كينويندۋستريانىڭ قازىرگى جاعدايى تۋرالى سۇراققا جاۋاپ بەرە كەلىپ, سپيكەرلەر 2019 جىل بۇكىل قازاقستاندىق كينەماتوگراف ءۇشىن ايتۋلى بولعانىن اتاپ ءوتتى. رەسپۋبليكادا «كينەماتوگرافيا تۋرالى» زاڭ قابىلداندى, مۇنى كينەماتوگرافيستەر كوپتەگەن جىلدار بويى كۇتىپ ەدى. ەندى, مىنە, قازاقستاندا وتە ماڭىزدى وزگەرىستەر بولادى. وسى زاڭنىڭ ارقاسىندا رۋحاني, پاتريوتتىق قۋات بەرەتىن, قازاقستاننىڭ قايتالانباس اسەمدىگىن كورسەتەتىن, ءبىزدىڭ حالىقتىڭ ونەگەلىك سۇلۋلىعىن پاش ەتەتىن فيلمدەرگە قولداۋ كورسەتۋگە ارنالعان ۇلتتىق كينونى قولداۋ مەملەكەتتىك ورتالىعى قۇرىلدى.
«مەملەكەتتىڭ كومەگىنە ۇمىتكەر كارتينالار كوركەمدىگىنەن, شىن مانىندە قىزىقتى ستسەناريىنەن باستاپ بىرقاتار تالاپتارعا ساي بولۋى جانە ءتۇسىرۋشى توپتىڭ جوعارى كاسىبي شەبەرلىگىمەن ەرەكشەلەنۋى ءتيىس. وسىنىڭ ارقاسىندا ءبىزدىڭ كينەماتوگرافيستەر وزدەرىن تەك قارجىمەن عانا ەمەس, سونداي-اق وقۋ جانە شەتەلدىك ارىپتەستەرىمەن جۇمىستىڭ بىرەگەي تاجىريبەسىن الۋ مۇمكىندىگىمەن قامتاماسىز ەتەدى», - دەدى ن. داۋەشوۆ.
مەملەكەت قارجىلاندىرعان فيلم پروكاتىنان تۇسكەن جالپى تابىستىڭ 20%-ى ۇلتتىق فيلمدەردى ودان ءارى دامىتۋ جانە قارجىلاندىرۋ ءۇشىن كينوورتالىققا قايتارىلاتىنى, ال 80%-ىن ءوز كومپانياسىن دامىتۋ, ءوز قىزمەتكەرلەرىنىڭ داعدىسىن شىڭداۋ جانە ءوندىرىستىڭ باسقا ماڭىزدى ماسەلەلەرى ءۇشىن پروديۋسەردىڭ الاتىنى ماڭىزدى بولىپ وتىر. بۇل راسىندا دا تەك شىنداپ ەڭبەك ەتۋگە جانە ىنتىماقتاستىقتىڭ ادال ەرەجەسىن قابىلداۋعا دايىن نارىق قاتىسۋشىلارى ءۇشىن وتە مىقتى قولداۋ. بۇعان قوسا, مۇنداي پراكتيكا بيىلدىڭ وزىندە كينوورتالىققا ءۇش فيلمنەن تۇسەتىن العاشقى تابىستى قامتاماسىز ەتۋى ءتيىس.
«مۇندا تاعى «بىرىڭعاي كينوبيلەت» پروبلەماسى بار. بىرىڭعاي اقپاراتتىق جۇيەسىز ءبىز قازاقستاندا كينوبيزنەستى دامىتا المايمىز. بۇگىنگى كۇنى بىزدە ەسەپتەۋدىڭ اۆتوماتتاندىرىلعان جۇيەسى جوق, كينونارىققا دۇرىس تالداۋ جاساي المايمىز, كينو كورەرمەندەرىمەن كەرى بايلانىس جوق. كوپتەگەن ەلدەردە – كورشى رەسەدە, گرۋزيادا, ۋكرايندا, مۇنداي جۇيەلەر جۇمىس ىستەپ تۇر. ءبىزدىڭ مەملەكەتتىك ورتالىقتىڭ ماقساتى – وسى جۇيەنى بارلىق كينوتەاترلاردا ەنگىزۋگە تىرىسۋ. سوندا عانا بىزگە جالپى كورىنىس تۇسىنىكتى بولادى, جانە ءبىز نارىقتى رەتتەي الامىز», - دەپ اتاپ كورسەتتى گ.سارسەنوۆا.
