بۇگىندە ەلىمىزدىڭ جاسىل قالقانىن ۇلعايتۋ ماقساتىندا بىرلەسكەن جوبا ازىرلەنىپ جاتىر. وسى ارقىلى پارنيك گازدارىنىڭ كولەمىن ازايتۋ كوزدەلىپ وتىر. ساراپشىلاردىڭ باعالاۋىنشا, قازاقستانداعى ورمان كومىرتەگىنىڭ جالپى كولەمى 718,3 ملن توننادان استام كومىرتەگى ديوكسيدى ەكۆيۆالەنتىنە تەڭ. جاسىل بەلدەۋدىڭ 4,6%-دان 5%-عا دەيىن ارتۋى كومىرتەگىنىڭ ورماندار ارقىلى ءسىڭىرىلۋىن جىلىنا قوسىمشا 2,9 ملن تونناعا دەيىن ۇلعايتۋعا كومەكتەسەدى ەكەن. بۇل رەتتە ورمان القاپتارى سۋ رەسۋرستارىن, بيوالۋاندىلىقتى, سونداي-اق ەكوتۋريزم سىندى باعىتتاردى رەتتەپ, وڭ ىقپال ەتەتىنىن ايتا كەتكەن ورىندى.
قازاقستان 2016 جىلى كليماتتىڭ وزگەرۋى جونىندەگى پاريج كەلىسىمىن راتيفيكاتسيالاپ, جەكە سەكتوردىڭ قاتىسۋىمەن يننوۆاتسيالىق شەشىمدەردى جۇمىلدىرۋ ارقىلى 2030 جىلعا قاراي پارنيك گاز شىعارىندىسىن 15%-عا قىسقارتۋعا جوسپار قويدى.
– قازىر قازاقستانداعى اۋانىڭ نەگىزگى لاستاۋشىلارى كولىك جانە ەنەرگەتيكا سالالارى. جىل سايىن ەكوجۇيەگە تۇسەتىن سالماق ارتىپ بارادى. ياعني, ورمانسىز, پارنيك گازىنىڭ كولەمى وسە تۇسەدى. دەمەك, پاريج كەلىسىمىنىڭ ماقساتتارىنا جەتۋ قيىندادى. مۇنداي جاعدايدا مەملەكەتتەن بولەك, جەكە باستامالاردىڭ دا ماڭىزى زور. سوندىقتان ءبىز Bitfury Group كومپانياسىنىڭ كليماتتى قورعاۋ سالاسىنداعى باستاماسىن قولدايمىز, – دەدى ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ.
بۇۇ دامۋ باعدارلاماسى جاڭا ەكولوگيالىق كودەكستىڭ جوباسىنا بىرنەشە زاڭنامالىق ۇسىنىس ازىرلەدى. ونىڭ ىشىندە ورمانداردى باعالاۋدىڭ جاڭا ءادىسناماسى, سونداي-اق بۇۇ-نىڭ كليماتتىق كەلىسىمىنە ساي قازاقستانداعى زياندى شىعارىندى زاتتاردى ازايتۋ جونىندەگى جوبالار قامتىلعان.
– قازاقستان ۇكىمەتىنە قورشاعان ورتانى قورعاۋعا ارنالعان زاڭنامانى جەتىلدىرۋگە جانە تابيعاتتى ءتيىمدى باسقارۋ ءۇشىن قارجىلىق ماسەلەلەردى شەشۋگە كومەكتەسۋدى جالعاستىرامىز. اسىرەسە جەكەلەي باستامالاردى ىنتالاندىرۋعا ءمان بەرىلمەك, – دەدى بۇۇ دامۋ باعدارلاماسىنىڭ قازاقستانداعى تۇراقتى وكىلى ياكۋپ بەريش.
كەزدەسۋ سوڭىندا تاراپتار ىنتىماقتاستىق تۋرالى ۇشجاقتى كەلىسىمگە قول قويدى. سەرىكتەستەر قازاقستاندا ورمان القاپتارىن ۇلعايتۋ جانە ورمان پايدالانۋ تاجىريبەسىن جەتىلدىرۋ, سونداي-اق كليماتتىڭ وزگەرۋى تۋرالى جۇرتشىلىقتىڭ حاباردار بولۋىن كۇشەيتۋ ەسەبىنەن پارنيكتىك گازدار شىعارىندىلارىن ازايتۋ بويىنشا جۇمىس ىستەيتىن بولادى.
قازاقستانداعى Bitfury Group عالامدىق كەڭسەسى اكىمشىلىگىنىڭ باسشىسى ۆاديم كرۋتوۆ جاھاندىق ەكولوگيانى قورعاۋ ءۇشىن تۇراقتى دامۋ ماقساتتارىن تولىق قولدايتىنىن, كومپانيا قازاقستانداعى پارنيك گازىنىڭ كولەمىن ازايتۋ باعىتىنداعى بىرلەسكەن جۇمىستارعا تولىعىمەن ءازىر ەكەنىن جەتكىزدى.
