باستان-اياق وقىپ شىققاننان كەيىن ۇلكەن اسەرگە بولەندىم. بۇل – عاجاپ كىتاپ. قازاق ادەبيەتىنىڭ سوڭعى جىلدارداعى دۇنيەگە كەلگەن ەلەۋلى شىعارمالارىنىڭ قاتارىنا جاتقىزۋعا بولاتىن سۇيەكتى تۋىندى. كىتاپ جازىلا باستاسىمەن ءتورت-بەس جىل ىشىندە ونىڭ بارلىق تاراۋلارى «Egemen Qazaqstan» گازەتى مەن رەسپۋبليكالىق وزگە گازەت-جۋرنالداردا تۇگەل دەرلىك جارىق كورگەنى جانە ولار جۇرتشىلىقتىڭ قىزىعۋشىلىعىن تۋعىزىپ, ىستىق ىقىلاسىنا بولەنگەنى ەسىمىزدە. جازىلۋ مانەرى دە ءساتتى, ۇتىمدى. ۇلى وتان سوعىسىنىڭ العاشقى جىلىندا-اق ورىستىڭ ۇلكەن جازۋشىسى الەكساندر بەكتىڭ ءوزىنىڭ دە, حالقىمىزدىڭ قاھارمان ۇلى باۋىرجان مومىش ۇلىنىڭ دا ەسىمىن الەمگە ايگىلەپ, اتاقتارىن شىعارعان «ۆولوكولامسك تاس جولى» رومانىنىڭ, سونداي-اق سوعىستان كەيىنگى جىلداردا تاعى دا سول باۋكەڭ تۋرالى «اڭىز بەن اقيقات» اتتى رومان جازعان ءازىلحان نۇرشايىقوۆ اعامىزدىڭ پايدالانعان ۇلگىسىمەن كەيىپكەرىمەن سۇحباتتاسا وتىرىپ, ءوزى جايلى وزىنە ايتقىزىپ, وتكەن عاسىرداعى, تاۋەلسىزدىك قارساڭىنداعى, ودان كەيىنگى جىلدارداعى ەلىمىزدىڭ باسىنان كەشىرگەن ءومىرىن, حال-احۋالىن, الۋان-الۋان وقيعالاردى شىنشىلدىقپەن كوز الدىڭا ەلەستەتەتىندەي ەتىپ بايانداعان ىلكىمدى, تارتىمدى تۋىندى.
روماننىڭ كەيىپكەرى كىم؟ ول – بارلىق سانالى عۇمىرىن ۇلت مۇددەسىن ۇلىقتاۋعا, ۇلتىمىزدىڭ جوعىن جوقتاۋعا, حالقىمىزدىڭ شىنايى تاريحىن قالپىنا كەلتىرۋگە, تاۋەلسىزدىگىمىزدى الار تۇستا, العاننان كەيىن «ەلباسى – بىرەۋ, قالعانىمىز – تىرەۋ» دەپ شەرحان مۇرتازا اعامىز ايتقانداي, ەلباسىنىڭ جانىنان تابىلىپ, سەنىمدى سەرىكتەرىنىڭ ءبىرى بولعان, سول كەزدە دە, ودان كەيىنگى جىلداردا دا قازاقستان ءوز تاۋەلسىزدىگىنىڭ ىرگەتاسىن بەكىتىپ, الەمگە ايگىلى, بەدەلدى مەملەكەتتەردىڭ ءبىرى بولۋىنا, ءوزىنىڭ ۇلتتىق كەلبەتىن, ءتىلىن, ءدىلىن, بابالاردان قالعان ۇلگى-ونەگە, داستۇرلەردى كەلەر ۇرپاقتارعا جەتكىزىپ, اماناتتاۋعا بويىنداعى بار قاسيەتىن, قاجىر-قايراتىن ايانباي جۇمساۋمەن كەلە جاتقان مىرزاتاي جولداسبەكوۆ اعامىز بۇگىنگى قالىڭ قازاقتىڭ قادىرلىسى, ابىز تۇلعا, ەل اعاسى.