شەتەلدىك كينو شىعارۋشىلارمەن سەرىكتەستىك تە ءوزارا ءتيىمدى بولادى. قازاقستاندا شەتەلدىك كينوكومپانيالارعا كينو شىعارۋ قىزمەتى قۇنىنىڭ 30%-نا دەيىن سۋبسيديا بەرىلەتىن حالىقارالىق تاجىريبە ەنگىزىلدى. قازاقستاندا تۇسىرۋگە دايىن كينەماتوگرافيستەردىڭ تىزبەسى دە بار. ادەتتە, باسقا ەلدەردىڭ رەجيسسەرلەرىن ءبىزدىڭ لوكاتسيالار, ينفراقۇرىرىلىم جانە تابيعاتتىڭ كورنەكى جەرلەرى قىزىقتىرادى.
«بۇل قازاقستاندا قالاتىن اقشا. شەتەلدىك كومپانيا وپەراتورلار جالدايدى, كوستيۋمدەر الادى, گريمدى, كولىكتى تولەيدى, ولار بۇل جەردە جۇمسايتىن شىعىستىڭ بارلىعى ءبىزدىڭ ەلىمىزدە قالادى. ياعني ءبىز باسشىلىققا الا الاتىن ەكونوميكالىق وتە ءتيىمدى جۇيە. سونىمەن قاتار تۋريستىك كلاستەر دامۋدا. كينوتۋريزم – بۇل بۇگىنگى الەمدىك ترەۆەل-يندۋستريانىڭ ەڭ تىڭ ءارى قىزىقتى باعىتتارىنىڭ ءبىرى», - دەپ ءوز پىكىرىن ءبىلدىردى ك.سەيىتوۆا.
«قازاقستان كينويندۋسترياسىندا كوپتەن كۇتتىرگەن ەڭ ماڭىزدى وقيعالاردىڭ ءبىرى ءوز ۋاقىتىنا جەتتى. ءبىزدىڭ كينەماتوگرافيستەر بۇل كونكۋرسقا ۇلكەن قىزىعۋشىلىق ءبىلدىرىپ وتىر – تۇسكەن وتىنىمدەر سانى ءبىرىنشى كونكۋرستىڭ تسيفرلارىنان ەكى ەسە اسىپ ءتۇستى. كينو يندۋسترياسىنىڭ تانىمال كاسىپقوي ماماندارىنان قۇرالعان كوماندا 250-دەن استام ءوتىنىمدى قاراستىردى جانە قارجىلاي قولداۋعا ۇمىتكەر بولا الاتىن 88 نەعۇرلىم پەرسپەكتيۆالىق جوبالاردى ىرىكتەپ الدى. بۇل پيتچينگتىڭ بىرەگەيلىگى جانە باستى ەرەكشەلىگى – قالاۋ بىلدىرگەن كەز كەلگەن ادام جوبالاردىڭ قورعالۋىن كينوورتالىقتىڭ YouTube-گى رەسمي ارناسىنان ونلاين رەجيمدە قاداعالاي الادى», - دەدى گ. سارسەنوۆا.
ەستەرىڭىزگە سالا كەتسەك, «ۇلتتىق فيلم» اتاعىنا حالىقارالىق فەستيۆالدارعا قاتىسۋ ءۇشىن ايقىن الەۋەتى بار اۆتورلىق/ارتحاۋستىق كارتينالار دا, كوپشىلىك كورەرمەنگە ارنالعان كوممەرتسيالىق كوركەم جانە انيماتسيالىق فيلمدەر دە, سونداي-اق دەرەكتى جانە قىسقا مەتراجدى كينوجوبالار مەن حالىقارالىق بىرلەسكەن ءونىم بىردەي دارەجەدە ۇمىتكەر بولا الادى.
