مەديتسينا • 28 اقپان، 2020

ماڭعىستاۋداعى بالالار اۋرۋحاناسىنا سوڭعى ۇلگىدەگى ءۇش اپپارات بەرىلدى

32 رەتكورسەتىلدى

«توتال ە ەند پ دۋنگا گمبح» جشس ەسەبىنەن ماڭعىستاۋ وبلىستىق كوپبەيىندى بالالار اۋرۋحاناسىنا «Hamilton G5» وكپەنى جاساندى جەلدەتۋ اپپاراتى، رەنتگەندىك دياگنوستيكالىق «س-دۋگا Ares MR» جانە «4ك مەن 3D» فورماتىنداعى لاپاروسكوپيالىق حيرۋرگياعا قاجەتتى بەينەكەشەنى سىيعا تارتۋ ەتىلدى. بۇل تۋرالى ماڭعىستاۋ وبلىسى دەنساۋلىق ساقتاۋ باسقارماسىنىڭ ءباسپاسوز قىزمەتى حابارلادى.

ءوڭىردىڭ كىشكەنتاي تۇرعىندارىنىڭ دەنساۋلىعىن قورعاۋدا وبلىستىق كوپبەيىندى بالالار اۋرۋحاناسى ستاتسيونارلىق كومەك كورسەتەتىن بىردەن-ءبىر اۋرۋحانا بولىپ تابىلادى. سوناۋ 1978 جىلى اشىلىپ، كازىرگى تاڭدا 205 كەرەۋەتتەن قۇرالعان، ونىڭ ىشىندە جاڭادان تۋىلعان نارەستەلەر پاتولوگياسى، جۇيكە-جۇيەسى، پەدياتريا، حيرۋرگيا، تراۆماتولوگيا-ورتوپەديا، وتورينولارينگولوگيا، جۇقپالى اۋرۋلار جانە جان ساقتاۋ بولىمدەرى قىزمەت كورسەتەدى.

سونىمەن قاتار 1 جاسقا تولماعان سابيدەن باستاپ 18 جاس ارالىعىنداعى ءجاسوسپىرىم بالالارعا ءارتۇرلى  دەڭگەيدە كۇردەلى وتالار جاسالىنادى. جىلىنا اۋرۋحاناعا 10 000-نىڭ  ۇستىندە بالالار جاتقىزىلىپ، ءتۇرلى ەم-دوم الادى. اقتاۋ مەن جاڭاوزەن قالالارى، سونىمەن قاتار بەينەۋ، قاراقيا، تۇپقاراعان، ماڭعىستاۋ جانە مۇنايلى اۋداندارىنىڭ تۇرعىندارىنا كونسۋلتاتيۆتىك-دياگنوستيكالىق كومەكتەر كورسەتىلەدى. شتات بويىنشا اۋرۋحانادا 49 دارىگەر، 150 ورتا مەديتسينا قىزمەتكەرلەرى جۇمىس ىستەيدى. وسىلاردىڭ ىشىندە 15 دارىگەر جوعارى ساناتتى، 5 ءبىرىنشى، 5 ەكىنشى ساناتتى دارىگەرلەر بولىپ تابىلادى. 2018-2019 جىلدارى اۋرۋحاناعا 15 جاس مامان جۇمىسقا قابىلدانعان.