روماننىڭ اۆتورى ب.بوداۋباي ەكەنىن جوعارىدا ايتتىم. 1959 جىلى بوتا تىرسەك بوزبالا كەزىندە, ون توعىز جاسىندا, ۋنيۆەرسيتەتتىڭ ءبىرىنشى كۋرسىندا وقىپ ءجۇرىپ سول كەزدەگى قالىڭ جۇرت قىزىعىپ وقيتىن «لەنينشىل جاس» گازەتىندە كوركەم شىعارمالاردا جانە باسپا بەتىندە قازاق ءتىلىنىڭ تازالىعى ساقتالۋعا ءتيىس دەگەن ىزگى نيەتپەن «بوتەن سوزبەن بىلعانسا ءسوز اراسى» دەگەن ماقالاسىن جاريالاپ, ۇلت جاناشىرلارىن قۋانتقانىمەن, سول كەزدەگى « ۇلى ورىسشىل» كوزقاراسقا كولەڭكە تۇسىرەدى دەگەن ايىپپەن ايقاي-شۋ, دۇربەلەڭ تۋعىزىپ, كپسس ورتالىق كوميتەتىنىڭ ورگانى «كوممۋنيست» جۋرنالىنىڭ بەتىنە دەيىن سىنعا ۇشىراعان, بىراق ستالين ولگەننەن كەيىنگى جىلىمىق كەز بولعاندىقتان وقۋدان شىعارىلماي, تۇرمەگە قامالماي امان قالعان بولات بوداۋباي (ول كەزدە بوداۋباەۆ, ارينە – اۆتور).
ەكىنشى كۋرستا وقىپ ءجۇرىپ «لەنينشىل جاس» گازەتىندە قۇرىلعان شتاتتان تىس ءبولىمدى باسقارىپ, ەلەۋلى-ەلەۋلى ماتەريالدار جاريالانۋىنا ۇيتقى بولدى. ۋنيۆەرسيتەت بىتىرمەي تۇرىپ قىزمەتكە الىندى. جاسى وتىزعا جەتپەي-اق «لەنينشىل جاس» گازەتى رەداكتورىنىڭ ورىنباسارى بولىپ, ءتورت جىل ىستەدى. ودان كەيىنگى قىزمەت ساپارى «سوتسياليستىك قازاقستان» گازەتىندە, قازاقستان كومپارتياسى ورتالىق كوميتەتىندە جالعاستى. رەسپۋبليكالىق «جالىن» باسپاسىن, «قازاقكىتاپ» كىتاپ تاراتۋ مەكەمەسىن, ەلارالىق «زامان – قازاقستان» گازەتىن, قازاقستان پارلامەنتى سەناتى اپپاراتىنىڭ رەداكتسيالىق – باسپا ءبولىمىن باسقاردى.
وسى جىلداردىڭ بارىندە قىزمەت اتقارا ءجۇرىپ, كوركەم شىعارمالار جازۋمەن اينالىستى. اڭگىمە, ەسسە, پوۆەستەردەن, روماننان تۇراتىن, كوپشىلىك جىلى قابىلداعان ونشاقتى كىتابى جارىق كوردى. زەينەتكەرلىككە شىققان سوڭ دا قاراپ جاتپاي, جۇرتشىلىققا ەكى بىردەي تاتىمدى رومان ۇسىندى. ونىڭ «تۇلعا» اتتى, حالقىمىزدىڭ مۋزىكا, ونەر, مادەنيەت سالاسىنداعى كورنەكتى قايراتكەرى, ەڭبەك ەرى ەركەعالي راحماديەۆ تۋرالى رومانىنا شىققان بويدا حالىقارالىق «الاش» ادەبي سىيلىعىنىڭ بەرىلۋى دە ادىلەتتى, زاڭدى ەدى. ەندى مىنە, ەلىمىزدىڭ ابىز تۇلعاسى مىرزاتاي جولداسبەكوۆ تۋرالى جازىلعان ەكى تومنان تۇراتىن جاڭا رومانى جارىققا شىعىپ, كوپشىلىكتىڭ كوزايىمىنا اينالىپ وتىر.
