سالتاناتتى شاراعا قازاقستاننىڭ تۇركياداعى ەلشىسى ابزال ساپاربەك ۇلى, قازاقستاننىڭ مادەنيەت جانە سپورت ۆيتسە-ءمينيسترى ەلدوس رامازانوۆ, تۇركسوي باس حاتشىسى دۇيسەن قاسەيىنوۆ, «ترت اۆاز» ديرەكتورى سەدات ساعىركايا, كەچيورەن مۋنيتسيپاليتەتىنىڭ باسشىسى تۋرگۋت التىنوك, قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ قامقورشىلىق كەڭەسىنىڭ توراعاسى مۇسا يىلدىز, سونداي-اق تۇركى كەڭەسىنە مۇشە مەملەكەتتەردىڭ ەلشىلەرى, شەتەلدىك ديپلوماتتار, زيالى قاۋىم وكىلدەرى جانە قازاقستاندىق ستۋدەنتتەر قاتىستى.
ءىس-شارانى اشقان تۇركسوي باس حاتشىسى د.قاسەيىنوۆ ەلباسى نۇرسۇلتان نازارباەۆتىڭ «ابايدى تانۋ – قازاقستاندى, قازاق حالقىن تانۋ» دەگەن سوزىنە نازار اۋدارىپ, تۇركى الەمىنىڭ مادەني استاناسى - وش قالاسىندا وتكەن تۇركىتىلدەس مەملەكەتتەردىڭ مادەنيەت مينيسترلەرىنىڭ جينالىسىندا 2020 جىل اباي جىلى دەپ جاريالانعانىن ەسكە سالدى.
ەۋرازيا جازۋشىلار وداعىنىڭ توراعاسى ياكۋب ومەروگلۋ اباي – قازىرگى قازاق ادەبيەتىنىڭ نەگىزىن قالاۋشى, تۇركى تىلدەس حالىقتاردىڭ رۋحاني قازىناسىنا باعا جەتپەس ۇلەس قوسىپ قانا قويماي, قازاق حالقىنىڭ ۇلت رەتىندە قالىپتاسۋىنا ۇلكەن ۇلەس قوسقانىن اتاپ ءوتتى.
سالتاناتتى جيىن بارىسىندا ەلشى ا. ساپاربەك ۇلى مەملەكەت باسشىسى قاسىم-جومارت توقاەۆتىڭ «اباي جانە قازاقستان ءححى عاسىرداعى» اتتى ماقالاسىندا زياتكەرلىك ۇلت قالىپتاستىرۋ يدەياسى ابايدان باستاۋ الاتىنىن اتاپ ءوتتى. ءوز سوزىندە ول ۇلى ويشىلدىڭ ادامگەرشىلىك مۇراسىن زەرتتەۋدىڭ ماڭىزدىلىعىن اتاپ ءوتتى.
كەش سوڭىندا قازاقستان, قىرعىزستان, مولدوۆا, وزبەكستان جانە ازەربايجان ارتىستەرى تۇركيانىڭ پرەزيدەنتتىك سيمفونيالىق وركەسترىنىڭ سۇيەمەلدەۋىمەن ابايدىڭ مۋزىكالىق مۇراسىن ورىندادى. تالانتتى ارتىستەر كورەرمەندەردى ۇلى اقىننىڭ «ايتتىم سالەم, قالامقاس», «جەلسىز تۇندە جارىق اي», «كوزىمنىڭ قاراسى» جانە ت. ب. شىعارمالارىمەن قۋانتتى.
سونىمەن قاتار «ترت اۆاز» تەلەارناسى سالتاناتتى كونتسەرتتى تولىعىمەن ءتۇسىرىپ, 350 ميلليون كورەرمەنگە كونتسەرتتى كورۋگە مۇمكىندىك بەردى.
