1985 جىلى پلانەتا چەمپيونى اتانعان ول 20 جىلداي ەڭ اتاقتى شاحماتشى بولىپ تۇردى. 1997 جىلى ول IBM كومپانياسىنىڭ جاساپ شىعارعان «Deep Blue» اتتى سۋپەركومپيۋتەرىمەن سايىسقا ءتۇسىپ, ۇتىلىپ قالدى. بۇل روبوتتىڭ ادامنىڭ اقىل-ەسى جاعىنان ادامنان ارتىق ەكەنىن كورسەتكەن ماتچ بولىپ, روبوتتار ءداۋىرىنىڭ باستالعانىن كورسەتتى.
سودان بەرگى ۋاقىتتا كومپيۋتەرلەر دامىپ, العا قارىشتاپ كەتە باستادى. قازىر كەز كەلگەن سمارتفونىڭىز سىزبەن شاحمات ويناپ جەڭىپ كەتە الادى. ول از دەسەڭىز, جاساندى ينتەللەكت وزدىگىنەن ءبىلىم الىپ, ءوزىن ابدەن جەتىلدىرە الادى.
كاسپاروۆ ءۇشىن 1997 جىلعى ۇتىلىس جايسىز بولعانمەن, ول مۇنىمەن كەلىسپەسكە امالى جوق ەكەنىن ايتادى. بىراق ول قىزىقتى ەكسپەريمەنتكە قاتىسقانىنا وكىنبەيتىنىن جانە بولاشاقتى بولجاۋعا ارەكەت ەتۋشىلەردىڭ ءبىرى بولعانىن ماقتان تۇتاتىنىن دا ايتتى. ەكس-چەمپيون كومپيۋتەرلەر مەن روبوتتاردىڭ قانداي مۇمكىندىككە يە ەكەنىن بىلە وتىرىپ, ولاردى ادامزات يگىلىگىنە جۇمىس ىستەتۋ دە ۇلكەن ماسەلە ەكەنىن اتاپ ءوتتى.
جاڭا تەحنولوگيا شىققان كەزدە ادامدار وعان العاشىندا ۇركە قارايدى دا كەيىننەن ۇيرەنىپ كەتەدى ەكەن. اقش-تا جۇمىس ورىندارىنىڭ 4 پايىزى عانا ادام تۆورچەستۆوسىنا تاۋەلدى بولسا, قالعان جۇمىستى روبوتتار اتقاراتىن دەڭگەيگە جەتكەن جانە ول قالىپتى جاعداي سانالادى.
ارينە, تەحنولوگيانىڭ جاقسى جانە جامان جاقتارى بولادى. بىراق ونى ءوز يگىلىگىنە جۇمىس ىستەتۋ ول ادامداردىڭ ءوز قولىنداعى شارۋا. كوپتەگەن ادامدار كومپيۋتەرگە سەنگەندىگى سونشا, وڭاي بولسا دا كەي وپەراتسيالاردى ءوز باسىمەن ويلاپ ىسكە اسىرمايتىن بولىپ الدىق. مىسالى, قاراپايىم عانا كوبەيتۋ كەستەسىن بىلمەيتىن ادامدار ارامىزدا بارشىلىق ەكەنى جاسىرىن ەمەس. سوندىقتان دا ادام كەيبىر جاعدايدا تەك قانا ءوز اقىل-ويى مەن كۇشىنە سەنۋ كەرەك شىعار.
كاسپاروۆتىڭ ويىنشا, ادام كوپ تەحنولوگيالىق ۇردىستەردى جىلدام جاساپ ۇلگەرۋى ءۇشىن, ءارى مىقتى بولۋى ءۇشىن وعان كومپيۋتەر كەرەك-اق. بىراق ادام ودان اقىلدى بولا قويار ما ەكەن؟ دەگەنمەن دە, جاساندى ينتەللەكت وسىدان بىرنەشە جىلدار بۇرىن عانا مۇمكىن ەمەس دۇنيەلەردى دە ىسكە اسىرىپ جاتقانىن ۇمىتپاۋ كەرەكتىگىن دە شاحماتشى باسا ايتتى. ياعني, قانداي زامان بولماسىن, بارلىعى ادامنىڭ ءوز قولىندا قالا بەرەدى.
