كىبىسە جىلىنىڭ پايدا بولۋى ەجەلگى مىسىردان باستاۋ العان. وسى ەلدىڭ عالىمى سوتيس سوناۋ جىلداردىڭ وزىندە «سۇمبىلە» ەڭ جارىق جۇلدىزىن ءبىراز ۋاقىت زەرتتەگەن. ونىڭ تاڭەرتەڭگىلىك وڭتۇستىك كوكجيەكتەن كورىنۋىنەن باستاپ, ءار جىلدىڭ 365 كۇننەن تۇراتىنىن انىقتاعان. ال ءسوتيستىڭ سۇمبىلە جۇلدىزىن زەرتتەۋى كوكتەم كەزىندە اعىل-تەگىل تاسيتىن نىل وزەنى سۋىنىڭ شارۋالاردىڭ ۇلكەن ەڭبەكپەن ەككەن ەگىستىك القاپتارىن شايىپ كەتۋىنە بايلانىستى بولدى. وسىلايشا, جۇلدىزداردىڭ جاي-كۇيىن تەرەڭ زەرتتەگەن ەگيپەتتىك عالىمدار كۇندەردى جاڭىلماي ساناي وتىرىپ, حالىققا سۇمبىلەنىڭ تۋاتىن مەزگىلىن دەر كەزىندە ەسكەرتىپ ءجۇردى.
وسىنداي ساناقتىڭ ناتيجەسىندە ءوزىمىز بۇگىنگى كۇنى قولدانىلىپ جۇرگەن كۇنتىزبە پايدا بولدى. ءسويتىپ, عالىمدار كۇن مەن ءتۇننىڭ تەڭەلۋ ۋاقىتىنىڭ اراسىن جىل دەپ اتادى. جىلدىڭ ءتورت مەزگىلىن اڭعارىپ, ءبىر جىلدى جىلدىڭ مەزگىلدەرىنە سايكەس تورتكە ءبولدى. بۇعان قوسا, عالىمدار وزدەرىنىڭ زەرتتەۋىندە ءار ءۇش جىلدىڭ 365 كۇنگە اياقتالىپ, ال ءاربىر ءتورتىنشى جىلدىڭ كۇن سانى الداعى ءۇش جىلدا ءبىر كۇننىڭ ارتىق قالۋى سالدارىنان 366 كۇنگە تولاتىنىن دالمە-ءدال ەسەپتەپ شىعاردى. مىنە, وسىدان كەلىپ, سلاۆياندار «ۆيسوكوسنىي», ال مۇسىلمان ەلدەرى «كىبىسە جىل» دەپ اتايتىن جىل پايدا بولدى. ال ءتورت جىلدا ءبىر رەت قايتالانىپ كەلەتىن باسى ارتىق ءبىر كۇن اقپان ايىنىڭ ۇلەسىنە ءتيدى. وسىلاي كىبىسە جىلى پايدا بولدى.
