الدىمەن بۇل مەكەمەلەر تۋرالى از-كەم اقپارات بەرە كەتەيىك. «گارانت 24» پەن «Estate لومبارد» لومبارد رەتىندەگى قىزمەتىن ايتپاعاندا, «نەسيەلەۋدىڭ باسقا دا تۇرلەرىن» ۇسىنىپ كەلگەن. الايدا كليەنتتەرى «كوتەرىلىسكە» شىققاننان كەيىن ىلە-شالا قارجى نارىعىن رەتتەۋ جانە دامىتۋ اگەنتتىگى بۇل كومپانيالاردىڭ بانك ليتسەنزياسى جوق ەكەنىن, سايكەسىنشە قانداي دا ءبىر نەسيەلىك وپەراتسيا جۇرگىزۋگە قۇقى جوق ەكەنىن حابارلادى. اگەنتتىك بۇل ەكەۋىنىڭ ارەكەتىندە قارجى پيراميداسىنىڭ سيپاتى بار دەپ ءتۇسىندىردى. بۇل:
– وتە جوعارى تابىس تۋرالى ۋادەنى ءۇيىپ-توگۋى;
– جاڭا قاتىسۋشى تارتقانى ءۇشىن سىياقى بەرۋى;
– سالعان ينۆەستيتسيانىڭ قايتاتىنىنا كەپىلدىك بار دەپ سەندىرۋى;
– جالعان ينۆەستيتسيالىق نىسانداردى پايدالانعانى;
– جارناماسى جەر جارۋى.
قاي جاعىنان الىپ قاراساق تا, «گارانت 24» پەن «Estate لومبارد»-تىڭ جۇمىسى قارجى نارىعىن رەتتەۋشى مەكەمە ايتقان وسى سيپاتتارعا ساي كەلەدى.
زاڭدى تۇلعالارعا قاتىستى دەرەكتەردى تىركەۋمەن اينالىساتىن «ۋچەت. پروۆەركا كونتراگەنتكا» سايتىنداعى دەرەككە سۇيەنسەك, «Estate لومبارد» جشس-نىڭ باس كەڭسەسى الماتى قالاسىنداعى المالى اۋدانىنىڭ جامبىل كوشەسىندەگى 175-ۇيدە ورنالاسقان. باسشىسى نۇرجان ەلەۋوۆ ەسىمدى ازامات.
باق-تاردىڭ حابارلاۋىنشا, «گارانت 24» جاۋاپكەرشىلىگى شەكتەۋلى سەرىكتەستىگىنىڭ باسشىسى اسلان مۋرزابەكوۆ ەسىمدى ازامات. باس كەڭسەلەرى ەلوردادا ورنالاسقان لومباردتىڭ ورال, اقتوبە, اقتاۋ, پاۆلودار سىندى بىرنەشە قالادا كەڭسەسى بار. ستاتيستيكا كوميتەتىنىڭ حابارلاۋىنشا, مەكەمەدە 51-100 ارالىعىندا ادام جۇمىس ىستەگەن كورىنەدى. مەملەكەتتىك كىرىستەر كوميتەتى ونىڭ 121 مىڭ تەڭگەدەن ءسال-اق اساتىن سالىق بەرەشەگى بار ەكەنىن حابارلادى.
ىشكى ىستەر مينيسترلىگى اتالعان مەكەمەلەردىڭ جەر-جەردەگى كەڭسەلەرىنىڭ باسشىلارىن تۇتقىنداۋدا. اتاپ ايتساق, «گارانت 24»-ءتىڭ پاۆلودار, تاراز, قاراعاندى, ورال قالالارىنداعى كەڭسەلەرىنىڭ باسشىلارى ۇستالعانى بەلگىلى بولدى. «Home Avto Invest»-ءتىڭ اتىراۋداعى ديرەكتورى الدىمەن الدانعان كليەنتتەردىڭ قولىنا ءتۇستى. ونى كەپىلگە العان اتىراۋلىقتار الدىمەن اقشالارىن قايتارعاننان كەيىن بوساتامىز دەپ, كەيىن ىشكى ىستەر دەپارتامەنتىنە تاپسىردى.
