باس باپكەر اندرەي سكابەلكا گاگارين كۋبوگىنىڭ پلەي-وفف كەزەڭى الدىندا كوماندانىڭ نەگىزگى قۇرام ويىنشىلارىنا دەمالىس بەرىپ, سىرت ايدىنداعى ويىنعا كلۋبتىڭ تەك قازاقستاندىق حوككەيشىلەردەن قۇرالعان ەكىنشى قۇرامىن الىپ باردى. «بارىس» جاس ويىنشىلارمەن جاساقتالسا دا, باپكەر مەن جانكۇيەرلەرىنىڭ سەنىمىن اقتاي ءبىلدى. كەزدەسۋدى جوعارى قارقىنمەن باستاعان جەرلەستەرىمىز العاشقى 7 مينۋتتا «ادميرال» قاقپاسىنا جاۋاپسىز ءۇش شايبا سوقتى. العاشقى 4-مينۋتتا ۆالەري ورەحوۆ مەرگەندىگىمەن كوزگە تۇسسە, 6-مينۋتتا پاۆەل اكولزين ەسەپتى ەسەلەدى. ارادا ءبىر مينۋت وتكەندە ەگور پەتۋحوۆ «بارىستىڭ» ءۇشىنشى شايباسىن سوقتى. ەكىنشى كەزەڭنىڭ 33-مينۋتىندا ورەحوۆ دۋبل اۆتورى اتانعان-دى. بىراق تورەشىلەر ۆيدەو قايتالاۋدان سوڭ گولدى ەسەپتەمەي تاستادى. كەزەڭ اياقتالار تۇستا «ادميرال» حوككەيشىسى كونستانتين گلازاچەۆ كومانداسىنىڭ ويىنداعى جالعىز شايباسىن سوقتى. ءۇشىنشى كەزەڭدە كوماندالار گول سوققان جوق. قورىتىندى ەسەپ – 3:1.
«بارىس» بۇل جەڭىسىنەن كەيىن تۇراقتى بىرىنشىلىكتىڭ تۋرنير كەستەسىندە 84 ۇپايمەن ەكىنشى ورىنعا كوتەرىلدى. جەرلەستەرىمىز كەلەسى كەزدەسۋىن ەرتەڭ حاباروۆسكىنىڭ «امۋر» كومانداسىنا قارسى وتكىزەدى.
