرگەن باستاعان قالعاندارى ءبىر بولىمشە مەڭگەرۋشىسىنىڭ ۇيىندە جاتتى. ەرتەڭىنە سىيلى قوناقتاردى اۋدان ورتالىعىنا جەتكىزىپ سالدىق.
ءيا, سول ءبىر كەزدەرى اتاقتى ارتىستەر, جازۋشىلار, اقىندار قازاقتىڭ دارقان دالاسىنىڭ ءار-ءار جەرىندەگى الىس اۋىلدارعا دەيىن شارشاماي بارىپ, ەل-جۇرتپەن شالقايماي ءجيى كەزدەسۋشى ەدى عوي...
بەرىكباي قادىقوۆ,
جۋرناليست
الماتى وبلىسى,
قاراساي اۋدانى
