«قازاقستان حالقى اسسامبلەياسى» كافەدراسىنىڭ جانىندا 2018-2019 وقۋ جىلىنان بەرى ستۋدەنت جاستاردىڭ ۆولونتەرلىك بەلسەندىلىگىن قالىپتاستىرىپ, ايماقتاعى الەۋمەتتىك ماسەلەلەردى شەشۋگە باعىتتالعان «قوعامعا قىزمەت» يننوۆاتسيالىق, وقۋ-ادىستەمەلىك ورتالىعى جۇمىس ىستەيدى. 2019 جىلدىڭ ءساۋىر ايىندا قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ اقتاۋ قالاسىنا جۇمىس ساپارى بارىسىندا ورتالىقتىڭ قىزمەتىمەن تانىسىپ, وڭ باعاسىن بەرگەن بولاتىن.
ورتالىقتىڭ قىزمەتى ۆولونتەرلىك جۇمىستىڭ نەگىزگى سالالارى بويىنشا قوعامدىق ارەكەتتەردى جۇزەگە اسىرۋعا باعىتتالعان «قوعامعا قىزمەت» پانىنەن تەوريالىق جانە تاجىريبەلىك ءدارىس بەرۋمەن بايلانىستى. قازىرگى ۋاقىتتا ستۋدەنتتىك جوبالار كەلىسىمشارت نەگىزىندە 20-عا جۋىق قالا مەكەمەلەرىندە جۇزەگە اسىرىلىپ, 2018-2019 وقۋ جىلىندا 1200 ستۋدەنت, 2019-2020 وقۋ جىلىندا 1570 ستۋدەنت ءدارىس الۋدا. الەۋمەتتىك, ەكولوگيالىق, مادەني, سپورت سالاسىنداعى ۆولونتەرلەردىڭ 200-دەن استام جوباسىن جۇزەگە اسىردى.
دەرەكتەرگە سۇيەنسەك, ەلىمىزدە 700 مىڭنان استام مۇگەدەك جان بار. ماڭعىستاۋ وبلىستىق الەۋمەتتىك قورعاۋ ورگاندارىندا 27 مىڭ مۇگەدەك تىركەلگەن, ونىڭ ىشىندە 5188-ءى – مۇگەدەك بالا, بۇل مۇگەدەكتەردىڭ جالپى سانىنىڭ 20%-ى, سال اۋرۋىنا شالدىققان – 290 بالا, اۋتيزممەن اۋىراتىن – 92 بالا, داۋن سيندرومىمەن اۋىراتىن 65 بالا بار. 132 قاريا قارتتار ۇيىندە, 33 بالا ارنايى بالالار ۇيىندە تۇرادى. ۋنيۆەرسيتەتتىڭ «قوعامعا قىزمەت» جوباسى اياسىندا ستۋدەنتتەر مۇگەدەك جاندار مەن قارتتار ۇيىنە, بالالار ۇيىنە تۇراقتى بارىپ, ءوز قولعابىستارىن كورسەتىپ كەلەدى.
جۋىردا «قوعامعا قىزمەت» ورتالىعى قازاقستان حالقى اسسامبلەياسىنىڭ عيماراتىندا «ماڭعىستاۋ وبلىسىندا ۆولونتەرلەر جىلىنىڭ اشىلۋىنا ارنالعان «VOLUNTEERS MANGYSTAU-2020» اتتى سالتاناتتى شارا ۇيىمداستىردى.
ماڭعىستاۋ وبلىسى اكىمىنىڭ ورىنباسارى ق.جۇماشەۆ, مەملەكەتتىك مەكەمەلەردىڭ, ۇكىمەتتىك ەمەس ۇيىمداردىڭ, بيزنەس قۇرىلىمداردىڭ, ايماقتىق باق وكىلدەرى, Yessenov University-ءدىڭ (YU) باسشىلارى, وقىتۋشىلارى, ستۋدەنتتەرى, بارلىعى 350-دەن استام ادام قاتىسقان ءىس-شارا اياسىندا ماڭعىستاۋ وبلىسى قحا-نىڭ ۆولونتەرلەر قوزعالىسى ورتالىعىنىڭ اشىلۋى, قحا كافەدراسىنىڭ قۇرامىنداعى «قوعامعا قىزمەت» يننوۆاتسيالىق وقۋ-ادىستەمەلىك ورتالىعىنىڭ قىزمەتىمەن تانىستىرىلىمى ءوتتى. «قوعامعا قىزمەت» ءپانى بويىنشا ورىندالعان ۆولونتەرلىك قىزمەتتىڭ ءارتۇرلى باعىتتارىنداعى ستۋدەنتتىك جوبالاردىڭ كورمەسى ۇيىمداستىرىلدى. ستۋدەنتتەر ءوز جۇمىستارىمەن تانىستىرىپ, بولاشاق جوسپارلارىمەن ءبولىستى.
