ءوز ەلىمىزدە وتكەن باسەكەدە جەرلەستەرىمىز قىزعالداقتار ەلىنەن كەلگەن سپورتشىلاردى مەرزىمىنەن بۇرىن جەڭىپ, قاراشا ايىندا مادريدتە (يسپانيا) وتەتىن دەۆيس كۋبوگىنىڭ فينالدىق سايىسىنا جولداما الدى. ءبىر قىزىعى, قازاقستان مەن نيدەرلاند قۇرامالارى دەۆيس كۋبوگىنىڭ بىلتىرعى فينالدىق كەزەڭىندە ءبىر توپتا ويناعان بولاتىن. سول كەزدە دە جەرلەستەرىمىز قارسىلاستارىنان باسىم تۇسكەن ەدى. ەكى كوماندا اراسىنداعى تارتىس 2:1 ەسەبىمەن اياقتالعان-دى. جەكەلەي سىندا ميحايل كۋكۋشكين بوتيك ۆان دە ءزاندشۋلپتى ۇتسا, الەكساندر بۋبليك روبين حااسەگە ەسە جىبەردى. ال جۇپتىق باسەكەدە ءبىزدىڭ جىگىتتەر قارسىلاستارىنىڭ ۋىسىنان جەڭىستى ج ۇلىپ اكەتتى. الايدا ايتۋلى كوماندانىڭ ەكەۋى دە شەشۋشى تۇستا ۇلىبريتانياعا جول بەرىپ, شيرەك فينالعا شىعا الماعان بولاتىن.
ەلوردادا وتكەن باسەكەدە جىگىتتەرىمىز ەش قيىندىقسىز جەڭىسكە جەتكەنىمەن, تۋرنير ءبىزدىڭ سپورتشىلار ءۇشىن اسا ءساتتى باستالا قويعان جوق. ءبىر كۇن بۇرىنعى جەرەبە تارتۋ ءراسىمى ءوتىپ, جارىستىڭ شىمىلدىعىن اشۋ ميحايل كۋكۋشكين مەن روبين حااسەگە بۇيىردى. جالپى, حااسە قازاق تەننيسشىلەرى ءۇشىن وتە ىڭعايسىز قارسىلاس. دەۆيس كۋبوگىنىڭ بىلتىرعى فينالدىق باسەكەسىندە ءدال وسى تەننيسشى ءبىزدىڭ الەكساندر بۋبليكتى جەڭىپ كەتكەن بولاتىن. بۇل جولى دا نيدەرلاند سپورتشىسى ميحايل كۋكۋشكيندى قاپى قالدىردى. تارتىسقا تولى وتكەن كەزدەسۋدە روبين حااسە 4:6, 7;6, 3:6 ەسەبىمەن جەڭىسكە جەتتى.
كۋكۋشكيننەن كەيىن كورتقا شىققان الەكساندر بۋبليك جانكۇيەرلەردىڭ جانە قۇراماداعى جىگىتتەردىڭ جەڭىسكە دەگەن سەنىمىن وياتتى. دەگەنمەن وتانداسىمىز جەڭىس ءۇشىن كورتتا ءبىراز تەر توگۋگە تۋرا كەلدى. الەمدىك رەيتينگتە 199-ساتىعا تابان تىرەگەن گريكسپۋر قازاقستانعا جەڭىس ءۇشىن كەلگەنىن انىق اڭعارتىپ, جەرلەسىمىزگە ءبىراز قارسىلىق كورسەتكەنىن ايتا كەتەيىك. بۋبليك 23 جاستاعى قارسىلاسى تاللون گريكسپۋردى ەكى سەتتە 7:6, 7:6 ەسەبىمەن جەڭىپ, تارازى باسىن تەڭەستىردى.
ەكىنشى جارىس كۇنىندەگى جۇپتىق باسەكەدە اندرەي گولۋبەۆ پەن الەكساندر نەدوۆەسوۆ تاندەمىنە جان-جۋلەن رويەر مەن روبين حااسە ەش قارسىلىق كورسەتە المادى. ەكى سەتكە سوزىلعان باسەكەدە جەرلەستەرىمىز 6:3, 6:3 ناتيجەسىمەن باسىم ءتۇستى. جالپى ەسەپتە العا شىققاننان كەيىن بار ءۇمىت ەلىمىزدىڭ ءبىرىنشى راكەتكاسى الەكساندر بۋبليككە ارتىلدى. ويتكەنى بۋبليك جەڭىسكە جەتەتىن بولسا, جەرلەستەرىمىز مەرزىمىنەن بۇرىن مادريد جولداماسىن يەلەنەدى. ەگەر تەڭ تۇسسە, ماسەلەنى سوڭعى كەزدەسۋدە شەشۋگە تۋرا كەلەدى.
وسىنداي جاۋاپكەرشىلىكتى ارقالاعان الەكساندر بۋبليكتىڭ جەڭىلۋگە حاقىسى جوق ەدى. ونىڭ ۇستىنە قارسىلاسى – روبين حااسە. بىلتىر كەتكەن ەسەنى قايتارۋعا تاماشا مۇمكىندىك. جانە بۋبليك ول مۇمكىندىگىن قولدان بەرگەن جوق. ءبىرىنشى سەتتە وتانداسىمىز ازداعان باسىمدىقپەن, ياعني 7:6 ەسەبىمەن جەڭىسكە جەتتى. ەكىنشى سەتتە قارقىنىنا قارقىن قوسىپ, قارسىلاسىن 6:1 ەسەبىمەن شاڭ قاپتىرىپ, قازاقستان قۇراماسىنا جەڭىس سىيلادى.
نيدەرلاند قۇرماسىن 3:1 ەسەبىمەن جەڭگەن جەرلەستەرىمىز ەكىنشى جىل قاتارىنان دەۆيس كۋبوگىنىڭ فينالدىق كەزەڭىندە ويناۋعا مۇمكىندىك الدى.
