سۋرەت: ult.kz
«مۇناي جانە مۇناي ونىمدەرىنىڭ زاڭسىز اينالىمى دا قىلمىستىق توپتاردىڭ بايۋ كوزدەرىنىڭ ءبىرى بولىپ وتىر. وڭتۇستىك قازاقستان وبلىسىندا مۇنايدى قۇبىر ارقىلى ۇرلاۋمەن اينالىسقان ۇيىمداسقان قىلمىستىق توپتىڭ 10 مۇشەسى قازىر قاماۋدا سوت ۇكىمىن كۇتىپ وتىر. ولاردىڭ ىشىندە قۇبىرلاردى كۇزەتۋگە مىندەتتى «SEMSER Securiti» كۇزەت اگەنتتىگى» جشس ديرەكتورى ن.مولتاەۆ تا بار», – دەدى رەسمي وكىل.
قىلمىستىق ءىس ماتەريالدارى بويىنشا اتالمىش توپ مۇشەلەرى 2012 جىلدىڭ شىلدە-جەلتوقسان ايلارى ارالىعىندا 17 ملن. تەڭگەدەن استام سوماعا 4000 توننا كولەمىندە شيكى مۇنايدى ۇرلاۋدى جۇزەگە اسىرعان. ولار مۇنايدى «قۇمكول-پاۆلودار-شىمكەنت» قۇبىرىنان الىپ, تاسىمالداپ اكەتىپ وتىرعان. البەتتە, توپ مۇشەلەرى «قارا التىندى» ودان ارى ساتۋ ماقساتىندا ۇرلاعان. جانە سول جوسپارلارىن ۇدايى ورىنداپ وتىرعان.
قارجى پوليتسياسى اگەنتتىگى مەن اتىراۋ, اقتوبە جانە باتىس قازاقستان وبلىستارى دەپارتامەنتتەرىنىڭ قىزمەتكەرلەرى وسى كۇندەرى جۇرگىزىلگەن كەڭ اۋقىمدى وپەراتسيا ناتيجەسىندە 2012-2013 جىلدارى مۇنايدىڭ زاڭسىز اينالىمى سالاسىندا قىزمەت ەتكەن باسقا دا قىلمىستىق توپتى اشكەرەلەگەن.
«قازاقستاننىڭ 6 جانە مولدوۆانىڭ 2 ازاماتىنان تۇراتىن توپ اقتوبە وبلىسىنداعى كەن ورىندارىنان جالپى كولەمى 739 توننا مۇناي ۇرلاعان», – دەپ اتاپ ءوتتى وسى ورايدا م.جۇمانباەۆ. ونىڭ ايتۋىنشا, ۇرلانعان مۇنايدىڭ 365 تونناسى پەشتىڭ جانار-جاعارمايى تۇرىندە الىس شەتەلدەرگە ەكسپورتقا شىعارىلعان. قالعان بولىگى, ياعني 373 تونناسى جونەلتىلۋ كەزىندە توقتاتىلدى. وسىمەن بىرگە, وپەراتسيا بارىسىندا قىلمىستىق توپتىڭ بارلىق مۇشەلەرى قولعا ءتۇستى. ولار سوت سانكتسياسىمەن تۇگەلدەي قاماۋعا الىندى.
«قىلمىستىق توپتىڭ باسشىسى كامالۋتدينوۆ جانە ونىڭ سىبايلاسى «Bimol Oil» جشس ديرەكتورى يزيموۆ قاماۋعا دەيىن قارجى پوليتسياسى قىزمەتكەرلەرىنە پارا بەرۋ ارقىلى وسى قىلمىستىق توپتىڭ قىزمەتىن تەكسەرۋدى توقتاتۋعا ارەكەت جاساعان. بۇل فاكتىلەر بەكىتىلىپ, ولار بويىنشا قىلمىستىق ىستەر قوزعالدى. تەكسەرىستى توقتاتۋ جانە وسى توپقا ءارى قاراي قامقورلىق جاساۋ ءۇشىن 755 مىڭ تەڭگە سوماسىندا اتىراۋ وبلىسىنىڭ قارجى پوليتسياسى قىزمەتكەرلەرىنە, وعان قوسا 630 مىڭ تەڭگە سوماسىندا اقتوبە وبلىسىنىڭ قارجى پوليتسياسى قىزمەتكەرلەرىنە پارا بەرۋ فاكتىلەرى بويىنشا قىلمىستىق ىستەر قوزعالدى», – دەپ بايانداپ ءوتتى رەسمي وكىل.
قۇرىش نۇرىمبەت.
