بريتانيا يسپانيانى سوتقا بەرمەك
لوندون ادامنىڭ ەركىن ءجۇرىپ تۇرۋ قۇقىنىڭ بۇرمالانعانىنا نارازى بولسا, مادريد بالىقشىلار مەن كونترابانداعا توسقاۋىل قويىلعانىنا نارازىلىق بىلدىرۋدە.
بريتانيا يسپانيانى سوتقا بەرمەك
لوندون ادامنىڭ ەركىن ءجۇرىپ تۇرۋ قۇقىنىڭ بۇرمالانعانىنا نارازى بولسا, مادريد بالىقشىلار مەن كونترابانداعا توسقاۋىل قويىلعانىنا نارازىلىق بىلدىرۋدە.
ۇلىبريتانيا ۇكىمەتى پيرەنەي تۇبەگىنىڭ شەتىندەگى ءوزىنىڭ اۋماعى سانالاتىن گيبرالتاردى قورعاپ قالۋ ءۇشىن ەۋروپا سوتىنا تالاپ-ارىز بەرمەك نيەتتە. ال لوندون مەن مادريد 1713 جىلدان بەرى سوزىلىپ كەلە جاتقان داۋدى شەشپەك بولىپ جاتقاندا, ادامدار گيبرالتار شەكاراسىندا كەدەندىك تەكسەرۋدى كۇتىپ, 6-7 ساعات بويى تۇرۋعا ءماجبۇر. ايتا كەتۋ كەرەك, داۋ-جانجال 24 شىلدەدە جەرگىلىكتى بيلىكتىڭ جاساندى ريف سالۋ ءۇشىن گيبرالتار جاعالاۋىنداعى تەڭىزگە 70 بەتون بلوكتار تاستاۋىنان كەيىن تۋىنداعان بولاتىن.
سۇڭگۋىر كەمەدەگى جارىلىس
مۋمباي پورتىندا تۇرعان, رەسەيدە شىعارىلعان سۇڭگۋىر قايىقتىڭ بورتىندا جارىلىس بولىپ, ونىڭ سوڭى ورتكە ۇلاستى. كەيبىر ادامدار سۋعا سەكىرىپ, قۇتىلۋعا ءماجبۇر بولعان.
سۋبمارينانىڭ سۋعا باتىپ كەتكەنى, تەك ازعانتاي عانا بولىگىنىڭ سۋ بەتىندە كورىنىپ تۇرعانى ءمالىم بولىپ وتىر. ونىڭ ىشىندە شامامەن 18 ادام بار بولۋى مۇمكىن كورىنەدى. جاراقات العان بىرنەشە ادام اۋرۋحانالارعا جەتكىزىلگەن. قازىرگى ۋاقىتتا بيلىك سۇڭگۋىر قايىقتىڭ ىشىندە قامالىپ قالعان ادامداردىڭ قاۋىپسىزدىگىن قامتاماسىز ەتۋ ءۇشىن بارلىق كۇش-جىگەرلەرىن جۇمساۋدا. سونىمەن بىرگە, اپاتتىڭ ورىن الۋ سەبەبى دە انىقتالۋدا.
اۋعانستاندا ايەل دەپۋتات ۇرلاندى
اۋعانستاننىڭ ورتالىق پروۆينتسياسى گازنيدە تاليبتەر دەپۋتات فاريبا احمادي كاكاردى ءۇش قىزىمەن بىرگە ۇرلاپ اكەتكەن. سوڭىنان ناتو كۇشتەرى مەن اۋعان بارلاۋشىلارىنىڭ ارنايى وپەراتسياسى بارىسىندا بالالار بوساتىلعانىمەن, ولاردىڭ اناسى ءالى كۇنگە تاليبتەر قولىندا قالۋدا.
جەرگىلىكتى پوليتسيانىڭ مالىمەتتەرى بويىنشا, تاليبتەر ف.كاكارعا ايىرباس رەتىندە وزدەرىنىڭ تۇرمەدەگى 4 ارىپتەستەرىن بوساتۋدى تالاپ ەتكەن. ساراپشىلاردىڭ پايىمداۋىنشا, اۋعانستاننان 2014 جىلى ناتو اسكەرلەرىنىڭ شىعارىلۋى وسى ەلدەگى ايەلدەر جاعدايىن بارىنشا كۇردەلەندىرىپ جىبەرۋى مۇمكىن. وتكەن اپتادا اۋعان پارلامەنتىنىڭ مۇشەسى رۋح گۇل مەن ونىڭ كۇيەۋىنە شابۋىل جاسالعان بولاتىن.
پرەزيدەنت سوت شەشىمىمەن كەلىستى
يتاليا پرەزيدەنتى دجوردجو ناپوليتانو سيلۆيو بەرلۋسكونيدى تابىستارىن جاسىرعانى ءۇشىن كىنالى دەپ تاپقان سوت شەشىمىنىڭ كۇشىن جويۋدان باس تارتتى.
يتاليا پرەزيدەنتى ەلدىڭ بۇرىنعى پرەمەر-ءمينيسترىنىڭ كىنالى ەكەنىن مويىنداي وتىرىپ, بارىنشا ءبىر شەكتەۋلى جاعدايلاردا وعان راقىمشىلىق جاسالۋى مۇمكىن ەكەنىن دە اتاپ كورسەتكەن. سونىمەن بىرگە, ناپوليتانو ۇكىمەتتى اۋىستىرۋ جونىندە قوقان-لوققى جاساعان بەرلۋسكوني پارتياسىنا زاڭ بۇلجىتپاي ورىندالۋعا ءتيىس ەكەنىن دە ەسكەرتىپ وتىر. يتاليادا بەرلۋسكوني پارتياسىنىڭ بيلىك كواليتسياسىنان شىعۋى ەل ءۇشىن ەكونوميكالىق اپاتقا اينالۋى مۇمكىن دەپ قاۋىپتەنەدى.
