مۇنداعى باستى ماقسات – جاڭا ءالىپبيدىڭ كەم كەتىگىن ەكشەپ, ودان ءارى جەتىلدىرە ءتۇسۋ بولىپ وتىر. وسى ورايدا رەسپۋبليكا دەڭگەيىندە ونىڭ بىرنەشە نۇسقالارى قاراستىرىلىپ, سونىڭ ىشىندە ەڭ ىڭعايلى ءارى ەڭ ۇتىمدى دەپ تانىلعان ءۇش جوبا بيىلعى 2020 جىلعى اقپان ايىندا جالپىرەسپۋبليكالىق اشىق تالقىلاۋعا ۇسىنىلعانى ءمالىم.
ءوز زامانىندا لاتىن ءالىپبيىن قولداعان قازاقتىڭ بەلگىلى لينگيۆيست-عالىمى قۇدايبەرگەن جۇبانوۆتىڭ كىشى وتانىندا بۇل ماسەلەگە قاتىستى ۇيىمداستىرىلعان باسقوسۋلار قىزۋ پىكىر-تالاستارعا نەگىز بولا ءبىلدى. بۇعان اقتوبە وبلىسىنىڭ تىلدەردى دامىتۋ باسقارماسى جانىنداعى تىلدەردى وقىتۋ ورتالىعىنىڭ ماماندارى جانە فيلولوگ-عالىمدار مەن مەكتەپ مۇعالىمدەرى قاتىسىپ, ءوز وي-پىكىرلەرىن ورتاعا سالدى.
ءتيىستى تالداۋلار مەن ساراپتاۋلار بارىسىندا جاڭا ءالىپبيدىڭ ورفوگرافيالىق, ادىستەمەلىك جانە تەرمينولوگيالىق قىرلارىنىڭ كەيبىر تۇيتكىلدەرى جونىندە ۇتىمدى ۇسىنىستار ايتىلدى. بۇل وي-تۇجىرىمدار بىرلەسكەن جۇمىس توپتارىنىڭ ورتاق وتىرىسىندا قولداۋ تاپتى. مۇندا جەتىلدىرىلگەن ءالىپبي جوباسىنىڭ ەڭ باستى ارقاۋلارى تالداۋلار نىسانىنا اينالىپ, تاڭبالاردىڭ عىلىمي نەگىزدەمەسى مەن ارىپتەردىڭ پەرنەتاقتاداعى ورنالاسۋ جۇيەسىن ودان ءارى جەتىلدىرە ءتۇسۋ جونىندە بايىپتى اڭگىمەلەر قوزعالدى.
تالقىلاۋلار كەزىندە مەكتەپ مۇعالىمدەرى جەتىلدىرىلگەن ءالىپبي جوباسىن ماقۇلداپ, بۇعان قاتىستى وزدەرىنىڭ وڭ كوزقاراستارىن ءبىلدىردى. راس, اتالعان جوبا ازىرگە قولدانىسقا ەنگىزىلە قويعان جوق. سوندىقتان بۇعان قاتىستى ءۇزىلدى-كەسىلدى پىكىر ايتۋدىڭ ءوزى ءسال اسىعىستاۋ دا بولاتىن شىعار. بۇل ءۇشىن ءبىرىنشى كەزەكتە لاتىن گرافيكاسىنا نەگىزدەلگەن قازاق ءتىلىنىڭ جاڭا ءالىپبي جوباسىنىڭ ومىرشەڭدىگى مەن باسەكەگە قابىلەتتىلىگىن قولدانىستا دالەلدەۋ دەلىنەتىن اسا جاۋاپتى مىندەت تۇر. تەك سوندا عانا جاڭا ءالىپبي مەملەكەت پەن قوعامداعى ءوز ورنىن تابا الادى. «ەندىگى كەزەك جازۋ داعدىسىندا» – دەستى ولار.
اقتوبەدە وتكىزىلگەن تالقىلاۋلار قورىتىنداسى بويىنشا ايتىلعان ۇسىنىستار مەن پىكىرلەر ۇلتتىق كوميسسيا جانىنداعى جۇمىس توپتارىنىڭ بىرلەسكەن كەڭەسىنە جولداندى.
