باس سانيتارلىق دارىگەردىڭ ايتۋىنشا, بۇگىندە قحر-داعى جاعداي تۇراقتالعان, كۇندەلىكتى ءوسۋ باسەڭدەگەن. وتكەن كۇننىڭ ناتيجەسى بويىنشا اۋرۋدى جۇقتىرۋ 0,28% تومەندەگەن. الايدا, الەمنىڭ باسقا ەلدەرىندە كوروناۆيرۋستىڭ تارالۋى قارقىن الىپ جاتىر.
وڭتۇستىك كورەيا رەسپۋبليكاسىندا سوڭعى ەكى كۇندە كوروناۆيرۋستى جۇقتىرۋ ەكى ەسەگە وسكەن. بۇل جاعداي وڭتۇستىك كورەيانىڭ ەكى پروۆينتسياسىندا تىركەلگەن. كورەيادا 23 مىڭ قازاقستان ازاماتى بار. ولاردىڭ اراسىندا ناۋقاس جۇقتىرعاندار تىركەلمەگەن. سونىمەن قاتار يتاليا ەلىندە – 144, جاپونيادا – 132, سينگاپۋردا – 89, يراندا – 43, تايلاندتا – 35, مالايزيادا – 22, ۆەتنامدا 16 ناۋقاس تىركەلگەن.
«بۇل مەملەكەتتەر قازىرگى تاڭدا ءبىزدى ەرەكشە الاڭداتىپ وتىر. وسى اتالعان مەملەكەتتەرگە شىقپاۋلارىڭىزعا كەڭەس بەرەمىن. ەگەر الدىن الا جوسپارلاپ قويساڭىز بيلەت قۇنى وزگەرىسسىز قايتارىلادى. شەتەلدە ناۋقاس جۇقتىرعاندار اراسىندا قازاقستان ازاماتتارى جوق», دەدى ج.بەكشين.
ەلگە كەلىپ جاتقان ءاربىر ۇشاقتىڭ جولاۋشىلارى قاتاڭ باقىلاۋدا. سونىمەن قاتار جانداربەك بەكشين بارلىق شەكارالاس وڭىرلەرگە ءوزى بارىپ كورگەنىن العا تارتتى. سپيكەردىڭ ايتۋىنشا, بۇگىندە ەلگە كىرەتىن بارلىق جول قاتىناس تۇرلەرى قاتاڭ باقىلاۋدا. كوروناۆيرۋس ەلدە تىركەلگەن جوق.