ەڭ الدىمەن ايتىلۋى ءتيىس نارسە – كىتاپتىڭ جەڭىل, جىلدام وقىلاتىنى. جالىقتىرمايدى. كوركەمدىك ساپاسى جوعارى. وقۋشىنىڭ قىزىعۋشىلىعى كەمىمەيدى, قايتا ونە بويى ارتىپ وتىرادى. روماننىڭ مازمۇنىن ءبىر-اق سويلەممەن تۇجىرىمداپ, جيناقتاپ ايتۋعا بولادى. اۆتور ەلىمىزدىڭ, قازاق حالقىنىڭ جيىرماسىنشى عاسىردىڭ ەكىنشى جارتىسى مەن جيىرما ءبىرىنشى عاسىردىڭ العاشقى جىلدارىنداعى باستان كەشكەن ەڭ ماڭىزدى, شيەلەنىستى وقيعالارىنىڭ, تاعدىرشەشتى ساتتەرىنىڭ شىنايى كورىنىستەرىن مولدىرەتىپ كوز الدىڭا جايىپ سالادى. وسى تۇرعىدان الىپ قاراعاندا روماندى كوركەم بەينەلەنگەن زامانا شەجىرەسى, تاۋەلسىزدىگىمىزدىڭ تۇنىپ تۇرعان تاريحى دەۋىمىزگە دە بولادى. سىر-سۇحباتقا قۇرىلعان رومان «ەرتە تارتىپ ات جالىن ەل دەپ ءوستىم, ەلىم باردا باقىتتان كەندە ەمەسپىن, كەرەگەسىن كەڭ جايىپ كوڭىلىمنىڭ, كەشكەن كۇندى قازاعىم مەن دە كەشتىم» دەيتىن كىتاپ كەيىپكەرى مىرزاتاي اعامىزدىڭ تۇرمىس تاۋقىمەتىن ەڭسەرە, قيىندىقتاردى كورە, كەدەرگىلەردى جەڭە ءجۇرىپ, ەلىمەن بىرگە ەسەيۋىنىڭ تارتىمدى, كوركەم, تۇشىمدى بايانى.
روماندى وقىپ وتىرعاندا ءار جىلدارداعى كەيىپكەر بەينەسى كوز الدىمىزعا ايقىن ەلەستەيدى. ۇيلەنگەن سوڭ قازگۋ-دە ساباق بەرىپ ءجۇرىپ, اسپيرانتتار تۇراتىن جاتاقحانانىڭ كىپ-كىشكەنتاي بولمەسىندە وتباسىمەن قىسىلىپ-قىمتىرىلىپ تۇرىپ جاتقان مىرزاتاي. دۇنيە-م ۇلىك دەگەننەن ءبىر توسەك, ءبىر شيفونەر عانا بار. كىرەبەرىسكە, ەسىكتى اشىپ قالعاندا ءۇيدىڭ ءىشى كورىنبەسىن دەپ, كولدەنەڭىنەن شيفونەردى قويىپ قويعان. تۇندە, توسەكتە – ەنەسى, قاسىندا ۇلكەن قىزى عايني جاتادى. ەدەندە كىشى قىزدارى ءاليانى ورتاعا الىپ مىرزاتاي مەن جەڭگەمىز ءماريا جاتادى. ەنەسىمەن ەرىپ كەلگەن اسقار اتتى جەتكىنشەك توسەكتىڭ استىنا جاتادى. باسقاشا جاتۋعا جاعدايلارى كەلمەيدى, سىيمايدى. سول جىلدارداعى قازاق ينتەلليگەنتسياسى وكىلدەرىنىڭ بارلىعىنىڭ باسىنان وتكەن ورتاق جاعداي...
