ءبىز بۇل كۇنى وزەگىمىزدەن تەپپەي, باسىمىزدى ءوز شاڭىراعىنىڭ استىنا بىرىكتىرىپ, قاناتىمەن سۋ سەپكەن قارلىعاشتاي قامقورلىعىنا العانى ءۇشىن قازاق ەلىنە العىس ايتامىز. قيىن-قىستاۋ ۋاقىتتا ءبىر ءتىلىم نانىمەن ءبولىسىپ, سۇيەۋ بولعان قازاعىمىزدىڭ جەرىندە سول دوستىق, سول كەلىسىم مەن بەيبىتشىلىك ساقتالىپ كەلەدى. قازاق جەرى – ءبىزدىڭ وتانىمىز.
ادامگەرشىلىك قارىم-قاتىناستىڭ ۇلگىسىنە اينالعان بۇل ايشىقتى مەرەكە – قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆتىڭ جارلىعىمەن قازاقستان حالقى اسسامبلەياسىنىڭ قۇرىلعان كۇنىمەن سايكەس مەرەكەلەنەدى. ەلىمىزدە تۇراتىن ەتنوستار بۇل ايتۋلى كۇننىڭ ءمان-ماڭىزىن وتە جاقسى بىلەدى ءارى قۇرمەتتەيدى. ستاليندىك رەجىم كەزىندەگى جىلداردا 800 مىڭعا جۋىق نەمىس, 100 مىڭ پولياك, سولتۇستىك كاۆكاز حالىقتارىنىڭ 550 مىڭ وكىلى, قيىر شىعىستاعى 18 مىڭ كورەي وتباسى قازاقستانعا قونىس اۋدارعان. ۆاگوندارعا تيەلىپ, ايدالاعا اكەلىنىپ تاستالعان ولار قازاق وتباسىلارىنان پانا تاپتى. وزبىر ساياساتتان زوبالاڭ كورىپ, جاپا شەككەن ءتۇرلى ەتنوستار قازاق ەلىنە وسىلايشا ءسىڭىسىپ كەتتى.
«وتانىن ساتقانداردىڭ جۇبايلارى» قاتارىندا بولعان گەرترۋدا پلاتايستىڭ ەستەلىگىنىڭ جەلىسىمەن جازىلعان «قۇرت – قاسيەتتى تاس» وقيعاسىن بارشامىز جاقسى بىلەمىز. دارۋمەنگە باي, اشىققانعا قورەك, اش-جالاڭاش بالا-شاعا مەن تورىققان ايەلدەرگە تالشىق بولعان قازاقتىڭ ۇلتتىق تاعامى قۇرت – شىنىندا دا قاسيەتتى.
ۇلتتار مەن ۇلىستاردىڭ تاتۋلىعى مەن بىرلىگىن جاڭا دەڭگەيگە كوتەرگەن ەرەكشە مەرەكە رەسپۋبليكا بويىنشا, ءار وڭىردە ءداستۇرلى تۇردە اتالىپ وتىلەدى. بۇل ايتۋلى كۇننىڭ نەگىزى ء«وز تاريحىڭدى ۇمىتپا جانە ونى ماقتان ەت» دەپ اتالادى. اق پەيىل, ادال كوڭىل قازاق ەلى باۋىرمالدىعىنان ەش تانعان ەمەس. ەلباسىنىڭ باستاماسىمەن ومىرگە كەلگەن بۇل مەرەكەنىڭ سيپاتى دا سول. بۇل مەرەكە بىزگە وسى تۇرعىدان اسا قىمبات. ەلوردامىزدىڭ 20 جىلدىعىنا وراي, قاراعاندى وبلىسى بيىكتىگى 14 مەتر «قازاق ەلىنە مىڭ العىس» مونۋمەنتىن سىيعا تارتقان بولاتىن. وندا كورەي, كاۆكاز, ورىس بالالارىن باۋىرىنا باسقان قازاق ايەلىنىڭ ءمۇسىنى ورناتىلعان. مونۋمەنتتىڭ اشىلۋ سالتاناتىندا تۇڭعىش پرەزيدەنت نۇرسۇلتان نازارباەۆ قازاقستان تاريحىنداعى حالىق جادىندا ساقتالعان قيلى كەزەڭدەردىڭ ماڭىزدىلىعىنا توقتالعان بولاتىن. «جاقسىلىقتى باعالاي ءبىلىپ, وعان جاقسىلىقپەن جاۋاپ قايتارۋ ءوزارا سىيلاستىق پەن قۇرمەتكە باستايدى. قۇندىلىقتاردىڭ قادىرىنە جەتە العان ەلدىڭ كەلەشەگى كەمەل», دەگەن ەدى.
بۇگىندە قازاقستان حالقى اسسامبلەياسى سان الۋان ەتنوستاردى ازاماتتىق تۇرعىدا توپتاستىرعان قۋاتتى قۇرالداردىڭ ءبىرى. جالپى العاندا, ءوز قىزمەتىنىڭ العاشقى كۇندەرىنەن باستاپ قازاقستان حالقى اسسامبلەياسى ەلىمىزدەگى ەتنوستاردىڭ مادەنيەتىنىڭ قايتا جاڭعىرۋى مەن دامۋىنا ەلەۋلى ۇلەس قوسىپ كەلەدى. كۇردەلى زاماندى يىق تىرەسە بىرگە ەڭسەرىپ, تاۋەلسىز قازاقستاندى قۇرۋ جولىندا ايانباي تەر توككەن ەلىمىزدىڭ بارلىق ازاماتتىنىڭ ءبىر-بىرىنە قۇرمەت بىلدىرەتىن كۇنى قۇتتى بولسىن! قازاق ەلىنە مىڭ العىس!
ۋۆايس دجاناەۆ,
قازاقستان حالقى اسسامبلەياسى توراعاسىنىڭ ورىنباسارى,
«ۆايناح» چەشەن-ينگۋش ەتنومادەني بىرلەستىگىنىڭ توراعاسى
قاراعاندى وبلىسى