سالتاناتتى جيىن ن.ءجانتورين اتىنداعى وبلىستىق مۋزىكالىق-دراما تەاترىنىڭ سابىر ادايدىڭ «ون سەگىز مىڭ عالام جانە كسەنوفوبيا دەرتى» شىعارماسىنا نەگىزدەلگەن ادەبي قويىلىمىمەن اشىلىپ, قاتىسۋشىلارعا «قوعامعا قىزمەت» ورتالىعىنىڭ جۇمىسى تۋرالى بەينەروليك كورسەتىلدى.
ايماقتاعى ۆولونتەرلەر قوزعالىسىنىڭ دامۋىنا, «قوعامعا قىزمەت» جوباسىنا قولداۋ كورسەتكەن ادامدارعا ىزگىلىكتىڭ, رۋحاني كەلىسىمنىڭ گۋمانيستىك مۇراتتارىنا جاساعان قىزمەتتەرى ءۇشىن العىس حاتتار بەرىلدى. مۇمكىندىگى شەكتەۋلى جاندارعا ارنالعان سپورت كەشەنىنىڭ, دامۋ مۇمكىندىگى شەكتەۋلى بالالارعا ارنالعان №3 ارناۋلى الەۋمەتتىك قىزمەتتەر كورسەتۋ ورتالىعى تاربيەلەنۋشىلەرى ستۋدەنتتەرمەن بىرلەسە ونەر كورسەتىپ, سوڭى «ماڭعىستاۋ ۆولونتەرلەرى» اتتى مەرەكەلىك فلەشموبپەن اياقتالدى.
قوعامعا قىزمەت ەتۋ – بۇل «كومەك بەرۋ» ۇستانىمىن تاڭداۋ, الەمدەگى مەيىرىمدىلىكتى دارىپتەۋ, الەمدى دانالىقپەن جانە سۇيىسپەنشىلىكپەن تولىقتىرۋ, مۇمكىندىگى شەكتەۋلى جانداردىڭ مۇقتاجدىقتارى مەن قايعىسىنا جاۋاپ بەرۋ. ال بۇل قاسيەتتەر ءبىزدىڭ حالقىمىزدىڭ بويىندا, قانىندا بار. اقتاۋداعى Yessenov University ستۋدەنتتەرىنىڭ قايىرىمدىلىق, مەيىرىمدىلىك, ىزگىلىك جوباسىن ەكى جىل بۇرىن قولعا الىپ, جان-جاقتى جۇرگىزىپ كەلە جاتقانى قۋانتادى. ستۋدەنتتەر وسى ەكى جىلدىڭ ىشىندە قانشاما جارىمجان جانە جابىرقاۋ جانداردىڭ جانىنان تابىلىپ, قولتىعىنان دەمەپ, كوڭىلىنە قۋانىش سىيلادى دەسەڭىزشى؟! جاستاردىڭ ەل-جۇرتىنا قايىرىمدى بولۋى, قورشاعان ورتاعا جىلىشىراي-جاناشىرلىقپەن قاراۋى – باستى قاجەتتىلىك, باستى قۋانىش.
– سوندىقتان اۋقىمدى, ماڭىزدى يگى ىسكە تەك ستۋدەنتتەر قاۋىمى ەمەس, بۇكىل قوعامنىڭ مۇشەلەرى اتسالىسسا, مۇقتاج جاندارعا قول ۇشىن سوزىپ, قانداي سالادا بولسىن يگىلىكتى ىستەر تىندىرۋعا دايىن بولسا, ەلىمىزدە ينكليۋزيۆتى قوعام قالىپتاساتىنى ءسوزسىز, – دەيدى جوباعا باستاماشى بولعان وقۋ ورنىنىڭ باسشىسى بەرىك احمەتوۆ.
ماڭعىستاۋ وبلىسى
