وزبەكستان پرەزيدەنتى اكىمشىلىگىنىڭ حابارلاۋىنشا, رەسمي ساپار پرەزيدەنت رەجەپ تايپ ەردوعاننىڭ شاقىرۋى نەگىزىندە بولعان. ءىسساپار بارىسىندا جوعارى دارەجەدەگى كەڭەستەرمەن قاتار ستراتەگيالىق سەرىكتەستىك كەڭەسىنىڭ العاشقى وتىرىسى ءوتتى. سونىمەن بىرگە پرەزيدەنت كىتاپحاناسى كەشەنىنىڭ سالتاناتتى اشىلۋ راسىمىنە قاتىستى.
ەكى ەل باسشىلارى ساياسات, ەكونوميكا, ساۋدا, ينۆەستيتسيا, قارجى, ترانسپورت, بايلانىس, ءبىلىم, مادەنيەت سالالارىنداعى ارىپتەستىك پەن كۇن تارتىبىندەگى حالىقارالىق, ايماقتىق ماسەلەلەردى تالقىلادى. ساراپشىلاردىڭ پىكىرىنشە, شاۆكات ميرزيەيوۆتىڭ ساپارىنىڭ نەگىزگى ماقساتى – ەكىجاقتى ساۋدا-ەكونوميكالىق قاتىناستارعا جاڭا سەرپىن بەرۋ. ويتكەنى تاشكەنت ەكسپورت كولەمىن ارتتىرعىسى كەلەدى. وعان قوسا ترانسپورت-لوگيستيكا جۇيەسىن دە ىلگەرىلەتۋ وزبەكستان جوسپارىندا بار.
كەلىسىمدەر كەزىندە شاۆكات ميرزيەيوۆ «تۇركيا مەن وزبەكستاننىڭ سەرىكتەستىگى جاڭا پاراققا جازىلماق», دەدى. جيىندا سوڭعى ەكى جىلداعى ارىپتەستىك جەتىستىكتەرىن ايتا كەلە, كەلەشەك جوسپارلارىمەن ءبولىستى. «بۇگىنگى ستراتەگيالىق كەڭەس جۇمىسىنىڭ باستالۋى دا ەكى ەلدىڭ دوستىعىنا جاڭا لەپ بەرەتىنىنە سەنەمىن. ءبىزدى پرەزيدەنت كىتاپحاناسىنىڭ اشىلۋىنا شاقىرۋىڭىز دا وزبەكستان حالقىنا دەگەن سىي-قۇرمەتىڭىزدىڭ بەلگىسى. تاۋار اينالىمىنىڭ كولەمىن 5 ملرد اقش دوللارىنا جەتكىزۋ ءۇشىن بار كۇشىمىزدى سالىپ جۇمىس ىستەيمىز. وسى ورايدا 5 ملرد اقش دوللارىنىڭ شەكتى ەمەس ەكەنىن ايتىپ وتكىم كەلەدى», دەدى تۇركيا پرەزيدەنتىنە العىس بىلدىرگەن ش.ميرزيەيوۆ.
ستراتەگيالىق سەرىكتەستىك كەڭەسىنىڭ العاشقى وتىرىسىندا ەكى ەل بايلانىسىنداعى كەنجە قالعان باعىتتارعا باسىمدىق بەرۋ كەلىسىلدى. ءوندىرىس, ءبىلىم, تۋريزم, دەنساۋلىق ساقتاۋ, مادەنيەت پەن سپورت سالالارىنىڭ دامۋىنا نەگىزدەلگەن ۇلكەن جوبالار توقتاعانى دا كەڭەس بارىسىندا ەسكە سالىندى. «بۇل تۇرعىدا تۇركيانىڭ ۇلكەن كومپانيالارىنا ارنالعان جالپى سوماسى 1 ملرد اقش دوللارى بولاتىن باعدارلامالار دايىنداپ جاتىرمىز. بۇل ءىس-شارالاردى ءارى قاراي جالعاستىرۋ ءۇشىن ءارتۇرلى قولداۋ كورسەتۋگە ۇسىنىس الدىق», دەدى شاۆكات ميرزيەيوۆ.
ەكى مەملەكەت باسشىسىنىڭ باسقوسۋىندا, سونداي-اق جاھاندىق قاۋىپسىزدىك پەن ورتالىق ازيا ماسەلەسى, اۋعانستانداعى سوڭعى جاعدايلار تالقىلاندى. وسى ورايدا «اۋعانستاندا بەيبىتشىلىكتىڭ ورناۋى ءۇشىن كۇش بىرىكتىرەمىز دەپ كەلىستىك», دەپ مالىمدەدى رەجەپ تايپ ەردوعان. سەرىكتەستىك تاقىرىبىنان بولەك, ءدىن ماسەلەسى دە قاۋزالدى. «تۇركيانىڭ حالىقارالىق ارەناداعى ءرولى مەن قۇرمەتى جىل ساناپ ارتىپ كەلەدى. باۋىرلاس مەملەكەتتىڭ دامۋى, ەلدەگى بەيبىتشىلىك پەن دوستىق, كەلەشەككە نىق جوسپارى قۋانتادى. بولاشاقتا بۇلاردىڭ ودان ءارى دامي, بەكي تۇسۋىنە ءبىز دە قولىمىزدان كەلگەنشە كومەكتەسۋگە, قولداۋ بىلدىرۋگە دايىن ەكەنىمىزدى جەتكىزگىم كەلەدى», دەپ ءسوزىن تۇيىندەدى وزبەكستان باسشىسى. كەزدەسۋ سوڭىندا شاۆكات ميرزيەيوۆ رەجەپ تايپ ەردوعاندى ستراتەگيالىق سەرىكتەستىك كەڭەسىنىڭ وتىرىسىنا قاتىسۋ ءۇشىن وزبەكستانعا شاقىردى.
شاۆكات ميرزيەيوۆ تۇركياعا بۇعان دەيىن 2017 جىلدىڭ قازانىندا بارعان بولاتىن. ال تۇركيا پرەزيدەنتى 2018 جىلى ساۋىردە وزبەكستانعا ساپارلاعان ەدى.
دەرەكتەرگە قاراعاندا, وزبەكستانداعى تۇركيا قولداۋىمەن اشىلعان كومپانيالار سانى 915-تەن 1306-عا وسكەن. تاشكەنتتە تۇركيانىڭ Ziraat bank-ءى, كىلەم, كيىم وندىرەتىن كاسىپورىندار مەن قۇرىلىس ماتەريالدارىن شىعاراتىن كومپانيالارى جۇمىس ىستەيدى.