ءبىزدىڭ قازاق ارۋاقتىڭ جەلەپ-جەبەيتىنىنە قاپىسىز سەنگەن حالىق. قازاق ادەبيەتى تاريحىنىڭ بىلگە قاعان, تونىكوك زامانىنان باستالاتىنىن عىلىمي تۇرعىدان بۇلتارتپاستاي ەتىپ دالەلدەگەن مىرزەكەڭنىڭ حالقىنا قىزمەت ەتۋ جولىندا بەلەستەن-بەلەسكە كوتەرىلۋىنە بابالار رۋحى كومەكتەسۋمەن كەلەدى دەگەن ويدامىز. ويتكەنى ول كىسى ديسسەرتاتسياسىن ءساتتى قورعاپ, قازاق ادەبيەتى تاريحىندا جاڭالىق اشقاننان كەيىن كوپ ۇزاماي قىزمەت بابىندا تاسى ورگە دومالاي بەردى. جانە ءبىر سۇيسىنەرلىگى, ول كىسى قايدا جۇرسە دە ۇلتىمىزدىڭ تاريحىن, ءان-جىرىن, ءبيىن, سالت-ءداستۇرىن ناسيحاتتاۋعا ەڭبەك ەتتى.
ماسەلەن, تالدىقورعان پەدينستيتۋتىن باسقارعان جىلدارى وقىتۋ ساپاسىن ارتتىرىپ, ستۋدەنتتەرگە ءبىلىم بەرىپ قانا قويماي, ەستەتيكالىق تاربيەنى, ۇلتىمىزدىڭ تاريحىنا, ءان-جىرىنا, بيىنە, سالت-داستۇرىنە دەگەن سۇيىسپەنشىلىك سەزىمدەرىن بويلارىنا ءسىڭىرۋ ءۇشىن سول كەزدە-اق ەلىمىزگە كەڭىنەن تانىمال بولعان «جەتىسۋ» ءانسامبلىن ۇيىمداستىردى, ءسويتىپ از عانا جىلدار ىشىندە ينستيتۋتتى ەلىمىزدەگى الدىڭعى قاتارلى وقۋ ورىندارىنىڭ بىرىنە اينالدىرىپ, كەڭەس وداعى بويىنشا اۋىسپالى قىزىل تۋدى جەڭىپ الدى.
تاۋەلسىزدىك وڭاي كەلگەن جوق. 1986 جىلعى جەلتوقسان كوتەرىلىسى, ودان كەيىنگى قازاقستاندى كولبين باسقارعان قارالى جىلدارداعى قابىلەتتى ستۋدەنتتەردى وقۋدان, كەۋدەسىندە نامىسى, وتى بار ۇلت كادرلارىن قىزمەتتەن قۋالاۋ, قۋدالاۋ, قازاقستانداعى مەملەكەتتىك ءتىلدىڭ ەكەۋ ەمەس, بىرەۋ بولىپ جاريالانۋى, زاڭداستىرىلۋى جولىنداعى ءابدۋالي قايداروۆ, مىرزاتاي جولداسبەكوۆ, وزبەكالى جانىبەكوۆ سياقتى انا ءتىلىن, ءوز ۇلتىن شەكسىز سۇيەتىن ازاماتتاردىڭ جانكەشتى كۇرەسى, سول جىلدارداعى ەل ىشىندەگى اسا اۋىر جاعدايلاردىڭ جان اۋىرتار سۋرەتتەرى ەش وقۋشىنى ەنجار قالدىرماسى انىق.
