بۇگىن, ياعني تامىزدىڭ 13-ىنە قاراعان ءتۇنى جەر پەرسەيد مەتەوريتتەر شوعىرىنىڭ نەگىزگى ايماعىنا كەلگەن كەزىندە اسپاننان جۇلدىزداردىڭ جاپىرلاپ جاۋىپ جاتقانىن انىق كورۋگە بولادى. بۇل تۋرالى يتار-تاسس حابارلادى.
«بۇل وسى جىلعى جۇلدىز جاۋدىڭ ەڭ جوعارى دەڭگەيى بولماق», دەپ جازدى بريتانيانىڭ «بي-بي-سي» كورسەتىلىم كورپوراتسياسى.
وسىناۋ ەرەكشە اسەرلى شاق جەر پلانەتاسى سۆيفت-تۋتتليا كومەتاسىمەن تۇستاس كەلگەن كەزدە پايدا بولادى. ودان ءبولىنىپ شىعىپ جاتاتىن مۇز بولىكتەرى مەن ۇساق شاڭدار ءبىزدىڭ پلانەتامىزدىڭ اتموسفەراسىنا دەيىن جارقىراپ جانىپ جەتەدى.
بريتانيا استرونومدارى بۇگىن تۇندە زەڭگىردىڭ جۇزىندە 100 ۇساق مەتەوريتتىڭ جانىپ وتەتىنىن ايتىپ وتىر. عارىشتىق بۇل قويىلىم كەشكى ءىڭىر تۇسكەننەن باستالىپ, تاڭسارىدە ءوزىنىڭ شارىقتاۋ شەگىنە جەتەدى.
بەلفاست ۋنيۆەرسيتەتىنىڭ پروفەسسورى ەۋين الەن فيتسزيممونس ءمالىم ەتكەندەي, «سۆيفت-تۋتتليا كومەتاسى جەرگە سوڭعى 2125 جىلدان بەرى ءبىرىنشى رەت وسىنشالىقتى جاقىنداپ كەلەدى, بىراق ولاردىڭ سوقتىعىسى بولمايدى». عالىمدار كومەتانىڭ يادروسىنىڭ ديامەترى 26 كيلومەتر بولاتىنىن ەسەپتەپ شىعاردى.
مۇرات ايتقوجا.
