قوعام • 25 اقپان، 2020

16 جاستاعى ءجاسوسپىرىم دارىگەرگە ءوز بەتىنشە جۇگىنە الا ما؟

30 رەتكورسەتىلدى

بيىل «حالىقتىڭ دەنساۋلىعى جانە دەنساۋلىق ساقتاۋ جۇيەسى تۋرالى» كودەكس قابىلداناتىنى بەلگىلى. بۇل كۇندەرى دەنساۋلىق كودەكسىنىڭ جوباسى قايتا-قايتا تالقىعا ءتۇسىپ، ۇسىنىستار پىسىقتالۋ ۇستىندە.

سونىمەن، الماتىدا وتكەن كەزەكتى تالقىلاۋعا دەنساۋلىق ساقتاۋ ءمينيسترى ەلجان ءبىرتانوۆ، الماتى اكىمىنىڭ ورىنباسارى ەرجان باباقۇماروۆ، پارلامەنت ءماجىلىسىنىڭ دەپۋتاتى زاۋرەش امانجولوۆا، بالالار قۇقىعىن قورعاۋ جونىندەگى ۋاكىل ارۋجان ساين، ۇكىمەتتىك ەمەس سەكتوردىڭ، كاسىپوداقتاردىڭ، مەديتسينالىق ۇيىمداردىڭ مۇشەلەرى، دەنساۋلىق ساقتاۋ سالاسىنداعى ساراپشىلار، قوعام بەلسەندىلەرى جانە بۇقارالىق اقپارات قۇرالدارىنىڭ وكىلدەرى قاتىستى.

دوڭگەلەك ۇستەل تۇرىندە وتكەن جيىندا ۆاكتسيناتسيا، ترانسپلانتولوگيا، كامەلەتكە تولماعانداردىڭ رەپرودۋكتيۆتىك دەنساۋلىعىن ساقتاۋ، جاستاردىڭ جىنىستىق تاربيەسى ماسەلەلەرىن قامتۋ ماسەلەسى قىزۋ تالقىعا ءتۇستى.

جاڭا زاڭ جوباسىندا جاستاردىڭ جىنىستىق تاربيەسى تۋرالى ماسەلەلەر قامتىلعان. بالالار قۇقىعىن قورعاۋ جونىندەگى ۋاكىل ارۋجان ساين بالالارعا 16 جاسىنان باستاپ اتا-اناسىنىڭ قاتىسۋىنسىز دارىگەر كەڭەسىن الۋعا رۇقسات بەرۋ قاجەتتىگىن العا تارتتى. ونىڭ ايتۋىنشا، بۇل كوپ بالالاردىڭ ءومىرى مەن دەنساۋلىعىن ساقتاپ قالماق. ال ءماجىلىس دەپۋتاتى، دەنساۋلىق كودەكسىن قاراۋ بويىنشا جۇمىس توبىنىڭ توراعاسى زاۋرەش امانجولوۆا وسى باعىتتا كودەكسكە وزگەرىستەر ەسەپكە الىناتىندىعى تۋرالى ايتتى.

«بۇگىن ساراپشىلاردىڭ ايتقان ستاتيستيكاسىن وزدەرىڭىز ەستىگەن بولارسىزدار. قازىر بالالاردىڭ 40 پايىزى 16-16،5 جاستا جىنىستىق قاتىناسقا تۇسەدى ەكەن. ەگەر وسى جاستا بالا دارىگەرگە كەلسە، دارىگەرلەر اتا-اناڭدى الىپ كەل دەيدى. ال بالا اتا-اناسىنا ايتۋدان قورقادى نەمەسە ۇيالادى. سودان ول قايتىپ كەلمەيدى. ول قاسىنداعى قۇربىلارىنان، دوستارىنان، ينتەرنەتتەن اقىل سۇراي باستايدى. سوندىقتان كونسۋلتاتيۆتىك كومەك 16 جاستان بولۋى كەرەك. بۇل وسى كودەكستە قاراستىرىلاتىن بولادى»، – دەدى زاۋرەش امانجولوۆا.

جاڭا كودەكستىڭ جوباسىمەن اتالعان قۇقىق نەعۇرلىم ەگجەي-تەگجەيلى رەگلامەنتتەلەدى، ويتكەنى رەپرودۋكتيۆتى دەنساۋلىقتى قورعاۋ جانە ادامگەرشىلىك-جىنىستىق تاربيە الۋ دۇرىس جىنىستىق مىنەز-ق ۇلىق تۋرالى اقپاراتتاندىرىلۋعا بايلانىستى. دۇرىس جىنىستىق مىنەز-ق ۇلىقتىڭ ماقساتى – قاجەتسىز جۇكتىلىكتى جانە جىنىستىق جولمەن بەرىلەتىن ينفەكتسيالاردىڭ تارالۋىن الدىن الۋ بولىپ تابىلادى.

ءوز كەزەگىندە وسى ماسەلەنى رەتتەۋ ماقساتىندا اقپاراتتى كەلەسى جازباداعىداي كورسەتۋ ۇسىنىلادى: ء«اربىر بالا قاجەتسىز جۇكتىلىكتى جانە جىنىستىق جولمەن بەرىلەتىن ينفەكتسيالاردىڭ تارالۋىن بولدىرماۋ ماقساتىندا رەپرودۋكتيۆتى دەنساۋلىعىن ساقتاۋ تۋرالى اقپاراتتى قولجەتىمدى نىساندا الۋعا قۇقىلى».

پارلامەنت ءماجىلىسىنىڭ دەپۋتاتى، وسى زاڭ جوباسى بويىنشا جۇمىس توبىنىڭ جەتەكشىسى زاۋرەش امانجولوۆا رەپرودۋكتيۆتى دەنساۋلىق بويىنشا دارىگەردىڭ كونسۋلتاتسيالىق كومەگى تۋرالى نورمانى بەكىتۋ جوسپارلانعانىن ءتۇسىندىردى. بۇگىنگى تاڭدا قازاقستاندا رەپرودۋكتيۆتى مەديتسينا مەكتەبى بار، كەڭەس الۋ ءۇشىن پەداگوگيكالىق ۇجىمنىڭ رۇقساتى قاجەت.

سوڭعى جاڭالىقتار

ۇقساس جاڭالىقتار