وسكەمەن قالاسى تۇرعىنىنىڭ دەپوزيتتىك ەسەپشوتىنان الاياقتار 44 مىڭ اقش دوللارىن سىپىرىپ العان. بۇل تۋرالى وبلىستىق ىشكى ىستەر دەپارتامەنتى ءباسپاسوز قىزمەتىنىڭ مالىمەتىنە سىلتەمە جاساعان اltaynews.kz حابارلادى.
وقيعا بىلاي بولعان. شىلدە ايىنىڭ سوڭىندا وسكەمەندىك س. ەلەنادان پوليتسياعا دەپوزيتتىك ەسەپشوتىنان قوماقتى قاراجاتىن شەشىپ العان بەلگىسىز تۇلعالارعا قاتىستى قىلمىستىق ءىس قوزعاۋ جايىندا ءوتىنىش تۇسەدى. كەلىنشەك جازدىڭ باسىندا پاتەرىن ساتىپ, ودان تۇسكەن اقشانى دەپوزيتكە سالىپ قويۋدى ۇيعارعان ەكەن. بانكتىڭ قىزمەتكەرلەرى وعان سالىمشى بولۋعا كومەكتەسەدى. زارداپ شەگۋشى بانكتەگى دەپوزيتىن بىرنەشە رەت تولتىرىپتى.
«بانككە تاعى ءبىر كەلگەنىندە كەلىنشەك بانك قىزمەتكەرلەرىنەن ءوزىنىڭ قاراجاتى تۋرالى چەك باسىپ بەرۋلەرىن وتىنەدى. الايدا, باعدارلاما ايەلدىڭ ەسەپشوتىندا قاراجات جوق ەكەنىن كورسەتكەن. باسىندا مەنەدجەرلەر ونى جۇباتىپ, باعدارلامانىڭ كەيدە جۇمىس ىستەمەي قالاتىنىن ايتقان. بىراق ولار قانشا تەكسەرگەندەرىمەن, ەسەپشوتتا اقشا بولماي شىعادى. ايەل سودان كەيىن پوليتسياعا شاعىمداندى», - دەلىنگەن حابارلامادا.
پوليتسيا زارداپ شەگۋشىنىڭ سوزدەرىنە وراي قىلمىستى جاساۋشىلاردى دا تەز تاۋىپ الادى.
كەيىن بەلگىلى بولعانداي, ەلەنانىڭ ەسەپشوتىنان قاراجاتتى 23 جانە 22 جاستاعى جىگىت پەن قىز الىپ العان. قازىر ەكەۋى دە ۇستالدى.
«قولعا تۇسكەن س. - بانكتىڭ قىزمەتكەرى. ول باعدارلامالارعا ەركىن كىرەتىندىكتەن, كارتا ەسەپشوتىن دايىنداپ الادى. سول ارقىلى دەپوزيتتەن اقشا الىپ وتىرعان. قازىر كۇدىكتىلەر ۇستالىپ, ۋاقىتشا قاماۋعا الىندى. تەرگەۋ امالدارى ءجۇرىپ جاتىر», - دەدى ءباسپاسوز قىزمەتىندەگىلەر.
قۇرىش نۇرىمبەت.
