E-mail - ەلەكتروندىق پوشتا
ينتەرنەت پايدا بولعاننان بەرى بۇل قىزمەتتى ءبارىمىز پايدالانامىز جانە وندا جەكە باستان باستاپ قىزمەتكە قاتىسى بار اقپاراتتىڭ الۋان ءتۇرىن ساقتايمىز. ەگەر ءبىر پوشتانى جەكە ماقساتقا دا جانە جۇمىس بابىندا دا قولدانساڭىز, قاۋىپ-قاتەر 2 ەسەگە ارتادى. وسى ەلەكتروندىق پوشتا ارقىلى الەۋمەتتىك جەلىلەر بولسىن نەمەسە باسقاداي قىزمەت كورسەتەتىن سايتتار بولسىن, كوپتەگەن اككاۋنت اشاسىز. پوشتا جاشىگىڭىز بۇزىلعان جاعدايدا قىزمەتىڭىزگە قاتىستى كوممەرتسيالىق مالىمەتتەر نەمەسە باسقاداي قۇندى اقپاراتتار قولدى بولىپ كەتەدى. سوندىقتان سيپاتىنا قاراي بىرنەشە ەلەكتروندىق پوشتا ۇستاعانىڭىز ابزال. E-mail ارقىلى اككاۋنتتار مەن جەكە كابينەتتەردىڭ قۇپياسوزىن بىلگەن الاياق PayPal پەن ينتەرنەت-بانكينگ جۇيەلەرىنە وڭاي كىرىپ قارجىڭىزدى قىمقىرىپ كەتەدى.
اككاۋنتتار
اككاۋنتتى كوبىمىز قولايلى بولعاندىقتان ەلەكتروندىق پوشتا ارقىلى تىركەيمىز. ال, ول اككاۋنتىڭىزعا بانك كارتاسى بايلانعان بولسا, قانداي ساقتىق كەرەك ەكەنىن باجايلاي بەرىڭىز. سول سەبەپتى دە لوگيندى الەۋمەتتىك جەلىلەردە وڭاي كوزگە تۇسەتىن ەلەكتروندىق پوشتامەن اتاماعان دۇرىس امالداردىڭ ءبىرى.
ويىندارداعى جەكە جازبالار
كومپيۋتەرلىك ويىن قارجىنى كەرەك ەتەتىن دۇنيەلەردىڭ ءبىرى. تانكىگە اپگرەيد جاساۋ نەمەسە جاڭا ويىنشى ساتىپ الۋ دەگەن سياقتى ساۋدا تۇرلەرى بار. جازباڭىزدى بۇزىپ كىرگەن ۇرى وزىڭىزگە قايتا ساتۋى نەمەسە سول جەردەگى بانك كارتاسى ارقىلى قارجى جىمقىرۋى ابدەن مۇمكىن.
تولقۇجات نەمەسە جەكە كۋالىكتىڭ كوشىرمەلەرى
قازىر وڭاي بولعانىنا قۋانىپ, پويىزعا جىلدام بيلەت الا قويايىن دەپ مەسسەندجەر, ەلەكتروندىق پوشتا نەمەسە الەۋمەتتىك جەلى ارقىلى جەكە قۇجاتىڭىزدىڭ سكان كوشىرمەسىن تۋىسىڭىزعا بولماسا تانىسىڭىزعا جىبەرە سالاسىز. ال, بۇل ءوز كەزەگىندە سول قۇجاتىڭىزدىڭ كوشىرمەسى الاياقتىڭ قولىنا ء تۇسۋ ىقتيمالدىلىعىن كوبەيتەدى. قۇجات كوشىرمەسىمەن باسقا بىرەۋدىڭ اتىنان الاياقتار نەسيە الىپ, قانشاما ادام سان سوعىپ قالعانىنا كۋا بولىپ ءجۇرمىز. كەيبىر جاعدايدا قۇجات مالىمەتتەرىن تولتىرا وتىرىپ, ونلاين رەجيمدە دە نەسيەگە ءوتىنىم بەرۋگە بولاتىنىن ۇمىتپاعان ءجون. تىپتەن, ءسىزدىڭ اتىڭىزدان نەسيە الماسا دا ءسىزدى كەپىل ادام رەتىندە جازىپ جىبەرەدى. ودان كەيىن اقتالىپ كورىڭىز!
