ايماقتار • 27 اقپان، 2020

شىمكەنتتە 34 ماڭىزدى مادەني ءىس-شارا وتەدى

77 رەتكورسەتىلدى

بۇگىن قالالىق مادەنيەت، تىلدەردى دامىتۋ جانە ارحيۆتەر باسقارماسىنىڭ باسشىسى راشيد مىڭباەۆ باق وكىلدەرىنە ارنايى بريفينگ بەردى. جيىندا باسقارما باسشىسى «شىمكەنت 2020-تمد ەلدەرىنىڭ مادەني استاناسى» جىلى اياسىندا وتەتىن 34 مارتەبەلى ءىس-شارالارعا دايىندىق بارىسى جونىندە كەڭىنەن اڭگىمەلەدى.   

«شىمكەنت – دوستاستىقتىڭ 2020 جىلعى مادەني استاناسى» ءىس-شاراسىنىڭ سالتاناتتى اشىلۋ ءراسىمى 20 ناۋرىز كۇنى قاجىمۇقان اتىنداعى ورتالىق ستاديوندا وتكىزىلەدى. سالتاناتتى ءىس-شارانىڭ كونتسەرتتىك باعدارلاماسىنا 800-گە جۋىق شىمكەنت قالاسىنىڭ ونەرپازدارى مەن الماتى، استانا قالالارى مەن تمد ەلدەرىنەن 300-دەن استام ونەرپاز قاتىسپاق. اشىلۋ سالتاناتىن 16 مىڭنان استام قالا تۇرعىندارى مەن سىيلى قوناقتار تاماشالاي الادى»، دەدى راشيد مىڭباەۆ.

بيىل تمد ەلدەرىنىڭ مادەني استاناسى مەرەكەسىمەن قاتار قالادا بىرنەشە ماڭىزدى مەرەيتويدىڭ ءوتۋى جوسپارلانعان. ولاردىڭ قاتارىندا ءابۋ ناسىر ءال-ءفارابيدىڭ - 1150 جىلدىعى، اباي قۇنانباي ۇلىنىڭ - 175 جىلدىعى، التىن وردانىڭ - 750، ءشامشى قالداياقوۆتىڭ 90 جىلدىق مەرەيتويلارى مەن شىمكەنت قالاسىنىڭ 2200 جىلدىعىنا ارنالعان فورۋمدار، عىلىمي-پراكتيكالىق كونفەرەنتسيالار، فورۋمدار جانە تاعى باسقا ءىس-شارالار بار.

باق وكىلدەرىنىڭ باسىن قوسىلعان جيىندا باسقارما باسشىسى شىمكەنت قالاشىعىندا اتقارىلىپ جاتقان جۇمىستار تۋرالى اڭگىمەلەدى.  شىمكەنتتەگى «ەسكى قالاشىق» - ەلىمىز ءۇشىن ەرەكشە ارحەولوگيالىق وبەكت جانە مەملەكەتتىك ماڭىزى بار تاريح جانە مادەنيەت ەسكەرتكىشتەرىنىڭ مەملەكەتتىك تىزىمىنە ەنگەن ساۋلەتتىك قۇرىلىس.

سالا جاۋاپتىلارىنىڭ ايتۋىنشا 19 ماۋسىم - قالا كۇنىنە وراي شىمكەنت قالاسىنىڭ 2200 جىلدىق مەرەيتويى رەسمي اتالىپ، اشىق اسپان استىنداعى مۇراجايدىڭ سالتاناتتى اشىلۋ ءراسىمى وتپەك.

سونداي-اق جىل بويى شىمكەنت قالاسىنا گاسترولدىك ىسساپارمەن مادەنيەت جانە سپورت مينيسترلىگىنە قاراستى 27 ەلىمىزدىڭ جەتەكشى تەاترلارى مەن فيلارمونيا ۇجىمدارى كەلەدى دەپ جوسپارلانعان.

بريفينگتە تىلشىلەر تاراپىنان سۇراقتار قويىلىپ، ناقتى جانە تۇشىمدى جاۋاپتار الىندى.      
راشيد مامىت ۇلى الداعى جاۋاپتى مەرەكەلەر قارساڭىندا اۋىزبىرشىلىك تانىتىپ، ءبىر-بىرىمىزگە قولداۋ كورسەتىپ، تۋعان قالامىزدىڭ مەرەيىن بيىكتەتۋگە شاقىردى.

 

شىمكەنت

سوڭعى جاڭالىقتار

ۇقساس جاڭالىقتار