وتكەن جەكسەنبىدە دۋبايدا وتكەن ءتۋرنيردىڭ فينالىندا سۇرىنگەن قازاقستاننىڭ ءبىرىنشى راكەتكاسى ەلەنا رىباكينا 4 ساتى جوعارىلاپ, 21-ورىننان 17-ورىنعا تۇراقتادى. وسىلايشا رىباكينا الەمدىك رەيتينگتە ءوزىنىڭ جانە قازاقستاننىڭ رەكوردىن جاڭارتتى. بۇعان دەيىنگى رەكورد تا ءدال وسى تەننيسشىمىزگە تيەسىلى بولاتىن (21-ورىن). سونداي-اق قازاقستاندىق تەننيسشىلەردەن يۋ.پۋتينتسەۆا 32-ورنىن ساقتاپ قالسا, ز.دياس ەكى ورىن جوعارىلاپ, 61- ساتىعا جايعاستى.
ەرلەر اراسىنداعى رەيتينگتە ەلىمىزدىڭ ءبىرىنشى راكەتكاسى الەكساندر بۋبليك وتكەن اپتادا فرانتسياداعى ءتۋرنيردىڭ جارتىلاي فينالىنا دەيىن جەتىپ, رەيتينگتەگى جاعدايىن ءبىرشاما جاقسارتىپ الدى. بىردەن 8 ورىنعا جوعارىلاعان بۋبليك 47-ساتىعا تۇراقتاپ, ءوزىنىڭ جەكە رەكوردىن جاڭارتتى. بۇعان دەيىن ول 55-ورىندا بولاتىن. قازاقستاننىڭ ەكس-ءبىرىنشى راكەتكاسى ميحايل كۋكۋشكين 20 ورىن تومەن سىرعىپ, 89-ساتىعا, دميتري پوپكو 167-ورىنعا تۇراقتادى.
