مىسىردا «مۇسىلمان باۋىرلار» قوزعالىسىنىڭ بەلسەندىلەرى كايردەگى رامزەس الاڭىنا جينالىپ, ءداستۇرلى جۇما كۇنگى «كۇشتى كورسەتۋ» ءراسىمىن جاساۋعا شاقىردى. بۇل تۋرالى رەسەيدىڭ نتۆ تەلەارناسى حابارلادى
«وسىعان قاراعاندا, مىسىرلىق ەرەۋىلشىلەر ەلدەگى قاندى بۇلعاقتى توقتاتۋعا اسىعا قويمايتىن سياقتى. بۇل جولى ەلدىڭ بۇرىنعى پرەزيدەنتى مۋحاممەد ءمۋرسيدى تۇرمەدەن بوساتۋدى تالاپ ەتۋشى «مۇسىلمان باۋىرلار» قوزعالىسىنىڭ مۇشەلەرى جۇرتتى جاڭا ۇرىس قيمىلدارىنا شاقىرىپ وتىرعانى بەلگىلى بولىپ قالدى», - دەلىنگەن وندا.
بەلسەندىلەر كايردىڭ رامزەس الاڭىنا جينالىپ, ءوز كۇشتەرىنىڭ قانشالىقتى الەۋەتتى ەكەنىن كورەتپەكشى. ءسويتىپ, بۇل كۇندى «اشۋ تانىتقان جۇما» رەتىندە ەستە قالدىرۋعا كۇش سالۋدا.
ەسكە سالا كەتەيىك, مىسىرداعى جاپپاي تارتىپسىزدىكتەر مەن قاقتىعىستار 14 تامىزدا اسكەريلەردىڭ ءمۋرسيدى قولداۋشى يسلاميستەردىڭ – «مۇسىلمان باۋىرلار» قوزعالىسى قارسىلىق كورسەتۋشى لاگەرىن قۋىپ تاراتقانىنان كەيىن باستالدى. سول كۇنى, دەنساۋلىق ساقتاۋ مينيسترلىگىنىڭ مالىمەتى بويىنشا, 525 ادام قازا تاۋىپ, 4 مىڭعا جۋىق ادام جاراقات الدى.
سۇلتان بوزايعىر.