جالپى, ءبىزدىڭ قوعام قارجى پيراميدالارىنىڭ قۋلىق-سۇمدىعى تۋرالى اقپاراتقا كەندە ەمەس. توقسانىنشى جىلدارداعى جابايى كاپيتاليزم كەزىندە جەر سيپاپ قالعاندار تۋرالى ايتپاعاندا, كەيىنگى جىلدارى اڭعال ازاماتتاردىڭ اقشاسىن قاعىپ العاندار تۋرالى دۇركىن-دۇركىن ايتىلىپ تا, جازىلىپ تا ءجۇر. الايدا ادامدار وتقا ۇيمەلەگەن كوبەلەك قۇساپ, قارجى پيراميدالارىن توڭىرەكتەۋدى قويار ەمەس. نەگە؟ بۇل تۋرالى الەۋمەتتانۋشى ەلميرا وتار بىلاي دەيدى:
– مۇنىڭ الەۋمەتتىك جانە پسيحولوگيالىق اسپەكتىلەرى بار. ءبىرىنشى كەزەكتە, بۇل ازاماتتاردىڭ قارجى ساۋاتىنىڭ تومەندىگىن كورسەتەدى. ءوزىنىڭ قارجى ساياساتىن دۇرىس قۇرمايتىن, ونى دۇرىس جوسپارلاي المايتىندار قارجى پيراميداسىنىڭ قۇرىعىنا وڭاي تۇسەدى. ەكىنشىدەن, كەيبىر ازاماتتار ءتۇرلى وقيعالارعا بايلانىستى ءبىر رەتتىك قارجىعا ءزارۋ بولىپ قالىپ, شاراسىزدىقتان وسىنداي جاعدايلارعا ۇرىنۋى مۇمكىن. ءۇشىنشى سەبەپ – ازاماتتاردىڭ سەنگىشتىگى. حالىق ءبىر جەردە وڭاي ولجا بار دەپ ەستىسە, مول تابىسقا كەنەلەسىڭ دەسە سەنىپ قالادى. ونىڭ ۇستىنە, «پيراميدالاردى» جارنامالاۋعا تانىمال تۇلعالار قاتىستى.
حالىق سەنبەي قايتەدى, اتاقتى ۆاينەر مەيىرجان تورەباەۆ, ءانشى ايقىن, «نايمان» دەگەن لاقاپ اتى بار ەرەجەسىز جەكپە-جەك شەبەرى قۋات حاميت سياقتى «جۇلدىزدار» جارناماسىن قاتىرىپ جاساپ بەرسە. ءبىر ايتا كەتەرلىگى, اتالعان «جۇلدىزدار» الەۋمەتتىك جەلىدە حالىقتان كەشىرىم سۇراپ, وزدەرى دە سان سوعىپ قالعانىن ايتىپ, ءتىپتى ىشكى ىستەر ورگاندارىنا ارىزدانىپ جاتىر.
جالپى, «تاقيام تولعان سوك, ەرتە تۇرسام دىم دا جوق» دەگەن جۇمباقتى ەسكە تۇسىرەتىن جاعداي پوستكەڭەستىك كەڭىستىكتەگى ەلدەر ءۇشىن تاڭسىق ەمەس. توقسانىنشى جىلدارداعى توپالاڭ تۇسىندا قارجى پيراميدالارىنىڭ تالايى قۇرىلىپ, تالايى كۇيرەپ, تالاي ادامنىڭ اۋزى كۇيگەن. دەگەنمەن ءبىر مەزگىلدە ەلدىڭ بىرنەشە قالاسىندا اشىنعان ازاماتتاردىڭ «اقشامدى قايتار!» دەپ ايقايلاپ لومبارد كەڭسەلەرىنە باسىپ كىرۋى ءبىراز جىلدىڭ بەدەرىندە بولماعان وقيعا.
الەۋمەتتانۋشى ەلميرا وتار ايتقانداي, وسىنداي وقيعالار قوعام ءۇشىن ساباق بولادى, ارينە. بىراق جاعداي قايتالانباسىن دەسەك, حالىقتىڭ قارجىلىق ساۋاتىن جەتىلدىرۋ كەرەك. سونىمەن قاتار وڭاي ولجاعا باتامىن دەپ بارىنان ايىرىلىپ قالماۋدى ۇيرەتەتىن الەۋمەتتىك جارنامالاردى كوبىرەك تاراتۋ قاجەت. وكىنىشكە قاراي, قازىر ونداي الەۋمەتتىك جارنامادان بۇرىن, الەۋمەتتى سان سوقتىراتىن جارنامالاردىڭ اتى وزىپ تۇرعان جايى بار.
