ء«داستۇرلى ءان قازاق مادەنيەتىنىڭ سان عاسىرلىق قۇپياسىن ءوز قويناۋىندا بۇگىپ جاتقان قويما ءتارىزدى. سونىڭ ىشىندە التاي, تارباعاتاي اندەرى ويداعى جانە قىرداعى باۋىرلاردىڭ ساعىنىشىنان, تابيعاتتىڭ اسەم كەلبەتىنە دەگەن سۇيىسپەنشىلىكتەن تۋىنداعان. سونىڭ ىشىندە سالت-ءداستۇرىمىزدىڭ, ادەت-عۇرپىمىزدىڭ دا كورىنىسى بار. جالپى, قازاق مادەنيەتىنىڭ اجىراماس ءبىر بولشەگى», دەيدى «حالىق ءانى» ءبولىمىنىڭ كوركەمدىك جەتەكشىسى سەكەن سىزدىق.
ورىنداۋشىلىق مانەرى ءبىر بولەك, شىعارماشىلىق ءبىتىمى باسقا التاي, تارباعاتاي اندەرىمەن قوسا, «سارىارقا» فولكلورلىق ءانسامبلى دە اۆتورلىق شىعارمالار مەن كۇيلەردى تارتۋ ەتتى. كوپشىلىكتىڭ قوشەمەتىنە بولەنگەن ونەرپازدار اراسىندا قازاقستان رەسپۋبليكاسىنىڭ مادەنيەت قايراتكەرى قاراگوز گاسيموۆا جەتىگەنمەن كونتسەرتتىڭ ناقىشىن كەلتىرسە, مادەنيەت سالاسىنىڭ ۇزدىگى شىعىس ماقان سىبىزعىدا وڭىرگە ءتان اۋەندى ءانسامبلدىڭ سۇيمەلدەۋىمەن ۇسىندى. سونداي-اق نۇراي تاناباەۆ, كۇنسۇلۋ تۇرلىبەكوۆا, دانيار مۇقان, جازگۇل دانىلباەۆا, جاقسىگەلدى ماياساروۆ, اينۇر قونىسباەۆا, نۇرجان مەيىرحان, الۋا قالىمبەكوۆا, ايدوس وڭعارباي قاتارلى انشىلەر كوپشىلىكتى ەرەكشە اسەرگە بولەدى.
