ءبىرىنشى كەزەڭدە ەسەپ اشىلعان جوق. ۇزىلىستەن كەيىن نيكيتا ميحايليس گول سوعىپ, جەرلەستەرىمىزدى ەسەپتە العا شىعارعان-دى. بىراق 28 جانە 35-مينۋتتا «اۆتوموبيليست» ويىنشىلارى ءبىزدىڭ قاقپاعا قاتارىنان ەكى شايبا توعىتىپ, تارازى باسىن وزدەرىنە اۋداردى. گول اۆتورلارى – ەۆگەني موزەر مەن پيتەر حوللاند. دەگەنمەن كەزەڭ اياقتالار تۇستا «بارىس» شابۋىلشىسى يرو پاكارينەن مەرگەندىگىمەن كوزگە ءتۇسىپ, ەسەپتى تەڭەستىرىپ كەتتى.
ءۇشىنشى كەزەڭ باسىندا سان باسىمدىعىنا يە بولعان «بارىس» حوككەيشىلەرى قارسىلاس كوماندانىڭ قاقپاسىنا ءۇشىنشى شايباسىن سوقتى. بۇل جولى داستين بويد تابلوعا ءوز اتىن جازدىردى. ال كەزدەسۋدىڭ 57-مينۋتىندا رومان ستارچەنكو ويىننىڭ نۇكتەسىن قويدى. قورىتىندى ەسەپ – 4:2. ءبىر قىزىعى, وسىدان ەكى اپتا بۇرىن ەكى كوماندا مۇزايدىندا جولىققان بولاتىن. سول كەزدەسۋدە دە جەرلەستەرىمىز 4:2 ەسەبىمەن باسىم تۇسكەن-ءدى.
قازىرگى كەزدە «بارىس» كومانداسى جارىس كەستەسىندە ءۇشىنشى ورىندا كەلەدى. 56 ويىننان كەيىن جەرلەستەرىمىزدىڭ ەنشىسىندە 75 ۇپاي بار. ەلوردا حوككەيشىلەرى كەلەسى كەزدەسۋىن بۇگىن ماسكەۋدە تسسكا كلۋبىنا قارسى وتكىزەدى.
