– مەن جاقىندا تالدىقورعانعا ارنايى بارىپ, وبلىس اكىمى اماندىق باتالوۆتىڭ ەسەپ بەرۋ جيىنىنا قاتىسقان ەدىم. جينالىستان سوڭ ارنايى ءسوز سۇراپ, سىن ساعاتتا ارىس حالقىنىڭ قيىندىعىن ءبولىسىپ, جانىمىزدان تابىلعان, قيراعان ءۇي-جايىمىزدى قالپىنا كەلتىرۋگە كومەك بەرگەن جەتىسۋ جۇرتىنا, اكىمشىلىك قىزمەتكەرلەرگە, قۇرىلىسشىلارعا راحمەتىمدى ايتتىم. العىس ايتۋ كۇنىنە وراي جەرلەستەرىمنىڭ اتىنان سىزدەردىڭ گازەت ارقىلى تاعى دا ريزاشىلىعىمىزدى جەتكىزگىمىز كەلەدى, – دەيدى ارىس قالاسىنىڭ تۇرعىنى روزا ءابدىراحمانوۆا.
وتكەن جىلى ارىس قالاسىندا ورنالاسقان اسكەري قارۋ-جاراق قويماسىندا جارىلىس بولىپ, بەيبىت تۇرعىندار زارداپ شەككەن-ءدى. كوپتەگەن ءۇي قيراپ, مىڭداعان ادام باسپاناسىز قالدى. ارىس تراگەدياسىنىڭ سالدارىن جويۋعا تۇتاس قازاقستان جۇرتى جۇمىلىپ, مەملەكەت تاراپىنان ارنايى شارا قابىلدانعان ەدى. قالاداعى قيراعان ۇيلەردى جوندەۋگە ەلىمىزدىڭ بارلىق ايماعى كىرىسىپ, وبلىس اكىمدىكتەردى ءار اۋماق بويىنشا جاۋاپتى بولدى. قالىپقا كەلتىرۋ جۇمىستارىنا الماتى وبلىسى دا بەل شەشە كىرىسىپ, قۇرىلىسقا قارقىن قوستى.
– ارىس وقيعاسى جەتىسۋ حالقىنىڭ دا قابىرعاسىن قايىستىردى. تۇرعىندار زارداپ شەككەن ادامدارعا ەرىكتى تۇردە كومەك كورسەتۋدى قولعا الىپ, ازىق-تۇلىك, كيىم-كەشەك, قۇرىلىسقا قاجەتتى زاتتار جيناۋدى ۇيىمداستىرىپ, اقشالاي دا كومەك بەرۋگە كىرىستى. وبلىستان بىرنەشە رەت قايىرىمدىلىق كەرۋەنى جاساقتالىپ, ارىسقا جونەلتىلدى. مۇنىڭ ءبارى قازاق حالقىنىڭ قيىندىقتى بىرگە جەڭۋگە جۇمىلاتىن اۋىزبىرلىگىن كورسەتتى. ال مەملەكەت باسشىسى قاسىم-جومارت توقاەۆ ارىس قالاسىنا ارنايى بارىپ, تۇرعىندارمەن كەزدەستى. وسى جولى زاقىمدانعان ءۇي مەن عيماراتتاردى تولىق جوندەۋگە تاپسىرما بەردى. بۇل اۋىرتپالىقتى ءار وبلىس كوتەرەتىن بولدى. قالانى جەكەلەگەن سەكتورعا ءبولىپ قالىپقا كەلتىرۋدىڭ جولىن ايتتى. الماتى وبلىسىنىڭ ۇلەسىنە 15 ۋچاسكە ءتيدى. ءبىز قالىپقا كەلتىرۋ جۇمىسىن جەدەل باستادىق. سونداي-اق ارىس مەكتەپتەرىندە وقيتىن 150 بالانى جەتىسۋدىڭ تابيعاتى تاماشا شيپاجايلارىندا تەگىن دەمالۋعا شاقىرىپ, جازعى كانيكۋلدى قىزىقتى وتكىزۋگە كۇش سالدىق, – دەپ ەسكە الادى بۇل تۋرالى وبلىس اكىمى اماندىق باتالوۆ.
بىلتىر ارىس قالاسىن قالپىنا كەلتىرۋگە الماتى وبلىسىنىڭ بيۋدجەتىنەن 1 ملرد 393 ملن تەڭگە بولىنگەن ەكەن. بۇدان بولەك ەل ۇكىمەتىنىڭ قوسالقى قورىنان بولىنگەن 1 ملرد تەڭگە قارجىنى دا وبلىستىڭ قۇرىلىس كومپانيالارى يگەرىپ, قالپىنا كەلتىرۋ جۇمىستارىنا جۇمسادى. جەتىسۋلىق قۇرىلىسشىلار جوندەۋ جۇمىستارىن تولىق اياقتاپ, تۇرعىن ءۇي مەن عيماراتتاردى كورسەتىلگەن مەرزىمدە پايدالانۋعا بەردى. ياعني, 802 جەكە باسپانا تولىقتاي جاڭعىرتىلىپ, 18 تۇرعىن ءۇيدىڭ قۇرىلىسى دەر كەزىندە ءبىتتى.
– وتكەن جىلدىڭ 24 ماۋسىمى – ارىستىقتاردىڭ باسىنا اۋىر قايعى تۇسكەن كۇن رەتىندە ەسىمىزدە قالدى. ورىن العان توتەنشە جاعداي حالقىمىزدىڭ قابىرعاسىن قايىستىردى. مەملەكەت باسشىسى قاسىم-جومارت توقاەۆ ارنايى كەلىپ, قازاقستاندىقتاردى ارىسقا كومەك قولىن سوزىپ, قالانى قالپىنا كەلتىرۋگە شاقىردى. وسىدان كەيىن ەلىمىزدىڭ تۇكپىر-تۇكپىرىنەن ارىسقا كومەك اعىلدى. قالانى قالپىنا كەلتىرۋدىڭ جوسپارى جاسالىپ, تۇراتىن اۋماعىمىز 17 بولىككە ءبولىندى. سولاردىڭ ىشىندەگى تۇرعىن ۇيلەرى, الەۋمەتتىك, كوممەرتسيالىق نىساندارى كوپ, ادامدار تىعىز ورنالاسقان ءبىز تۇرعان اۋماقتى قالپىنا كەلتىرۋ مىندەتى الماتى وبلىسىنا بەرىلدى. جەتىسۋلىقتارعا ءدان ريزامىز. وبلىس اكىمىنىڭ ءبىرىنشى ورىنباسارى ءلاززات تۇرلاشەۆ باستاعان توپ جاز بويى ارىستا, قۇرىلىس باسىندا ءجۇردى. اماندىق باتالوۆتىڭ ءوزى دە بىرنەشە رەت كەلىپ, جۇمىستى كوردى. ءبىز كۇن سۋىعانعا دەيىن باسپانامىز جوندەلسە دەگەن تىلەكپەن جۇردىك. راحمەت, جەتىسۋلىقتار ازامات ەكەن. ارادا بىرنەشە اي وتپەي قالا قالپىنا كەلىپ, ۇيلەرىمىز جوندەلدى, كەيبىرى جاڭادان سالىندى. 2020 جىلدى سول جاڭا ۇيىمىزدە قارسى الدىق. جەتىسۋ جۇرتىنان اينالايىن, – دەيدى ارىس قالاسىنىڭ تۇرعىنى روزا ءابدىراحمانوۆا.
