اباي • 27 اقپان، 2020

الماتىدا اباي مۇراسىن اسقاقتاتقان كەش ءوتتى

592 رەتكورسەتىلدى

ۇلت رۋحانياتىنىڭ التىن بەسىگىنە بالاناتىن الماتى تورىندە اباي اندەرى اۋەلەگەن اسەم كەش ءوتتى. رەسپۋبليكا سارايىندا  شىمىلدىعىن تۇرگەن مازمۇندى شارادا پوەزيا مەن مۋزىكا سالتانات قۇرىپ،  ويشىلدىڭ ءىلىمى جاڭا سيپاتتا كورىنىس تاپتى. ايتۋلى كەشكە الماتى قالاسىنىڭ اكىمى باقىتجان ساعىنتاەۆ باستاعان  زيالى قاۋىم وكىلدەرى قاتىستى.

«ۇشار باسى كوز جەتپەس، كىر شالماس زاڭعار اباي! ويلاپ وتىرساق، ءبىز قاي كەزدە دە ابايدى ىزدەپپىز. جانىڭ جادىراپ قۋانعاندا ەسىڭە اباي تۇسەدى. كوڭىلىڭىز دوستان دا، دۇشپاننان دا، ءتىپتى مىناۋ عاجاپ ومىردەن دە قالىپ قۇلازىعاندا تاعى دا  اباي الدىنا بارامىز. كۇيىپ-جانىپ عاشىق بولساق، ايتارعا ءسوز تاپپاساق سول سەزىم ابايدان تابىلادى. ەلجىرەپ، كوكىرەگىمىزدى مەيىر كەرنەسە ونىڭ دا ساۋلەسى ابايدان جەتكەن ەكەن. ەل دەپ، وتان دەپ ويلانساق تا ابايدان الىسقا كەتە المايمىز. ۇرپاعىمىزدى جارىققا باستار جول ىزدەسەك تە ابايعا قارايلايمىز». ءدال وسىنداي ماتىنمەن  مايەكتەلگەن اسەرلى قويىلىم كەشكە جينالعانداردى حاكىم الەمىنىڭ تەرەڭىنە ۇڭىلۋگە شاقىردى.

ساحنا تورىندە اباي جازعان قازاق ادەبيەتىنىڭ العاشقى باللاداسىنىڭ اۋەنىنە بالەت، حورەوگرافيالىق مينياتيۋرا قويىلدى. حرونولوگيا بويىنشا ازىرلەنگەن ەپيزودتار پوەزيا، مۋزىكا جانە حورەوگرافيامەن ۇيلەسىمدى ۇندەسىپ، باي مۇرانىڭ سىرىن اشتى. ابايدىڭ قالىپتاسۋى، دامۋ كەزەڭدەرى كورسەتىلىپ، وقيعالار جەلىسى اباي پەيزاجدارىنىڭ سۋرەتتەرى ارقىلى  ءورىلىپ وتىردى.

«الەم ەسىگى» پرولوگىنان باستاۋ العان ءىس-شارا جىل مەزگىلدەرىنە ارنالعان ولەڭدەرمەن كومكەرىلىپ، بالالاردىڭ ءبيى كۇيدىڭ سۇيەمەلدەۋىمەن ورىندالدى.

سونداي-اق ساحنادا اقىندىق-مۋزىكالىق، حورەوگرافيالىق قويىلىمدار، سونىڭ ىشىندە ابايدىڭ ماحاببات ليريكاسى، تابيعات سۇلۋلىعىنا ارنالعان قويىلىمدارى قويىلدى. بۇعان دەيىن تەك دومبىرادا ورىندالىپ كەلگەن «سەگىز اياق» ءانىن ەسترادا-سيمفونيالىق وركەسترىنىڭ سۇيەمەلدەۋىمەن نۇرجان جانپەيىسوۆ، ەرلان رىسقالي، تىلەك بازاروۆ سىندى تانىمال انشىلەر كوپشىلىككە تامىلجىتا جەتكىزدى.

كەش سوڭىندا زالعا جيىلعان قاۋىم ابايدىڭ «كوزىمنىڭ قاراسى» ءانىن ونەر مايتالماندارىمەن قوسىلا شىرقادى. كىشكەنتاي كورەرمەندەر حاكىم مۇراسىنىڭ بيىك باعاسىن كورسەتىپ، ۇلى اقىننىڭ وتتى جىرلارىن الما-كەزەك جاتقا وقىدى. اباي قۇنانباي ۇلىنىڭ 175 جىلدىق مەرەيتويىنا ارنالعان شارانى الماتى قالاسىنىڭ اكىمدىگى ۇيىمداستىردى.

سوڭعى جاڭالىقتار

ۇقساس جاڭالىقتار