-بۇل اپپاراتتاردىڭ قاجەتتىلىگى وتە ماڭىزدى. ماسەلەن لاپوروسكوپيالىق تىرەۋىش دەگەنىمىز ينۆازيالىق وتا جاساۋعا، ونىڭ ىشىندە بالالاردىڭ ىشكى قۇرىلىستارىنا وتا جاساۋ كەزىندە تاپتىرماس قۇرىلعى. ونىڭ ۇستىنە بۇل سوڭعى ۇلگىدەگى مودەل. قازىرگى تاڭدا ءبىزدىڭ ماماندار وسى اپپاراتۋرالارمەن جۇمىستى باستاپ كەتتى. ەكىنشى اپپارات «س-دۋگا Ares MR» بۇل تراۆماتولوگيالىق اۋرۋلارعا كورسەتەتىن كومەكتىڭ دەڭگەيىنىڭ جوعارىلاۋىنا ۇلكەن سەپتىگىن تيگىزەدى. ال ءۇشىنشىسى «Hamilton G5»، بۇل دا سوڭعى ۇلگىدە شىققان. قازىرگى كەزدە بىزدە رەانيماتسيالىق بولىمشەدە جاتقان ناۋقاستارعا اۋاداي قاجەت. جىلىنا 600-دەن استام ناۋقاس بالالار ەم الادى، ونىڭ 40 % 1 جاسقا دەيىنگى بالالار، ولاردىڭ ىشىندە وتە اۋىر جاعدايدا تۇسەتىندەر از ەمەس. سولارعا كومەك كورسەتۋ دەڭگەيى جوعارىلاي تۇسەدى دەپ سەنەمىز. بۇرىنعى اپپاراتتار بار، بىراق ولاردىڭ دەنى ەسكىرگەن، دەدى ماڭعىستاۋ وبلىستىق كوپبەيىندى بالالار اۋرۋحاناسىنىڭ ديرەكتورى امانبەك جۇمىروۆ.

دەمەۋشىلىك كورسەتۋ ارقىلى ءوڭىردىڭ دەنساۋلىق ساقتاۋ سالاسىنىڭ جاقسارۋىنا ۇلەسىن قوسقان «توتال ە ەند پ دۋنگا گمبح» كومپانياسىنىڭ وكىلدەرىنە ماڭعىستاۋ وبلىستىق دەنساۋلىق ساقتاۋ باسقارماسىنىڭ باسشىسى ءانۋار ساعىمباەۆ تا العىسىن ايتتى.

ءوز كەزەگىندە ءسوز العان «توتال ە ەند پ دۋنگا گمبح» كومپانياسىنىڭ مەنەدجەرى شون لاركوم، ىنتىماقتاستىق ءالى دە جالعاساتىنىنا سەنىم ءبىلدىردى.

-ماڭعىستاۋ وڭىرىنە كومەكتەسۋگە ءاردايىم دايىنبىز، اسىرەسە اقتاۋ قالاسىنا. سەبەبى ءبىز مۇندا جۇمىس جاسايمىز. «دوڭعا» كەنورنى بويىنشا ءوزىمىزدىڭ ءونىمدى ءبولۋ جونىندەگى كەلىسىمدى ۇمىتپاي ءوزىمىزدىڭ مىندەتتەمەگە ۇلكەن جاۋاپكەرشىلىكپەن قارايمىز. 2002 جىلدان بەرى جۇمىسىمىزدى جالعاستىرىپ كەلەمىز، سونىمەن قاتار ءبىزدىڭ كەلىسىم 2039 جىلعا دەيىن ۇزارتىلعانىنا قۋانىشتىمىز. مەنىڭ ءوزىمنىڭ كىشكەنتاي بالالارىم بار جانە اقتاۋ شاھارىندا ءوسىپ كەلە جاتقان كىشكەنتاي تۇرعىنداردىڭ دەنساۋلىعى جاقسى بولسىن دەپ تىلەيمىن. بالالارعا قولداۋ ءبىلدىرۋ ۇلكەن جاۋاپكەرشىلىك دەپ بىلەمىز جانە بۇگىن سىيعا تارتۋ ەتىلگەن اپپاراتۋرالار راسىندا دا ۇلكەن پايداسىن تيگىزەتىنىنە سەنىمدىمىز، - دەدى ول.

شارا سوڭىندا كومپانيا وكىلدەرى، دەنساۋلىقتار ساقتاۋ باسقارماسى جانە وبلىس اكىمدىگىنىڭ وكىلدەرى ەستەلىك سۋرەتكە ءتۇسىپ، اراداعى ىنتىماقتاستىق ءالى دە نىعايا تۇسەرىنە سەنىم ءبىلدىرىپ تارقاستى.

سوڭعى جاڭالىقتار

ۇقساس جاڭالىقتار