ەڭ باستىسى – فيلوسوفيالىق ماعىنا-ءمانىسى وتە تەرەڭ, ۇقساتۋى مەن ۇستانۋى كەلىسىپ جاتسا, ءبىزدىڭ قازاقى مەملەكەت قانا ەمەس, جىل ساناپ جىلۋى ازايىپ بارا جاتقان كۇللى ادامزاتقا ۇلگى-ونەگە, رۋحاني مىزعىماس قۇبىلا ەتىپ ۇستانۋعا بولارلىق ۇلى ناۋرىزدىڭ ماڭگىلىك, اداماتا ۇرپاعىنا ورتاق يدەيالىق مازمۇنىن, رۋحاني ونەگەسىن, ادامگەرشىلىك قۇبىلاناماسىن ەلىمىزدىڭ, ۇلتىمىزدىڭ ساناسىنا بۇگىنگىدەن گورى تەرەڭىرەك, بۇگىنگىدەن گورى جۇعىمدىراق, بۇگىنگىدەن گورى تابيعي, شىنايىراق ءسىڭىرۋ قاجەتتىگى وتە ءساتتى باياندالعاندىعى.
قازاقتىڭ «اشقان قارنى تويىنىپ, اشىلعان ەتەگى جابىلعانىنا» كوپ بولدى, بۇل – اقىماقتان وزگەنىڭ بارىنە ايان نارسە, بىراق بۇل ادام ءۇشىن, ۇلت ءۇشىن, مەملەكەتتىڭ ءباسىبۇتىن ەگەسىنە اينالعان حالىق ءۇشىن ماڭگىلىك جاساۋدىڭ, ءدىلى بەرىك, ساناسى شىڭدالعان, نەبىر وتكەلدەردەن امان ءوتىپ, ءوز مىقتىلىعىن نەشە مارتە دالەلدەگەن ەلدەردەن قۇرالعان, قاتەرى مول, سىناعى ەسەپسىز الەم ورتاسىنا كەشە عانا ەنگەن حالىق ءۇشىن مىقتىلار قوعامىندا ماڭگىلىك قالۋىنا ۇمتىلۋىنىڭ الىپپەسى عانا. وسىلاي ويلاپ, وسىلاي سەزىنگەندە عانا ماڭگىلىك ەل يدەالىنان دامەتۋگە بولادى. قازىر مەملەكەت ءۇشىن ەڭ باستى نارسەنىڭ ءبىرى – حالىقتىڭ رۋحىن شىڭداۋ, ونىڭ رۋحاني-مادەني بولمىسىن ورنىقتى ەتىپ قالىپتاستىرۋ. بىزگە بەلگىلى «رۋحاني جاڭعىرۋ», سونىڭ قۇرامداس بولىگىندەي « ۇلى دالانىڭ جەتى قىرى» سوڭعى جىلدارى ءتاپ-ءتاۋىر قولعا الىنىپ وتىرعانىنىڭ سەبەبى – وسى.
اتالمىش ماقالانىڭ دا تۇپكى ماقسات-مۇراتى وسىعان سايادى. ناۋرىز يدەياسى, اسىرەسە امال – وسى مۇراتقا قىزمەت ەتە الاتىن, ۇلت رۋحىن وزىنە تولىق تابىستىرا الاتىن, كۇللى حالىقتىڭ ساناسىن سەرگىتىپ, رۋحىن شىڭداي الاتىن دۇنيە. ەندىگى ماسەلە – وسىنى بىلىكتىلىكپەن حالىق ساناسىنا ورنىقتىرۋ. ال بۇل وپ-وڭاي نارسە ەمەس. ۇلكەن جاۋاپكەرشىلىكتى, بىلىكتى قالايتىن جۇمىس.
مەيىرحان اقداۋلەت ۇلى
