ەرەكشە قاجەتتىلىگى بار بالانى تاربيەلەپ وتىرعان ايەلگە مەديتسينالىق كومەك الۋعا جانە بالانى بالاباقشاعا ورنالاستىرۋعا كومەك كورسەتىلەدى. ەلوردادا ەرەكشە كۇتىمدى قاجەت ەتەتىن 5,5 مىڭ بالا بار.
بيىل ينۆاتاكسي سانى 36-دان 56-عا دەيىن ارتتى. قالادا ەكى وڭالتۋ ورتالىعى سالىنادى. يپپوتەراپيامەن اينالىسۋعا ارنالعان ات سپورتى كەشەنىنىڭ قۇرىلىسى باستالدى. بۇدان باسقا, جاڭا تۇرعىن ءۇي كەشەندەرىنىڭ ءبىرىنشى قاباتتارىندا بالالارعا ارنالعان شاعىن ورتالىقتار, وڭالتۋ ورتالىقتارى, ەمحانا سىندى الەۋمەتتىك نىساندار اشىلادى.
ەلوردا اكىمى التاي كولگىنوۆ قالا تۇرعىندارىن قابىلداۋ ماسەلەنى ناقتى شەشۋگە جول باستايتىندىعىن, الايدا جۇيەلى شارالار قابىلداۋ قاجەت ەكەندىگىن ايتتى.
«ازاماتتاردىڭ قابىلداعان كەزدە جەكە تۇرعىنعا نە وتباسىعا كومەك كورسەتىلەدى, الايدا جۇيەلى شارالار قابىلداۋ قاجەت. ادامدار كوپ ءوتىنىش بىلدىرگەن سۇراقتاردى زەردەلەپ, زاڭنامالىق دەڭگەيدە وزگەرىستەر ەنگىزۋ ءۇشىن ۇسىنىستار جاسايمىز», دەدى قالا اكىمى التاي كولگىنوۆ.
8 اقپان كۇنى «جانۇيا» وتباسى ينستيتۋتىن قولداۋ ورتالىعىندا «اشىق اكىمدىك» فورماتىندا اشىق ەسىك كۇنى ءوتتى. ەلوردا اكىمى, اكىمنىڭ ورىنباسارلارى, باسقارما باسشىلارى مەن اۋدان اكىمدەرى ازاماتتاردى قابىلدادى. ءبىر كۇن ىشىندە 700 ادام قابىلداندى. سۇراقتار جۇمىسقا الىندى.