كىتاپتا مىرزەكەڭنىڭ تاۋەلسىزدىك جىلدارىنداعى يرانعا ەلشى بولىپ بارعانىندا, تۋعان ەلگە جەتىپ ولسەك ارمانىمىز جوق دەپ جۇرگەن مىڭداعان قازاقتاردى ەلگە كوشىرگەنى, گەرمانياعا ادەيىلەپ بارىپ, بەرليندەگى مۇسىلماندار زيراتىنا قويىلعان مۇستافا شوقايدىڭ بەيىتىن تاۋىپ, شەلەكتەپ قۇيعان جاڭبىر استىندا «حالقىڭنىڭ ارىسى ەدىڭ سەن, جات ەلدىڭ توپىراعىن جامىلماي, اتامەكەنىڭنىڭ تورىندە جاتاتىن ادام ەدىڭ عوي», دەپ تابيعاتپەن قوسىلا جىلاپ تۇرعانى, ەۋرازيا ۋنيۆەرسيتەتىن قايتا تۇلەتۋى, استاناداعى پرەزيدەنتتىڭ مادەني ورتالىعىن مادەنيەت پەن ونەردىڭ, رۋحانياتتىڭ ناعىز ورداسىنا اينالدىرۋى شەشەندىك پەن قازاقتىڭ قۇنارلى ءتىل بايلىعىن قاپىسىز مەڭگەرگەن كەيىپكەردىڭ جەلدەي ەسىپ, جوسىلا اڭگىمەلەۋىمەن قۇلپىرىپ, وقىرماننىڭ قۇلاق قۇرىشىن قاندىرىپ, وقيعا بارىسىنا قىزىعۋشىلىقتى ارتتىرىپ, ەلىكتىرە تۇسەدى.
كىتاپتا اسىرەسە دەربەس مەملەكەت رەتىندە ەندى-ەندى قالىپتاسىپ, ەلدىك نىشاندارىن بەلگىلەي باستاعان تاۋەلسىزدىكتىڭ العاشقى جىلدارىندا كەيىپكەردىڭ ءوزى باسى-قاسىندا جۇرگەن تاريحي وقيعالار, تاۋەلسىزدىك العاننان كەيىنگى ەل باسىنا تۇسكەن اۋىرتپالىققا, قيىنشىلىقتارعا قاراماستان, دۇنيە ءجۇزى قازاقتارىنىڭ العاشقى قۇرىلتايىن مىرزەكەڭنىڭ ۇيىمداستىرۋىمەن ەل بولىپ, جۇرت بولىپ قانشالىقتى كوتەرىڭكى كوڭىل-كۇي مەن جوعارى رۋحتا وتكىزگەنىمىز, ەلىمىزدىڭ تۋىن, ەلتاڭباسىن, ءانۇرانىن قابىلداۋعا بۇكىل حالىق قۋانىپ, قالايشا جۇمىلا اتسالىسقانى (حالىق جازۋشىسى شەرحان مۇرتازا مەن قوعام قايراتكەرى سەرىكبولسىن ءابدىلدين دە وزدەرىنشە تۋ جوباسىن دايىنداپ, كونكۋرسقا الىپ كەلگەنى سونىڭ ءبىر كورىنىسىندەي), وسى سياقتى جايلار, ەلىمىزدىڭ باسىنان وتكەن شىنايى وقيعالار روماندى وقۋ بارىسىندا ەكرانداعىداي كوز الدىڭنان قايتادان ءوتىپ, ەسىل-دەرتىڭدى باۋراپ الادى...
روماندا سول جىلداردا مىرزەكەڭمەن بىرگە ءجۇرىپ قايرات كورسەتكەن, ۇلتىمىزعا كوپ ەڭبەك سىڭىرگەن, تاۋەلسىزدىگىمىزدى باياندى ەتۋگە ايانباي ۇلەس قوسقان وزبەكالى جانىبەكوۆ, تۇڭعىش پرەمەر ۇزاقباي قارامانوۆ, ادامزاتتىڭ ايتماتوۆى اتانعان شىڭعىس ايتماتوۆ, حالقىمىزدىڭ ماقتان تۇتار جازۋشىسى ءابىش كەكىلباەۆ, قازاق ءباسپاسوزىنىڭ كوكبورىسى شەرحان مۇرتازا, 2002 جىلى تۇركىتىلدەس حالىقتار اراسىنداعى ەڭ ۇزدىك الەم اقىنى اتانعان مۇحتار شاحانوۆ سياقتى كوپتەگەن تۇلعالار دا كورىنىس بەرەدى.