وسى كوشىرمە ارقىلى ءسىزدىڭ اتىڭىزدان سيم-كارتا ساتىپ الۋعا بولادى. البەتتە, نەسيە ماسەلەسى سياقتى بانكتەن قالاي مەن ءوزىم جەكە باسىم بارماسام مۇنىڭ ءبارىن قالاي رەتتەۋگە بولادى دەپ تاڭ قالماڭىز. ويتكەنى الاياقتاردىڭ سىبايلاستارى تەك بانك قانا ەمەس قۇقىق قورعاۋ ورگاندارىندا دا وتىراتىنىن ەسكە تۇسىرسەڭىز بولدى.
جوعارىداعى تاسىلمەن ءسىزدىڭ اتىڭىزدان فيرما نەمەسە كومپانيا اشىپ تاستايدى. ءوزىڭىزدى باسشى رەتىندە العا تارتىپ, قارجىلىق ايلا-شارعىلار جاساپ جەر سوقتىرىپ كەتۋ الاياق ءۇشىن ءتيىمدى دە پايدالى امال. ءتۇرلى سايتتاردا ءسىزدىڭ اتىڭىزدان جازبالار تىركەپ وسى تەكتەس ءاس-ارەكەتتەر جاسالادى.
وتىرعىزۋ تالونى
قازىر ۇشاقپەن نەمەسە پويىزبەن ساپارعا شىقساق, زامان تالابىنا ساي وتىرعىزۋ تالونىن بەرەدى. وسى تالونىڭىزدى ءبىر ساتكە نازارىڭىزدان تىس قالدىرساڭىز, ۇرلاماعان كۇننىڭ وزىندە الاياق سۋرەتكە ءتۇسىرىپ السا, بولعانى. ال, كەيبىرەۋىمىز جول ءجۇرىپ كەلگەن سوڭ الگى جول قۇجاتىن لاقتىرا سالاتىن دا ادەتىمىز بار. ارى قاراي نە بولاتىنىن باجايلاي بەرىڭىز.
اۆياكومپانيا بەرگەن بونۋستىق كارتانىڭ ءنومىرىن بىلگەن ارام ويلى ادام ءسىزدىڭ جەكە كابينەتىڭىزگە كىرىپ رەيسكە تىركەلۋ سياقتى امالدار جاساي الادى. PNR (Passenger name record) برونداۋ كودى ارقىلى ءسىزدىڭ بۇكىل مارشرۋتىڭىز عانا ەمەس, تولقۇجاتتاعى اتى-ءجونىڭىز, تۋعان كۇنىڭىز بەن جىلىڭىز, ودان قالدى بانك كارتاسى نەمەسە تەلەفون ءنومىرى سياقتى مالىمەتتەرىڭىزدى بىلۋگە بولادى. PNR تۋرالى اقپارات وتىرعىزۋ تالونى عانا ەمەس بيلەتتەگى شتريح-كودتان دا شىعاتىنىن ۇمىتپاعايسىز. مۇنىڭ ءبارى الاياققا نە ءۇشىن كەرەك؟ ءسىزدىڭ كەرى قايتاتىن بيلەتىڭىزدى وتكىزە نەمەسە رەيس كۇنى مەن ۋاقىتىن اۋىستىرا الادى. بايلانىس وپەراتورىنا ءسىزدىڭ اتىڭىزدان حابارلاسا وتىرىپ, جوعالدى دەگەن سىلتاۋمەن جاڭا سيم-كارتا الۋىنا مۇمكىندىك بار. قاي كەزدە ۇيدە بولمايتىندىعىڭىزدى بىلسە, ءۇيىڭىزدى توناۋعا دا ارەكەتتەر جاسالادى.
