كاسىپقوي بوكس • 21 اقپان، 2020

جولداما ءۇشىن جۇدىرىقتاسادى

9 رەتكورسەتىلدى

ناۋرىز ايىنىڭ العاشقى اپتاسىندا يوردانيانىڭ باس شاھارى – امماندا بوكستان توكيو وليمپياداسىنا جولداما بەرەتىن ازيا جانە تىنىق مۇحيت ايماعى ەلدەرىنىڭ ىرىكتەۋ ءتۋرنيرى وتەدى. وسىدان بىرەر كۇن بۇرىن بوكستان ۇلتتىق قۇرامانىڭ باس جاتتىقتىرۋشىسى عالىمبەك كەنجەباەۆ وليمپيادا جول­داماسىنا تالاساتىن سپورتشىلاردىڭ ەسىمىن اتادى. ءبىر قىزىعى، باس باپكەر­دىڭ تىزىمىنە الەم جانە ازيا چەمپيوناتىندا توپ جارعان تاجىريبەلى بوكس­شىلار ەنبەي قالعان.

 

الدىمەن، ىرىكتەۋ تۋرنيرىنە باراتىن، باس باپكەردىڭ نازارىنا ىلىككەن بوكسشىلاردى تانىستىرىپ وتەيىك. اممان شارشى الاڭىندا ليتسەنزيا ءۇشىن جەڭىل سالماقتا 2019 جىلعى قازاقستان چەمپيوناتىنىڭ كۇمىس جانە ەل ىشىلىك سپارتاكيادانىڭ جەڭىمپازى، سونداي-اق بىلتىر رە­سەيدە وتكەن الەم چەمپيوناتىنىڭ قو­لا جۇل­دەگەرى ساكەن بيبوسىنوۆ (52 كگ) جۇ­دىرىقتاسادى. 2016 جىلى ريو وليم­پياداسىنا قازاقستاندىقتاردان بۇل سالماقتا ولجاس ساتتىباەۆ ءدال وسى تۋر­نيردە جولداما العان بولاتىن.

57 كيلو سالماقتا ىرىكتەۋ جارىسىنا جانكۇيەرلەر قۇرامانىڭ ءنومىر ءبىرىن­شى بوكسشىسى، 2017 جىلعى الەم چەمپيوناتىنىڭ باس جۇلدەسىن جەڭىپ العان قايرات ەراليەۆ باراتىنىنا سەنىمدى بولعان. الايدا باس باپكەر بۇل جولعى جارىستا 22 جاستاعى بوكسشى سەرىك تەمىرجانوۆتى سىناپ كورگىسى كەلگەن ەكەن. دەگەنمەن سوڭعى ۋاقىتتا ەراليەۆتىڭ ونەرى باپكەرلەردىڭ كوڭىلىنەن شىقپاي جۇرگەنگە ۇقسايدى. ويتكەنى الەم چەمپيوناتىندا تاجىريبەلى بوكس­شىمىز شيرەك فينالدا وزبەك بوكسشىسىنان جەڭىلىپ، ەكى جىل بۇرىنعى اتاعىن قورعاي المادى. ال جاس تا بولسا بىرقاتار حالىقارالىق تۋرنيردە جەڭىسكە جەتكەن س.تەمىرجانوۆ «استانا ارلاندارى» ساپىندا جۇدىرىقتاسىپ، ءبىراز تاجىريبە جيناقتاعان.

63 كيلو سالماقتا ازيا چەمپيونا­تىنىڭ كۇمىس جۇلدەگەرى زاكىر سافيۋل­لينگە سەنىم ارتىلدى. سونداي-اق بۇل زاكىر ءۇشىن وليمپيا ويىندارىنا با­رۋعا سوڭعى مۇمكىندىك. ويتكەنى 34 جاس­تاعى بوكس­شى كەلەسى وليمپياداعا دەيىن قولعابىن شەگەگە ىلەتىنى انىق. نەگىزى سافيۋللين 2016 جىلى ريو وليم­­پياداسىنا ىرىكتەۋ جارىسىنا بارىپ، جولداما العان بولاتىن. الايدا سول كەزدە AIBA Pro Boxing جوباسىندا جەڭىمپاز اتانعان بەرىك ءابدىراحمانوۆ زاكىردەن بۇرىن جولداما العان سوڭ، ريوعا ءابدىراحمانوۆ باردى.

