ءىس-شارانىڭ ماقساتى – گولبول سپورت ءتۇرىن كوپشىلىككە تانىتۋ. جارىس كوماندالارعا حالىقارالىق ارەناعا شىعۋعا مۇمكىندىك بەرەدى. قازاقستاندا گولبولدان 2017 جىلدان بەرى 3 چەمپيونات ءوتتى.
گولبولدان قازاقستان كۋبوگىنىڭ ناتيجەلەرى:
1 ورىن – «Abay» كومانداسى (الماتى قالاسى)
2 ورىن – الماتى وبلىسىنىڭ كومانداسى
3 ورىن – جامبىل وبلىسىنىڭ كومانداسى
جاستار اراسىنداعى كۋبوگتى تۇركىستان وبلىسىنىڭ«ءۇمىت» كومانداسى جەڭىپ الدى. «جەڭىسكە دەگەن جىگەرى ءۇشىن» اتىراۋ وبلىسىنىڭ كومانداسى ماراپاتتالدى.
«گولبول ءۇشىن بۇل ۇلكەن قادام. ەگەر ءبىز چەمپيوناتتارمەن كۋبوكتار سياقتى كوپتەگەن جارىستاردى كوپ وتكىزسەك, وندا ارينە, ويىن دەڭگەيى كوتەرىلەدى. سونىمەن قاتار,وسىلايشا گولبولعا جاڭا ادامداردى تارتامىز. قازىر گولبولدى ەلىمىزدىڭ 9 وڭىرىندە وينايدى. بۇل كۋبوكتا ءبىز مىقتى جىگىتتەردى بايقادىق, ەندى ولاردى وقۋ-جاتتىعۋ جيىندارىنا شاقىرامىز», - دەدى گولبول فەدەراتسياسىنىڭ پرەزيدەنتى مۋسريات ەليباكيەۆ.
ۇلتتىق پاراليمپيادالىق قۇرامانىڭ وقۋ-جاتتىعۋ جيىندارى نۇر-سۇلتان قالاسىندا ناۋرىزدىڭ اياعىندا وتەدى.
گولبول – كوز مۇشەسى زاقىمدالعان ادامدارعا ارنالعان ويىن. بۇل سپورت ءتۇرى پاراليمپيادا ويىندارىنىڭ باعدارلاماسىنا ەنگىزىلگەن. ونى ەكىنشى دۇنيەجۇزىلىك سوعىستان كەيىن كوزى كورمەيتىن مۇگەدەكتەردى وڭالتۋ ءۇشىن ويلاپ تابىلعان. ويىن العاش رەت الەمگە 1976 جىلى تورونتوداعى پاراليمپيادا ويىندارىندا تانىستىرىلدى.
