وسكەمەن قالاسىندا تۇراتىن 50 جاستاعى ايەل ءوزىنىڭ 6 جاسار ۇلىن سۋعا باتىرىپ, اعىزىپ جىبەرۋگە ارەكەت جاسادى. بۇل تۋرالى Altaynews.kz ءتىلشىسى حابارلادى.
وقيعا 10 تامىز, سەنبى كۇنى ورىن الدى. سول كۇنى ءتۇس كەزىندە 15 جاسار ءجاسوسپىرىم پوليتسياعا تەلەفون شالىپ, ەرتىس وزەنىنىڭ بويىنداعى كوتلاۆاندا الدەقانداي ءبىر ايەلدىڭ كىشكەنتاي بالانى سۋعا تۇنشىقتىرىپ ولتىرمەك بولىپ جاتقانىن جەتكىزدى.
وسى كەزدە سول ماڭايدا ءبىر توپ ءجاسوسپىرىم بالالار سۋعا ءتۇسىپ جاتىر ەكەن. قوڭىراۋ شالعان سولاردىڭ ءبىرى بولىپ شىقتى. ول ايەلدىڭ ءبۇلدىرشىندى تۇرسيىنە دەيىن شەشىندىرىپ, سوسىن قولىنان جەتەكتەپ, ارىراق اپارىپ, سۋعا باتىرا باستاعانىن بايقاپ قالادى. مۇنى كورگەن ءجاسوسىپىرىم كوپ ويلانباستان, سولارعا قاراي تەز ءجۇزىپ جەتەدى. ول بارعان بويدا جىلاپ تۇرعان بالانى ايەلدىڭ قولىنان تارتىپ الىپ, دەرەۋ «جەدەل جاردەمگە» , توتەنشە جاعدايلار دەپارتامەنتىنە جانە پوليتسياعا حابارلاسادى.
قازىر ايەل وبلىستىق پسيحونەۆرولوگيالىق ديسپانسەردە تەكسەرىلىپ جاتىر.
ازىرگە ول سودان كەيىن ءوزى دە ومىرمەن قوشتاسپاق بولعان دەگەن عانا بولجام بار.
قۇرىش نۇرىمبەت.
