الەم • 19 اقپان، 2020

Xiaomi اۋانى باقىلاۋىندا ۇستايتىن «اقىلدى» ماسكا جاسايدى

291 رەتكورسەتىلدى

بۇل بولاشاق ءۇشىن تاپتىرماس گادجەتكە اينالار ەدى. كوروناۆيرۋس شىققالى بەرى ماسكا دەگەنىڭىز تاپشى تاۋارعا اينالعانىن بىلەمىز. 91mobiles.com پورتالىنىڭ حابارلاۋىنشا، قىتايدا بۇل وتە وزەكتى ماسەلە بولعاندىقتان Xiaomi كومپانياسى «اقىلدى» ماسكانى شىعارۋدى قولعا الماقشى ەكەن.

اتالمىش گادجەت قازىر پاتەنتتەلۋ ۇستىندە. بۇل قۇرالدىڭ ىشىندە پروتسەسسورى بار ارنايى مودۋل بولادى. مودۋلدا اقپارات ساقتايتىن قۇرىلعى، باتارەيا بلوگى جانە مالىمەت الماساتىن تاراتقىش ورنالاسادى. وعان قوسا ماسكا اۋانى فيلتردەن وتكىزىپ تازالايدى.

لاستانعان اۋانىڭ مولشەرىن انىقتاپ، پايدالانۋشى قانشا ۋاقىت ماسكانى كيىپ جۇرگەنىن كورسەتىپ تۇرادى. ماسكانى قولدانبا ارقىلى سمارتفوننان باقىلاي الاسىز. ياعني، اۋانىڭ قۇرامىن قاداعالاپ، اقپاراتتاردى سالىستىرىپ وتىرۋعا مۇمكىندىك بولادى.

ماسكادا ادامنىڭ قالاي جانە قانداي اۋامەن دەم العانى نەمەسە قانشا ۋاقىت قوزعالىستا بولعانى سياقتى فاكتورلاردى تىركەيتىن بىرنەشە گيروسكوپ پەن داتچيك جۇمىس ىستەيدى.  وسى مالىمەتتەر نەگىزىندە قولدانبادان قانداي اۋامەن دەم الىپ جۇرگەنىڭىز، ونىڭ زيانى جانە ماسكا قانشالىقتى پايدالى بولىپ جاتقانى تۋرالى بىلە الاسىز.  

ازىرگە گادجەت تۋرالى رەليز بولماعاندىقتان ونىڭ باعاسى مەن باسقاداي تەحنيكالىق سيپاتتامالارىن ايتۋدىڭ رەتى جوق. سول سەبەپتى دە قۇلاعىمىز تۇرىك جۇرسە، جاقىن بولاشاقتا بۇل ماسكا تۋرالى جاڭالىقتاردان تولىق اقپارات الاتىن بولامىز

سوڭعى جاڭالىقتار

ۇقساس جاڭالىقتار