ماقالا كولەمى كىتاپ مازمۇنىن تولىعىراق قامتۋعا مۇمكىندىك بەرمەيدى ارينە. سوندىقتان ون جەتى بولىمنەن تۇراتىن قوس تومدىقپەن تانىسقان وقىرماننىڭ تاۋەلسىزدىك قارساڭىنداعى, ودان كەيىنگى جىلدارداعى جۇرتىمىز باستان كەشكەن نەبىر تارتىستى, قىزىقتى تاريحي وقيعالاردىڭ كۋاسى بولارى ءسوزسىز.
مىرزەكەڭنىڭ ادەبيەت پەن مادەنيەتكە, ونەرگە جاقىن جۇرەتىنى قانىنا سىڭگەن قاسيەت. ول بۇل سالالارعا جاقىن ءجۇرىپ قانا قويماي, ولاردى تۇلەتىپ, جاسارتىپ, جاڭعىرتىپ جۇرەدى. مىنا تۋىندىدا كەيىپكەردىڭ بۇل قىرى دا جارقىراي كورىنەدى. ەلباسىنىڭ جارلىعىمەن ەلوردادا اشىلعان ەۋرازيا ۋنيۆەرسيتەتىنىڭ اتىنا زاتىن ساي ەتۋى, اتاپ ايتقاندا ۋنيۆەرسيتەتتىڭ ىشكى مادەنيەتىنەن, ادامداردىڭ ءجۇرىپ-تۇرۋىنان باستاپ, ءبىلىم ورداسىنىڭ مارتەبەسىنە ساي كادرلار جاساقتاۋ, ولاردى ۇيمەن قامتاماسىز ەتۋ, ستۋدەنتتەرگە ارناپ جاتاقحانا سالۋ, ۋنيۆەرسيتەتتە مگۋ-ءدىڭ فيليالىن اشۋ ءتارىزدى جۇمىستاردىڭ قالاي جۇرگىزىلگەنى, مۇنىڭ ءبارىن ەلباسىنىڭ قولداپ, قۋاتتاپ وتىرعانى, تاعى دا قايتالاپ ايتامىز, اۆتوردىڭ قويعان ساۋالدارىنا مىرزەكەڭنىڭ توگىلتىپ قايتارعان جاۋابى ۇلگىسىندە كورىنىس بەرىپ وتىرادى.