«قازاقتىڭ سالماعى» اتانىپ كەتكەن 69 كيلودا الەم چەمپيوناتىنىڭ ەكى دۇركىن قولا جۇلدەگەرى ابىلايحان ءجۇسىپوۆ جۇدىرىقتاساتىن بولدى. ءدال قازىرگى ۋاقىتتا ءجۇسىپوۆ ءوز سالماعىندا قۇرامانىڭ ءنومىر ءبىرىنشى بوكسشىسى سانالادى. 2018 جىلى اقتاۋدا وت­كەن ەل چەمپيوناتىنىڭ فينالىندا ءوزىنىڭ نەگىزگى قارسىلاسى اسلانبەك شىم­بەرگەنوۆتى ايقىن باسىمدىقپەن جەڭ­گەن ەدى. بۇل ابىلايحان ءجۇسىپوۆتىڭ وليم­پيا ويىندارىنا باراتىن ەكىنشى مۇم­كىندىگى.

75 كيلودا باپكەر تاڭداۋى جاراقا­تىنان ايىعىپ، ۇلتتىق قۇراماعا ورالعان ءابىلحان امانقۇلعا تۇسكەن. الەم چەمپيوناتى جانە ازيا ويىندارىنىڭ كۇمىس جۇلدەگەرى بىلتىر نەگىزگى جارىستارعا قاتىسقان جوق. ونىڭ ورنىنا بارعان تۇرسىنباي قۇلاحمەت تايلاندتا وتكەن ازيا بىرىنشىلىگىندە قارسىلاس شاق كەلتىرمەسە، رەسەيدە ۇيىمداستىرىلعان الەم­دىك دودادا جارتىلاي فينالعا دەيىن جەتكەن-ءدى. باپكەرلەر قۇرامى اممان­داعى باسەكەدە امانقۇلعا سەنىم ارتقان سوڭ، قۇلاحمەت ءوز كەزەگىن كۇتپەستەن بىر­دەن كاسىپقوي بوكستىڭ ەسىگىن اشتى.

81 كيلودا 2019 جىلعى الەم چەمپيونى بەكزات نۇرداۋلەتوۆكە سەنىم ارتاتىن بولامىز. رەسەيدەگى الەم چەمپيوناتىندا كۋبالىق قارا مارجاندى ەسەڭگىرەتكەن ماڭعىستاۋلىق ورەن قۇرامانىڭ ءسوزسىز ءبىرىنشى ءنومىرى اتاندى. ال 91 كيلودا ريو وليمپياداسىنىڭ كۇمىس جۇلدەگەرى ۆاسيلي لەۆيت پەن اسا اۋىر سالماقتا قۇراما كاپيتانى، الەم چەمپيوناتىنىڭ ەكى مارتە كۇمىس جۇلدەگەرى قامشىبەك قوڭقاباەۆ جولداماعا تالاسادى. بۇل سالماقتاردا اتالعان ەكى بوكسشىعا ازىرشە لايىقتى قارسىلاس جوق. 

يوردانياداعى تۋرنيردە بوكس­شىلارعا 63 جولداما بەرىلەدى. مىسالى، 52، 57 جانە 60 كيلو سالماقتاعى بوكس­شى­لارعا 6 جولداما، ياعني جارتىلاي فينال­عا شىققان 4 جانە شيرەك فينالدا جەڭىسكە جەتكەن ەكى مىقتى بوكسشى جولداماعا يە بولادى. ال 69، 75 جانە 81 كيلو سالماقتاعى بوكسشىلارعا 5 جولداما بەرىلەدى. 91 جانە 91 كيلودان جوعارى سالماقتاعى بوكسشىلارعا 4 جولداما قاراستىرىلعان. ياعني جارتىلاي فينالعا شىققان ءتورت بوكسشى توكيوعا بارادى. قالعان جولدامالار قىزدار بوكسىنا تيەسىلى.

ايتا كەتەلىك، توكيو وليمپياداسىنا ىرىكتەۋ ءتۋرنيرى 3-11 ناۋرىز ارالىعىندا وتەدى. قازاقستان قۇراماسى يوردانياعا 28 اقپان كۇنى اتتانادى.

 

سوڭعى جاڭالىقتار

ەرلىكتى دارىپتەيتىن قوماقتى قور

رۋحانيات • 05 ماۋسىم، 2020

ۇقساس جاڭالىقتار