ايماقتار • 17 اقپان، 2020

تۇركىستاندا رەسپۋبليكالىق اتا-انالار فورۋمى ءوتتى

86 رەتكورسەتىلدى

تۇركىستان قالاسىندا اتا-انالاردى ءبىلىم سالاسىنداعى وزىق ترەندتەرمەن، قۇندىلىقتارعا نەگىزدەلگەن ءبىلىم بەرۋ ءادىس-تاسىلدەردىڭ ەرەكشەلىكتەرىمەن تانىستىرۋ جانە پەداگوگيكالىق، پسيحولوگيالىق ساۋاتتىلىعىن ارتىرۋ ماقساتىندا رەسپۋبليكالىق فورۋم ءوتتى.

قوعام نازارىن ءبىلىم سالاسىنا اۋدارۋ، پەداگوگ مارتەبەسىن كوتەرۋ، ۇستازدارعا قولداۋ كورسەتۋگە ۇندەگەن اۋقىمدى شاراعا 400-دەن استام اتا-انا قاتىستى. «اتا-انا، ۇستاز، وقۋشى: بولاشاققا باعىتتالعان ىنتىماقتاستىق» تاقىبىرىندا وتكەن فورۋمدا ماڭىزدى ماسەلەلەردى تالقىلاۋعا قىزىلوردا، تاراز، شىمكەنت قالالارى مەن تۇركىستان وبلىسىنان اتا-انالار، قامقورشىلىق كەڭەسىنىڭ توراعالارى، كاسىپوداق كەڭەسىنىڭ مۇشەلەرى، مەكتەپ ديرەكتورىنىڭ تاربيە ءىسى جونىندەگى ورىنباسارلارى مەن جاستار ۇيىمىنىڭ مۇشەلەرى اتسالىستى.

«وتباسىندا كوپ كوڭىل بولىنبەيتىن بالالار جىلۋلىقتى سىرتتان ىزدەي باستايدى. ولاردىڭ اراسىندا ءتۇرلى وقيعالارعا تاپ بولىپ، تىعىرىقتان شىعا الماي قالاتىنى بولادى. وسىدان بالا بويىندا قاتىگەزدىك قاسيەت، ال اتا-انالاردا «تاربيەگە كونبەيتىن بالا» دەگەن ۇعىم قالىپتاسادى. بالالارىمىزدىڭ جانى مەن ءتانى امان بولسىن دەسەك، بارلىق ىسكە بىرلەسە جۇمىلعان ءجون. اتا-انانىڭ بالا تاربيەسىنە دەگەن كوزقاراسى مەن ولارمەن قارىم-قاتىناسى قالىپتى بولۋى كەرەك»، دەدى جيىن بارىسىندا تۇركىستان وبلىستىق ادامي الەۋەتتى دامىتۋ باسقارماسىنىڭ باسشىسى راقىمبەك جولاەۆ. سونداي-اق وبلىستىڭ باس ۇستازى بالا مەن اتا-انا اراسىنداعى بايلانىستى نىعايتۋ ءۇشىن، ءوڭىردىڭ بارلىق ءبىلىم ۇيالارىندا قولعا الىنعان رۋحاني-ادامگەرشىلىك تاربيەنىڭ دامۋىنا تىكەلەي ىقپال ەتەتىن شارالار جايلى ايتىپ ءوتتى.

ايتا كەتەلىك، تۇركىستان وبلىسىندا مەكتەپ پەن وتباسى اراسىنداعى بايلانىستى نىعايتۋ ماقساتىندا اۋقىمدى ءىس-شارالار جۇزەگە اسىرىلۋدا. مىسالى، وتباسىلىق تاربيە باعىتىندا، اسىرەسە، اكەلەرمەن جۇمىستى جانداندىرۋ بويىنشا بىلتىر «اكەلەر مەكتەبى» اشىلعان بولاتىن. بۇگىندە اۋداندىق، قالالىق ءبىلىم بەرۋ ۇيىمدارىندا ارداگەرلەردىڭ - 800، اكەلەردىڭ - 900 جانە تالىمگەرلەردىڭ 709 كەڭەسى جۇمىس ىستەيدى.

سوڭعى جاڭالىقتار

ۇقساس جاڭالىقتار