تامىزدىڭ 15-ءى كۇنى قاراساي اۋداندىق سوتىنىڭ سۋدياسى ەركىن سەيىتوۆ الماتى وبلىسىنىڭ قاسكەلەڭ قالاسىندا 27 جاستاعى دميتري ءجابيندى «تاستىبۇلاق كەنتىنىڭ تۇرعىنى, ەكولوگ نۇرلان وتەۋليەۆتى ءولتىردى» دەپ, 10 جىلعا تۇرمەگە كەستى.
«جەكە باس ارازدىعىمىز بولعان»
سوت بولجامى بويىنشا (ايىپتاۋشى تاراپتىڭ بولجامىمەن سايكەس كەلەدى), دميتري جابين بيزنەسكە بايلانىستى جەكە باس ارازدىعىنان بولەسى نۇرلان وتەۋليەۆتى قاساقانا ولتىرگەن.
دميتري جابين نۇرلان وتەۋليەۆتى مىلتىقپەن اتقانىن ايتتى. قىلمىسىن ءوزى كەلىپ مويىنداپ, تۇسىنىك بەرىپ, تەرگەۋگە كومەكتەسكەن دميتري جابين «قاساقانا ءولتىردىم» دەگەن سوزىنەن تانبادى. ول سوڭعى سوزىندە ايىبىن مويىندايتىنىن, ىستەگەن قىلمىسىنا قاتتى وكىنەتىنىن مالىمدەدى.
نۇرلان وتەۋليەۆتىڭ اناسى, جابىرلەنۋشى مانات وتەۋليەۆا «جەڭىل جازا بەردى» دەپ, سوت ۇكىمىمەن كەلىسپەيدى. ونىڭ ۇكىمدى قايتا قاراۋ جونىندە شاعىم بەرەر-
بەرمەسى ءالى بەلگىسىز. « ۇلىمدى دميتري جابين جالعىز ولتىرگەن جوق, مۇنىڭ ارتىندا باسقا ادامدار دا بار» دەپ پايىمدايدى مانات وتەۋليەۆا.
– قىلمىسقا قاتىستى باسقا ادامدار بارى انىق, بىراق ولاردى جاسىرىپ وتىر, – دەيدى مارقۇمنىڭ اناسى جۋرناليستەرگە.
سوتتالۋشىنىڭ ادۆوكاتى ايناگۇل كوشكىنوۆا دميتري ءجابيننىڭ «پوليتسياعا ءوزى كەلىپ, ابايسىزدا كىسى ولتىرگەنىن شىن كوڭىلدەن مويىنداعانىن, تەرگەۋ جۇمىسىنا بارىنشا كومەكتەسكەنىن», بۇرىن سوتتالماعانىن, قاراۋىندا ەكىنشى توپ مۇگەدەگى ءارى جۇيكەسى سىرقات اناسى بارىن ەسكەرىپ, سوتتان ونىڭ جازاسىن جەڭىلدەتۋدى سۇرادى.
دميتري ءجابيننىڭ اعاسى مۇرات داداباەۆ جۋرناليستەرگە «قورعاۋشى تاراپ ۇكىمگە قاتىستى شاعىم بەرۋ تۋرالى ءالى شەشىمگە كەلمەگەنىن» ايتتى.
نۇرلان وتەۋليەۆتىڭ سوڭىندا جۇبايى مەن 10 جاسار ۇلى قالدى. ونىڭ اناسى مانات وتەۋليەۆا – مۇگەدەكتىگى بويىنشا زەينەتكە شىققان ادام. ول كىسىنىڭ قاراۋىندا مۇگەدەك ەرەسەك ەكى بالاسى بار.
بەلسەندىلەر كۇرەسى
الماتى وبلىسى قاراساي اۋدانى تاستىبۇلاق كەنتىنىڭ تۇرعىنى, «تابيعات» ەكولوگيالىق قوزعالىسىنىڭ بەلسەندىسى نۇرلان وتەۋليەۆتىڭ دەنەسى بيىل 10 ناۋرىز كۇنى الماتىعا جاقىن ماڭنان, الاتاۋ بوكتەرىنەن تابىلعان ەدى.
نۇرلان وتەۋليەۆ كوز جۇمارىنان ءبىر اپتا بۇرىن كەنت باعىندا عاسىرلار بويى ءوسىپ تۇرعان اعاشتاردى كەسۋگە قارسى شىققان. مۇنداي جانجالدار بۇرىن دا بولعان.
«تابيعات» ەكولوگيالىق قوزعالىسى بەلسەندىلەرىنىڭ تاستىبۇلاق باعىنداعى اعاشتاردى كەسۋگە قارسى كۇرەسىپ كەلە جاتقانىنا ءتورت جىل بولدى. الماتى
تۇبىندەگى كورىكتى جەردە ورنالاسقان باقتاعى توعايدى وتاۋ تۋرالى داۋ جايىندا جەرگىلىكتى اقپارات قۇرالدارى بىرنەشە رەت جازعان. باسپاسوزدە كوتەرىلگەن شۋدان كەيىن بيلىك عاسىرلار بويى ءوسىپ تۇرعان اعاشتاردى كەسۋدى زاڭسىز دەپ تاۋىپ, ول ءىس بىرازعا دەيىن توقتاتىلعان.
اۋىلدىڭ بەلسەندى تۇرعىندارى توعايدى ساقتاۋ ءۇشىن ازاماتتىق بەلسەندىلەرگە اينالىپ, ساياساتكەر مەلس ەلەۋسىزوۆ باسقاراتىن ەكولوگيالىق قوزعالىسقا كىردى. باسپاسوزدە «ساتىلىپ كەتكەن جەرلەردە ەجەلگى ساق قورعاندارى بار ەكەن» دەگەن حابارلار دا شىقتى. الاتاۋدىڭ ەتەگىندەگى تاستىبۇلاق كەنتى الماتى قالاسىنىڭ جوعارعى بولىگىمەن شەكتەسەدى.
نۇرلان وتەۋليەۆتىڭ ءولىمى الماتى قالاسى مەن وبلىسىندا ەليتالىق تۇرعىن ءۇي سالۋ ءۇشىن قورىقتىق جەرلەردى جويۋ ارەكەتىنە قارسى بەلسەندىلەردىڭ نارازىلىعىن تۋدىردى. وتەۋليەۆتىڭ ج
