«بارىس ارەنادا» وتكەن «ن» توبىنداعى باسەكەلەردە ءبىزدىڭ حوككەيشىلەر العاشقى ەكى ويىندا قارسىلاستارىنان ءىرى ەسەپپەن باسىم تۇسكەنىمەن, سوڭعى ويىندا پولشا قۇراماسىنا ەسە جىبەردى. ءبىرىنشى ماتچتا اندرەي سكابەلكا شاكىرتتەرى الەمدىك رەيتينگتە 25-ورىندا تۇرعان ۋكراينا قۇراماسىن 8:1 ەسەبىمەن تىزە بۇكتىردى. ەكىنشى كەزدەسۋدە جەرلەستەرىمىز 28-ورىندا تۇرعان نيدەرلاند قۇراماسىمەن كەزدەسىپ, 7:1 ناتيجەسىمەن جەڭىسكە جەتتى.
ال شەشۋشى كەزەڭدە قازاقستان مەن پولشا قۇرامالارى كەزدەستى. ەكى كوماندانىڭ دا ەنشىسىندە ەكى جەڭىس بولعاندىقتان, جەڭگەن قۇراما وليمپياداعا ىرىكتەۋ ءتۋرنيرىنىڭ نەگىزگى بولىگىندە كۇش سىناسۋ قۇرمەتىنە يە بولاتىن ەدى. تارتىستى وتكەن كەزدەسۋدە پولشالىق حوككەيشىلەردىڭ باعى جاندى. قارسىلاستار العاشقى ەكى كەزەڭدە جاۋاپسىز ەكى شايبا سوعىپ, الدا تۇردى. كەيىن ءبىزدىڭ حوككەيشىلەر تارازى باسىن تەڭەستىرگەن-ءدى. الايدا ماتچتىڭ اياقتالۋىنا 30 سەكۋند قالعاندا پولياكتار گول سوعىپ, 3:2 ەسەبىمەن جەڭىپ كەتتى.
وسىلايشا, جەرلەستەرىمىز 2022 جىلعى بەيجىڭ وليمپياداسىنا قاتىسۋ مۇمكىندىگىنەن ايىرىلدى. ىرىكتەۋ تۋرنيردە توپ جارعان پولشا قۇراماسى ليتسەنزيا ءۇشىن تالاستى جالعاستىرادى.
