ەل ۇكىمەتى كوروناۆيرۋستىڭ ەل اۋماعىنا تارالۋىن بولدىرماۋ ءۇشىن شارالار قابىلداۋدا. 2020 جىلعى 1 ناۋرىزدان باستاپ كارانتيندىك ءىس-شارالار قولدانىلاتىن ەلدەردىڭ تىزبەسى كەڭەيۋىنە بايلانىستى سول ەلدەردەن كەلگەن جولاۋشىلارعا 4-ءشى كۇشەيتۋ كەزەڭى ەنگىزىلدى. قازاقستان مەن قىتاي اراسىنداعى بارلىق تۇراقتى رەيستەر (اپتاسىنا 34 رەيس) 3 اقپاننان باستاپ توقتاتىلدى.
«2020 جىلعى 1 ناۋرىزدان باستاپ نۇر-سۇلتان – سەۋل جانە الماتى – سەۋل باعىتتارى بويىنشا تۇراقتى رەيستەردىڭ سانى اپتاسىنا 9-دان 3 رەيسكە دەيىن قىسقاردى. «ەير استانا» اۋە كومپانياسىنىڭ نۇر-سۇلتان – سەۋل باعىتى اپتاسىنا 2-دەن 1 رەيسكە دەيىن, الماتى – سەۋل باعىتى بويىنشا اپتاسىنا 5-تەن 1 رەيسكە دەيىن جانە «Asiana Airlines» اۋە كومپانياسىنىڭ رەيسى 2-دەن 1 رەيسكە دەيىن شەكتەلدى. «Mahan Air» اۋە كومپانياسىنىڭ الماتى – تەگەران باعىتى بويىنشا رەيستەر 1 ناۋرىزدان باستاپ (اپتاسىنا 1 رەيس) توقتاتىلدى. سونداي-اق, 5 ناۋرىزدان باستاپ نۇر-Cۇلتان – باكۋ باعىتى توقتاتىلادى. الماتى-باكۋ رەيسى 5–تەن 1 رەيسكە دەيىن («ەير استانا» 3-تەن رەيسكە 1 دەيىن, «Azerbaijan Airlines» 2-دەن 1 رەيسكە دەيىن), اقتاۋ — باكۋ رەيسى 7-دەن 1 رەيسكە دەيىن (SCAT) شەكتەلەدى. «SCAT» اۋە كومپانياسىنىڭ نۇر-سۇلتان – توكيو باعىتى 2-دەن 1 رەيسكە دەيىن شەكتەلەدى», دەلىنگەن حابارلامادا.
اتالعان رەيستەردىڭ توقتاتىلۋىنا بايلانىستى, 2020 جىلعى 1 ناۋرىزدان باستاپ جوعارىدا كورسەتىلگەن رەيستەرگە بيلەتتەرى بار جولاۋشىلار اۋە بيلەتتەردى ساتىپ الۋ ورنى بويىنشا ايىپپۇلسىز جانە تولىق كولەمدە قايتارا الادى.
جولاۋشىلار اۋە بيلەتتەردى قايتارۋ ماسەلەسى بويىنشا كەڭەس الۋ ءۇشىن «قازاقستاننىڭ اۆياتسيالىق اكىمشىلىگى» اق-دا 8 (7172) 64 58 41 ءنومىرى بويىنشا جەدەل جەلى تەلەفونى جۇمىس ىستەيدى. جۇمىس ۋاقىتى جۇمىس كۇندەرى (5/2) ساعات 9.00-دان 18.00-گە دەيىن.