جالپى, اتالعان تۋىندىدا مىرزەكەڭنىڭ مەيلى كىتاپ جازۋداعى بولسىن, مەيلى عىلىم-بىلىمگە, مادەنيەت سالاسىنا باسشىلىق جاساۋداعى بولسىن, مەملەكەت جانە قوعام قايراتكەرى رەتىندەگى ەڭبەگىنىڭ ۇشان-تەڭىز ەكەنى ادەمى ايشىقتالادى. وسى ورايدا ول كىسىنىڭ ەلورداداعى اتى بار دا زاتى جوق پرەزيدەنتتىڭ مادەني ورتالىعىن مادەنيەت پەن ونەردىڭ, رۋحانياتتىڭ ناعىز قايناعان ورداسىنا اينالدىرا بىلگەنى, پاريجدەگى پومپيدۋ ءۇيى, ۆاشينگتونداعى كەننەدي ورتالىعى سەكىلدى الەمگە ايگىلى مادەنيەت وشاقتارىنىڭ تاجىريبەسىن وي ەلەگىنەن وتكىزە كەلە, پرەزيدەنتتىڭ مادەنيەت ورتالىعىن دا سولاردىڭ ۇلگىسىندە قالىپتاستىرۋ ءۇشىن كورمە زالدارىن مەيلىنشە تارتىمدى, مازمۇندى, قىزىقتى ەتىپ جاساقتاۋعا كۇش سالعانى, «ۇلتتىق داستۇرلەر تەاترىن» اشقانى, وندا «ابايمەن سىرلاسۋ», «ابىلاي اماناتى», «بۇلبۇل ەدى, ءدۇلدۇل ەدى كەنەكەڭ», «اسەت پەن دانەش», «قازاق جىرىنىڭ حان ءتاڭىرى», «قازاقتىڭ قىزىل جەبەسى», «اتانعانىم مىرزاتاي – ەل ارقاسى», «فاريزا جانە ونىڭ سىڭلىلەرى» سياقتى جانە باسقا دا تاقىرىپتاردا, سونداي-اق ش.ءۋاليحانوۆ, ءا.تاجىباەۆ, م.دۋلاتوۆ, ش.ايتماتوۆ,
و.سۇلەيمەنوۆ, ب.مومىش ۇلى, ع.قۇرمانعاليەۆ سەكىلدى ەلىمىزگە ايگىلى عىلىم, ءبىلىم, ونەر ساڭلاقتارىنىڭ ومىرىنە, شىعارماشىلىعىنا ارنالىپ وتەتىن ادەبي-مۋزىكالىق كەشتەرگە جۇرتشىلىقتىڭ بەلسەنە قاتىسىپ, قىزىعا تاماشالايتىنى شىنايى باياندالىپ, شابىتتانا ايتىلادى.
كىتاپتا ەكى ءبولىم بار. بىرەۋى – « ۇلى دالانىڭ ۇلى جىراۋى» جامبىل تۋرالى, ەكىنشىسى – «ەكى كەنەن تۋمايدى, الاتاۋعا ەكسەڭ دە» دەيتىن, كەنەن تۋرالى. بۇلاردى كىتاپ ىشىندەگى كىتاپ دەۋگە دە بولار ەدى. وسى تاراۋلاردا جامبىل مەن كەنەن اتالارىمىزدىڭ تۋا بىتكەن تابيعي تاماشا تالانتتارى مەن كۇرەسكە, قيىندىقتارعا تولى ءومىر جولدارى, ولاردىڭ جاس كەزىندە سۇيگەن قىزدارىنا قوسىلا الماعانى, ول كەزدە اسىرەسە قالىڭ مال دەيتىن كەدەرگى بولىپ, سونى ءومىر بويى ارمانداپ وتكەن جايلارى, جامبىل اتانىڭ اتاق-داڭقىنىڭ كەڭەستەر وداعىنا, بۇكىل الەمگە قالاي جايىلعانى, قازاق ەلىن دۇنيە جۇزىنە تانىتقانى, وسىنىڭ ءبارى ەگجەي-تەگجەيلى كوركەم باياندالادى...
ءوزىمىز اڭگىمەلەپ وتىرعان ەڭبەك جارىققا شىققاننان كەيىن ونىڭ تۇساۋكەسەر ءراسىمى الماتى مەن نۇر-سۇلتان قالالارىنداعى ۇلتتىق كىتاپحانالاردا مەيلىنشە تابىستى وتكەنىن ايتا كەتكەنىمىز ءجون. وقىرمانمەن بولعان بۇل كەزدەسۋلەردە ەلىمىزگە بەلگىلى اكادەميكتەر مەن قالامگەرلەر رومانعا قازاق ادەبيەتىنىڭ كەزەكتى تابىسى رەتىندە جوعارى باعا بەردى.
ورىنبەك جولدىباي,
فيلولوگيا عىلىمدارىنىڭ كانديداتى, قازاقستاننىڭ قۇرمەتتى ءجۋرناليسى
