بۇل قۇجاتپەن 2019 جىلدىڭ 15 ساۋىرىندە تاشكەنت قالاسىندا قول قويىلعان قازاقستان رەسپۋبليكاسى ۇكىمەتى مەن وزبەكستان رەسپۋبليكاسى ۇكىمەتى اراسىندا زاڭسىز كوشى-قونعا قارسى كۇرەستەگى ىنتىماقتاستىق جونىندەگى كەلىسىمدى راتيفيكاتسيالاۋ كوزدەلىپ وتىر.
ىشكى ىستەر ءمينيسترىنىڭ ءبىرىنشى ورىنباسارى مارات قوجاەۆتىڭ بايانداۋىنشا, كەلىسىمنىڭ ماقساتى – زاڭسىز كوشى-قونمەن كۇرەستە ەكىجاقتى ىنتىماقتاستىقتىڭ قۇقىقتىق نەگىزىن قۇرۋ, ول كەلىسۋشى تاراپتاردىڭ اۋماقتارىنداعى كوشى-قون پروتسەسىن رەتتەۋدەگى ماڭىزدى سالالاردىڭ ءبىرى.
زاڭ جوباسى بويىنشا جۇمىس توبىنا جەتەكشىلىك ەتكەن سەناتور دانا نۇرجىگىتوۆا ەكى ەلدىڭ ارىپتەستىك قارىم-قاتىناسىن دامىتۋ مەن نىعايتا تۇسۋدە ەكىجاقتى كەلىسىمنىڭ ماڭىزىنا توقتالدى. ونىڭ ايتۋىنشا, كەلىسىم زاڭسىز كوشى-قوننىڭ جولىن كەسۋ مەن ەسكەرتۋ ماقساتىندا پايدالاناتىن ستاتيستيكالىق, عىلىمي-ادىستەمەلىك جانە باسقا دا اقپاراتتارمەن ءبولىسىپ, زاڭسىز كوشى-قونعا قارسى كۇرەستە بىرلەسكەن ءتيىمدى شارالاردى ىسكە اسىرۋعا مۇمكىندىك بەرەدى. تاراپتاردىڭ ىنتىماقتاستىعى ەكى ەلدىڭ كوشى-قونمەن اينالىساتىن قۇزىرەتتى ورگاندار قىزمەتكەرلەرىن دايارلاۋ جانە بىلىكتىلىگىن ارتتىرۋ, زاڭسىز كوشى-قونمەن كۇرەس سالاسىندا عىلىمي زەرتتەۋلەر جۇرگىزۋ, ەكى ەل اۋماقتارىندا زاڭسىز كوشى-قونعا قارسى جەدەل-پروفيلاكتيكالىق بىرلەسكەن شارالار ۇيىمداستىرۋ سيپاتىندا جۇزەگە اساتىن بولادى.
سەناتور م.قۇل-مۇحاممەد شارانى قورىتىندىلاي كەلىپ, كەلىسىمدى راتيفيكاتسيالاۋدىڭ ناتيجەسىندە ەكىجاقتى زاڭسىز كوشى-قوندى رەتتەۋ ارقىلى ۇلتتىق قاۋىپسىزدىكتى قامتاماسىز ەتۋ مەن ەكونوميكالىق تۇراقتىلىق كۇتىلەتىنىن جەتكىزدى.
زاڭ جوباسى سەناتتىڭ جالپى وتىرىسىندا قاراۋعا ۇسىنىلدى.
