ورتالىق كوممۋنيكاتسيالار قىزمەتىنىڭ الاڭىندا ابىلاي حان مونۋمەنتىنىڭ بوي كوتەرۋى تۋرالى وتكەن ءباسپاسوز ءماسليحاتىنا قوعام قايراتكەرى ارمان شوراەۆ قاتىستى. ابىلاي حاننىڭ ەرلىگى مەن ەل باسقارۋ ەرەكشەلىگىن كەڭىنەن ناسيحاتتاۋ, حالىقتىڭ رۋحىن كوتەرۋ, ۇلى تۇلعانىڭ كەلبەتىن جاس ۇرپاقتىڭ ساناسىنا ءسىڭىرۋ ماقساتىندا بىلتىر ارمان تولەگەن ۇلى ابىلاي حان مونۋمەنتىن تۇرعىزۋ باستاماسىن كوتەرگەن بولاتىن. پرەزيدەنت قاسىم-جومارت توقاەۆ ءوز كەزەگىندە يگىلىكتى ءىستى قۇپ كورىپ, قولداۋ ءبىلدىردى.
كەشەن «ابىلاي حان» مونۋمەنتى دەپ اتالادى, بيىكتىگى 54 مەتر. ابىلاي حاننىڭ تاقتا وتىرعان كەلبەتى سۋرەتتەلەدى. حاننىڭ اساتاياعىنا جەدەل ساتى ورناتىلادى, كەلۋشىلەر سول ارقىلى ءزاۋلىم بيىككە كوتەرىلىپ وقجەتپەستىڭ قياسىنا كوز جۇگىرتىپ, بۋرابايدىڭ كولى مەن سۇلۋ كوكشەنىڭ كەربەز دالاسىنا كوز تاستاپ دامىلدايدى. كەشەندى مەملەكەتتىك بيۋدجەتتىڭ قارجىسىنا ەمەس, قاراپايىم حالىقتىڭ قولداۋىمەن سالۋ كوزدەلىپ وتىر.
– ابىلاي حاننىڭ ءبىزدىڭ ەلدىگىمىزدەگى ءرولىن, تاريحتاعى ورنىن بىلەسىزدەر. ۇلكەن شايقاستاردىڭ الدىندا ەلىمىزدى بىرىكتىرىپ, قازاق تايپالارىنىڭ باسىن قوسىپ, جوڭعارلاردى جەڭۋگە ەڭ كوپ ۇلەس قوسقان بابامىز. بۇكىل حالىق بولىپ وسى مونۋمەنتتى قويۋدى ءجون كوردىك. ال جوباعا 5-7 ميلليون دوللار قاجەت جانە ول قاراجاتتى اسارلاتىپ, حالىق بولىپ, كاسىپكەر جىگىتتەر بولىپ جينايمىز», – دەدى ارمان شوراەۆ. مونۋمەنت اقمولا وبلىسى, بۋراباي كۋرورتتى ايماعىنداعى كەنەسارى اۋىلىندا سالىناتىن بولىپ كەلىسىلدى. سونداي-اق كەشەن قۇرامىندا قازاق حالقىنىڭ حاندىق ءداۋىرىن سۋرەتتەيتىن مۋزەي, كىتاپحانا, دەمالۋشىلارعا قاجەتتى الەۋمەتتىك نىساندار ۇيىمداستىرىلاتىن بولادى.
«بىرەۋلەر بابامىزدىڭ بەينەسىندەگى عيماراتتى ۇلىتاۋدا, ەندى بىرەۋلەر الماتى مەن سەمەيدە قويۋدى ۇسىندى. ويلانا كەلە, ءبىز ابىلاي ءوز ورداسىن تىككەن بۋراباي مەن كوكشەتاۋدىڭ اراسىنداعى كەنەسارى دەگەن اۋىلدىڭ جانىنان سالامىز دەپ شەشتىك. ەسكەرتكىشتىڭ ىرگەتاسى رەتىندە پايدالانىلاتىن عيماراتتا مۇراجاي ەكسپوزيتسياسى, كونفەرەنتس-زال, كورمە زالى جانە تاعى باسقالارى ورناتىلادى. كوكشەتاۋ ابىلايحاننىڭ ەسىمىمەن عانا بايلانىستى ەمەس. وندا ءبىرجان سال, اقان سەرى, شوقان بابالارىمىزدىڭ ىزدەرى بار. مۇنداي جوبالار رەسپۋبليكانىڭ بارلىق جەرىندە بولۋى ءتيىس, وسى ارقىلى ىشكى ءتۋريزمدى دامىتا الامىز», دەدى ول.
ءباسپاسوز ءماسليحاتىندا اتالعان جوبانى ىسكە اسىراتىن ساۋلەتشى, ديزاينەر, سۋرەتشى, ينجەنەر, قۇرىلىسشى ماماندار اراسىندا حالىقارالىق اشىق كونكۋرس جاريالاندى. ياعني, ابىلاي حان كەشەنىنىڭ سىزبالىق نۇسقاسىن جاساۋعا الەمنىڭ كەز كەلگەن ەلىنەن ۇمىتكەرلەر قاتىسا الادى.
كونكۋرس وسى جىلدىڭ 1 ناۋرىز بەن 15 ءساۋىر ارالىعىندا وتەدى. 7 مامىر كۇنى نۇر-سۇلتان قالاسىنداعى قارۋلى كۇشتەر اسكەري-تاريحي مۋزەيىندە كوميسسيا قۇرامى كونكۋرسقا كەلىپ تۇسكەن ۇزدىك 5 جوبانى انىقتايدى. ۇيىمداستىرۋشىلاردىڭ قارجىلاندىرۋىمەن ىرىكتەلگەن 5 جوبانىڭ سىزبالىق نۇسقاسى جاسالادى. ۇزدىك 5 ماكەتتىڭ اراسىنان ساۋلەتى مەن تيىمدىلىگى جوعارى سانالعان اۆتوردىڭ جۇمىسى كوميسسيا ارقىلى ماقۇلدانادى. ۇيىمداستىرۋشىلار حان ابىلايدىڭ مونۋمەنتى ارقىلى قازاقستاننىڭ تاريحىندا قالۋعا نيەتتى سالا ماماندارىن كونكۋرسقا بەلسەندى قاتىسۋعا شاقىردى.
ايتا كەتەيىك, كوميسسيا مۇشەلەرىنىڭ قاتارىندا م.اشىمباەۆ, م.اۋەزوۆ, ت.جۇرتباي, ق.مىڭباي, د.جولجاقسىنوۆ, ب.ۋاليەۆ, ت.قاجىباەۆ, م.مانسۇروۆ پەن ز.كابىلدينوۆ سىندى بىرقاتار قوعام قايراتكەرلەرى بار.
