جاس ۇرپاقتى اباي الەمىنە ساپار شەكتىرەتىن يگى شارا حاكىمنىڭ 175 جىلدىعىن مەرەكەلەۋ اياسىندا ۇيىمداستىرىلعان. ءبىلىم ورداسىنىڭ 3-قاباتى تۇگەلىمەن اباي مۇراسىنا ارنالىپ, سورەلەردە ۇلى ويشىلدىڭ كىتاپتارى قويىلىپتى. مەكتەپ ۇجىمى بۇل زالدى جاساقتاۋعا جارتى جىل ۋاقىت كەتكەنىن ايتادى. ادەبي زالدىڭ سالتاناتتى اشىلۋى بارىسىندا ۇلى اقىننىڭ اندەرى شىرقالىپ, كوپشىلىك نازارىنا ارنايى كىتاپ كورمەسى ۇسىنىلدى. تومەنگى سىنىپ وقۋشىلارى ابايدىڭ قارا سوزدەرى مەن ولەڭدەرىن الماكەزەك جاتقا وقىدى.
– اباي – داۋىرمەن ۇندەسە بىلگەن عاسىر اقىنى. ءاربىر بۋىنى مەن بۋناعى, تارماعى مەن شۋماعى وسكەلەڭ ۇرپاقتىڭ وي-ساناسىنان كورىنىس تابا بىلگەن, ويشىل, تەرەڭ اقىن. ارينە, قازاقتىڭ قازاقتىعىن كۇللى الەمگە تانىتاتىن كىم دەسە, اباي دەر ەدىك. ەندەشە بۇگىنگى ءوسىپ كەلە جاتقان جاس بۋىن ابايدىڭ ءاربىر ولەڭ جولدارىنان ۇلگى, عيبرات الىپ, بولاشاقتا ۇلكەن ازامات بولىپ, قازاق قوعامىنا ەڭبەك ەتەمىن دەسە, ابايدىڭ مۇراسىن ءبىلۋى كەرەك, زەردەلەۋى كەرەك. مەكتەبىمىزدىڭ تورىنەن ورىن العان ورتالىقتا ايگىلى جازۋشىلارمەن جانە اقىندارمەن كەزدەسۋلەر ءوتىپ, تاقىرىپتىق بايقاۋلار مەن ەكسكۋرسيالار, بەينەلەۋ ونەرى كورمەلەرى ۇيىمداستىرىلاتىن بولادى, – دەيدى م. ماقاتاەۆ اتىنداعى № 140 مەكتەپ-گيمنازياسىنىڭ تاريح جانە قۇقىقتانۋ ءپانىنىڭ مۇعالىمى داۋرەن ساعىنعاليەۆ.
الماتى