سيريا داعدارىسى قالاي شەشىلەدى؟
سيريالىق اسكەر دە, ولارعا قارسى تۇرعان ەرەۋىلشىلەر دە ەلدىڭ بۇكىل اۋماعىندا باقىلاۋ ورناتۋعا قابىلەتتى ەمەس, سوندىقتان ولار داعدارىستى ساياسي تۇردە شەشۋگە كەلىسۋگە ءتيىس. اقش مەملەكەتتىك دەپارتامەنتىنىڭ وكىلى مەري حارف وسىنداي مالىمدەمە جاساعان.
بۇكىل سيريا اۋماعىنا ولاردىڭ ەشقايسىسى دا باقىلاۋ ورناتا المايدى, دەپ اتاپ كورسەتكەن ول ۆاشينگتوندا وتكەن بريفينگتە. مەن ورىن العان احۋالدى تۇيىققا تىرەلۋ دەپ سانامايمىن, سونىمەن بىرگە, بىزدەر ساياسي شەشىم تابۋعا ءتيىسپىز. سونداي-اق, م.حارف ماسكەۋدىڭ سيريا ۇكىمەتىنە قولداۋ جاساۋىنا بايلانىستى ۆاشينگتوننىڭ ءوز الاڭداۋشىلىعىن رەسەيگە تالاي رەت حابارلاعانىن دا ايتىپ بەرگەن.
الپىس ءجاسوسپىرىم تۇرمەدەن قاشتى
برازيليانىڭ سان-پاۋلۋ قالاسىنداعى تۇرمەدە ورىن العان ءىرى كوتەرىلىس سالدارىنان 60-قا جۋىق ءجاسوسپىرىم تۇرمەدەن قاشىپ كەتكەن.
جەرگىلىكتى پوليتسيا 17 قاشقىننىڭ ۇستالعانى تۋرالى حابارلاپ وتىر. جاسوسپىرىمدەر مامىقتاردى ورتەپ, تۇزەۋ مەكەمەسىنىڭ ديرەكتورىن كەپىلدىككە العان. باسىندا جاراقاتى بار ديرەكتور اۋرۋحاناعا جەتكىزىلگەن كورىنەدى. سونىمەن بىرگە, تۇرمەنىڭ 20-عا جۋىق قىزمەتكەرلەرىنىڭ زارداپ شەككەنى دە بەلگىلى بولىپتى.
كايردەگى قاقتىعىستار تىيىلار ەمەس
ەگيپەت قاۋىپسىزدىك كۇشتەرى مەن تاعىنان قۇلاتىلعان يسلاميستىك پرەزيدەنت مۋحاممەد ءمۋرسيدىڭ جاقتاستارى اراسىنداعى قاقتىعىستان كايردە كەم دەگەندە 30 ادام قازا تاپقان.
كەلىپ جەتكەن حابارلارعا قاراعاندا, ەگيپەت قاۋىپسىزدىك كۇشتەرى ءمۋرسيدىڭ جاقتاستارى ۇيىمداستىرعان ەرەۋىلدى قۋىپ تاراتۋ وپەراتسياسىن باستاعان. ونىڭ بارىسىندا ىشكى قاۋىپسىزدىك كۇشتەرى كوزدەن جاس اعىزاتىن گاز قولدانىپ, تىكۇشاقتار مەن ارنايى تەحنيكانى ىسكە قوسقان. ەگيپەتتىڭ جاڭا بيلىگى ءمۋرسيدىڭ جاقتاستارى ەلدەگى ساياسي احۋالدى تۇراقسىزداندىرىپ, مەملەكەت قاۋىپسىزدىگىنە قاتەر ءتوندىرىپ وتىر دەپ ەسەپتەيدى. وسى ورايدا ءمۋرسيدىڭ قازىرگى ۋاقىتتا قاماۋدا وتىرعانىن, وعان داعدارىستى رەتتەۋ تالپىنىسى ساتسىزدىككە ۇشىرادى دەگەن ايىپ تاعىلعانىن دا ايتا كەتۋ قاجەت.
گەرمانيا مەن اقش ءوزارا تىڭشىلىققا تىيىم سالماق
گەرمانيا مەن اقش ءوزارا تىڭشىلىققا تىيىم سالاتىن كەلىسىمشارت جاساسۋ باعىتىندا جۇمىس جۇرگىزۋدە. بۇل تۋرالى گەرمانيا كانتسلەرى ۆەدومستۆوسىنىڭ وكىلى حابارلاعان.
ول بۋندەستاگتىڭ ەلەكتروندى تىڭشىلىق توڭىرەگىندەگى داۋ-جانجالدى تەرگەۋ جونىندەگى كوميتەتىنىڭ مۇشەلەرىنە گەرمانيا فەدەرالدىق بارلاۋ قىزمەتى دەلەگاتسياسىنىڭ امەريكالىق ارىپتەستەرىمەن كەزدەسكەنىن ايتىپ بەرگەن. بەلگىلى بولعان مالىمەتتەرگە قاراعاندا, شپيوندىققا قارسى كەلىسىمشارت بويىنشا كونسۋلتاتسيالار جۇرگىزۋگە ۆاشينگتوننىڭ ءوزى باستاماشى بولعان كورىنەدى.
ينتەرنەت ماتەريالدارى نەگىزىندە ازىرلەندى.
