«قۇرىق-جەتىباي» اۆتوموبيل جولىن كۇردەلى جوندەۋگە قارجى قاراستىرىلماق

ۇكىمەت • 10 ناۋرىز، 2020

«قۇرىق-جەتىباي» اۆتوموبيل جولىن كۇردەلى جوندەۋگە قارجى قاراستىرىلماق

رەسپۋبليكالىق ماڭىزى بار «قۇرىق-جەتىباي» اۆتوموبيل جولىن كۇردەلى جوندەۋگە قارجى قاراستىرىلاتىن بولادى. بۇل جايىندا پرەمەر-ءمينيسترى اسقار ءماميننىڭ سەنات دەپۋتاتتارىنىڭ ساۋالىنا بەرگەن جاۋابىندا ايتىلعان. بۇل تۋرالى پرەمەر-ءمينيستردىڭ ءباسپاسوز قىزمەتى حابارلادى.

Egemen Qazaqstan

«2018 جىلى جالپى قۇنى 11،1 ملرد تەڭگەنى قۇرايتىن اتالعان اۆتوموبيل جولىن كۇردەلى جوندەۋگە جوبالىق-سمەتالىق قۇجاتتاما ازىرلەنگەن ەدى. الايدا، ەلىمىزدىڭ بارلىق وڭىرلەرىندە اۆتوموبيل جولدارىن سالۋ، رەكونسترۋكتسيالاۋ جانە جوندەۋ بويىنشا تولىققاندى جۇمىستار جۇرگىزىلىپ جاتقانىن ەسكەرە وتىرىپ، بيۋدجەتتىك قاراجاتتىڭ شەكتەۋلىلىگىنە بايلانىستى ءبىر ۋاقىتتا بارلىق جوبالاردى ىسكە اسىرۋ مۇمكىن بولمادى»، - دەپ اتاپ وتەدى ۇكىمەت باسشىسى.

سونىمەن قاتار پرەمەر-مينيستر اتالعان اۆتوجولدىڭ ءترانزيتتىڭ دامۋىنا جانە جەرگىلىكتى تۇرعىنداردىڭ قاتىناۋىنا ماڭىزى زور ەكەندىگىن ەسكەرە وتىرىپ، جوبانىڭ ىسكە اسىرىلۋىن باستاۋعا قاراجات ءبولۋ ماسەلەسى بيىل رەسپۋبليكالىق بيۋدجەتتى ناقتىلاۋ كەزىندە بەلگىلەنگەن تارتىپپەن قارالاتىندىعىن ايتادى. «كۇردەلى جوندەۋ جۇرگىزىلگەنگە دەيىن وسى اۆتوجولدىڭ تەحنيكالىق جاي-كۇيى اۆتوجولداردى كۇتىپ-ۇستاۋ اۋقىمىندا ورىندالاتىن جول-جوندەۋ جۇمىستارىنىڭ ەسەبىنەن ساقتالاتىن بولادى»، - دەدى اسقار مامين.

ايتا كەتەيىك، سەنات دەپۋتاتتارى ساۋالدارىندا «قۇرىق-جەتىباي» تاس جولى ءوڭىر تۇرعىندارىنىڭ سوڭعى 15 جىل بويى كوتەرىپ كەلگەن ەڭ وزەكتى، كۇن تارتىبىنەن تۇسپەيتىن شەشىمىن تابۋدى تالاپ ەتەتىن ماسەلەلەرىنىڭ ءبىرى بولىپ وتىرعاندىعىن اتاپ وتەدى. «بۇل جولدى، حالىقارالىق كولىك ءدالىزى دەۋگە دە بولادى.

سەبەبى ەلىمىزدىڭ ترانزيتتىك جانە ەكسپورتتىق الەۋەتىن ارتتىراتىن قۇرىق پورتىنا كەلەتىن جۇكتەر، تاپ وسى باعىتتا رەسەي مەن وزبەكستاننان تاسىمالدانادى. ەگەر، كورشى ەلدەردەن كەلەتىن ءىرى جۇك تاسىمالدارى اقتاۋ قالاسىن اينالماي، جەتىبايدان تۋرا جولمەن قۇرىق پورتىنا قاتىناسا، 120 شاقىرىمدى ۇنەمدەيتىنى انىق. قۇرىق-جەتىباي تاس جولىن كۇردەلى جوندەۋ جوبالىق سمەتالىق قۇجاتى 2018 جىلى ازىرلەنگەن. مەملەكەتتىك ساراپتاماسى بار»، - دەدى سەناتورلار.