«2020 جىلدىڭ 3 ناۋرىزىندا وڭتۇستىك كورەيانىڭ الەۋمەتتىك جەلىلەرىنىڭ ورىس ءتىلدى توپتارىندا وڭتۇستىك كورەيادا زاڭسىز جۇرگەن قازاقستان ازاماتى كوروناۆيرۋس جۇقتىرعانى تۋرالى اقپارات تارالدى. سونىمەن بىرگە ناۋقاستىڭ كلينيكادان قاشىپ كەتكەنى, قازىرگى ۋاقىتتا پوليتسيا ىزدەۋ جاريالاعانى دا ايتىلعان. قازاقستاننىڭ وڭتۇستىك كورەياداعى ەلشىلىگى ءتيىستى شارالار جۇرگىزىپ, ناتيجەسىندە اقپاراتتىڭ جالعان ەكەنىن انىقتادى», دەدى ا.سمادياروۆ.
كورەي پوليتسياسىنىڭ اقپاراتىنا سايكەس, وسىدان بىرنەشە كۇن بۇرىن قازاقستاندىق ازامات كوروناۆيرۋسكە شالدىققان بىرنەشە ادام بارعان قوعامدىق ورىندا بولعان. ودان كەيىن بەلگىلەنگەن تارتىپكە سايكەس, وعان جانە سول ورىندا بولعان بارلىق ادامدارعا اۋرۋدىڭ سىرتقى بەلگىلەرى بايقالعان جاعدايدا ۆيرۋستىڭ بار-جوعىن انىقتاۋ تەستىن تاپسىرۋ قاجەتتىگى ەسكەرتىلگەن. «وتانداسىمىز بارلىق قاجەتتى مەديتسينالىق پروتسەدۋرالاردان وتۋگە جانە جەرگىلىكتى بيلىكپەن ىنتىماقتاسۋعا دايىن. ءبىزدىڭ ەلشىلىك كوروناۆيرۋس وڭتۇستىك كورەيا اۋماعىندا انىقتالعان العاشقى كۇننەن باستاپ جەرگىلىكتى ىشكى ىستەر مينيسترلىگىمەن جانە اۋرۋلاردى باقىلاۋ, الدىن الۋ كورەي ورتالىعىمەن تىعىز جۇمىس ىستەپ كەلەدى. اتالعان ورتالىقتىڭ ۇسىنىسى بويىنشا ءبىزدىڭ وتانداسىمىز تەلەفون ارقىلى كۇندەلىكتى دەنساۋلىعىنا باقىلاۋ جۇرگىزىپ, ءۇي كارانتينىندە بولۋى قاجەت», دەدى ا.سمادياروۆ.
جەرگىلىكتى پوليتسيادا ءبىزدىڭ ازاماتپەن بايلانىس ورناتىلعان. ول بۇعان دەيىن كلينيكاعا بارماعانىن جانە كوروناۆيرۋس بار-جوعىن انىقتايتىن قاندايدا ءبىر ساراپتاما تاپسىرماعانىن جەتكىزگەن. رەسمي وكىل قازاقستاننىڭ وڭتۇستىك كورەياداعى ەلشىلىگى بۇل ماسەلەنى تۇراقتى باقىلاۋعا العانىن حابارلادى.
سونىمەن قاتار جيىندا وڭتۇستىك كورەيادان قازاقستان ازاماتتارىن ەۆاكۋاتسيالاۋ ماسەلەسى قاراستىرىلماعانى بەلگىلى بولدى. «وزدەرىڭىز دە بىلەسىزدەر, ول جاقتا 35 مىڭ ازاماتىمىز بار. ازىرگە ولاردى ەۆاكۋاتسيالاۋ ماسەلەسى كوتەرىلىپ وتىرعان جوق. ازاماتتارىمىزدىڭ كەيبىرى كورەيا ايماعىندا زاڭسىز ءجۇر. ولاردىڭ دا قاۋىپسىزدىگى ءۇشىن مەديتسينالىق ورتالىقتارمەن كەلىسسوز جۇرگىزىپ جاتىرمىز», دەدى ا.سمادياروۆ. بۇعان دەيىن كورەيا مەن قازاقستان اراسىنداعى اۋە رەيستەرىنىڭ قىسقارتىلعانى حابارلانعان بولاتىن.