جۇرگىزۋشى كۋالىگىنىڭ ماعلۇماتتارى
كۋالىك العان ادام الەۋمەتتىك جەلىلەرگە ماقتانىشپەن ونى سۋرەتكە ءتۇسىرىپ سالىپ قوياتىندارى دا بار. ونىڭ كەرەكتى مالىمەتتەرىن العان الاياق ونىڭ كوشىرمەسىن جاساپ, كەزىندە جول ەرەجەسىن ورەسكەل بۇزىپ, اۆتوموبيل ايداۋ قۇقىعىنان ايرىلعان ادامنىڭ سۋرەتىن وڭاي ورنالاستىرا سالادى. وسىنداي جۇرگىزۋشىنىڭ كەزەكتى ءتارتىپ بۇزعانىنا ءسىز جاۋاپتى بولىپ شىعا كەلەسىز.
سونىمەن ينتەرنەت الاياعىنان قالاي قورعانۋ كەرەك؟
ءبىرىنشى. قۇپياسوزىڭىزدى ەستە وڭاي ساقتالادى دەپ 1234567 دەگەن سياقتى كومبيناتسيادان نەمەسە تۋعان كۇنىڭىز بەن جىلىڭىزدىڭ تسيفرلارىنان قۇراستىرماڭىز. وعان قوسا ونى ءجيى اۋىستىرىپ تۇرساڭىز, قاۋىپسىزدەۋ بولادى. بۇل ماسەلەدە قۇپياسوز قۇراستىرىپ بەرەتىن قىزمەتتەردى دە پايدالانۋعا بولادى. دەگەنمەن, وتە قيىن قۇراستىرىلعان قۇپياسوز ونى ءجيى اۋىستىرعاننان ءتيىمدى بولۋى مۇمكىن. قۇپياسوزىمدى ۇمىتىپ قالامىن-اۋ دەگەن قورقىنىشپەن ونى قاعازعا جازىپ جۇمىس ۇستەلىنە قالدىرىپ كەتسەڭىز, الاياققا ۇلكەن سىيلىق جاسايسىز.
ەكىنشى. ەكى ساتىدان تۇراتىن اۋتەنتيفيكاتسيا قولدانىڭىز. مىسالى, اككاۋنتىڭىز باسقا جەردەن اشىلىپ جاتسا, قوسىمشا ماقۇلداۋ, ياعني قولىڭىزداعى سمارتفوننان راستاۋدى سۇرايدى. ەگەر بانكتەگى جەكە جازباڭىزعا كىرمەكشى بولساڭىز, SMS ارقىلى كەلگەن كودتى سۇراپ بارىپ اشىلادى. بۇل ءوزىڭىز ءۇشىن اسا قاتتى قيىندىق تۋدىرماعانمەن الاياققا تۇساۋ جاسايتىن تاماشا ءتاسىل.
ءۇشىنشى. كەز كەلگە جەردە تەگىن نەمەسە جىلدام ەكەن دەپ Wi‑Fi-عا قوسىلا سالماڭىز. كيبەرقىلمىسكەرلەر ادام كوپ جينالاتىن ساۋدا ورتالىعى, كافە نەمەسە دەمالىس پاركتەرى سياقتى جەرلەردە جالعان جەلى قۇرىپ, ءسىزدى قارماعىنا ءتۇسىرۋى مۇمكىن. وسى ادىسپەن ءسىزدىڭ بانك كارتاڭىزدىڭ لوگينى مەن قۇپياسوزى سياقتى قۇندى مالىمەت ۇرلانۋى ىقتيمال. سول ءۇشىن دە قاۋىپسىزدىگىنە كوزىڭىز جەتكەن ينتەرنەت قىزمەتىن عانا پايدالانۋىڭىزعا كەڭەس بەرەمىز.
سونىمەن قاتار بانك كارتاڭىزدان قارجى شەشىلگەنىن SMS ارقىلى حاباردار ەتەتىن قىزمەتتى پايدالانساڭىز, دەر كەزىندە دابىل قاعىپ قولدى بولعان سومانى قايتارۋعا مۇمكىندىك كوبەيەدى. وعان قوسا كۇدىكتى جاعدايلاردى بايقاعان جاعدايدا كەيىنگە قالدىرماي بىردەي قۇقىق قورعاۋ ورگاندارىنا جۇگىنىڭىز. سوندا ۆيرتۋالدى الەمدە جاسايتىن قىلمىستارى ءۇشىن الاياقتار شىنايى ومىردە جازالاناتىنىنا سەپتىگىڭىز تيەدى.
