كومىر ەنەرگەتيكالىق جانە ونەركاسىپتىك كاسىپورىندارعا تىكەلەي شارت بويىنشا كومىر رازرەزدەرىنىڭ جونەلتىلۋ باعاسىمەن جىبەرىلەدى. كوممۋنالدىق-تۇرمىستىق تۇتىنۋشىلار جانە حالىق ءۇشىن كومىردىڭ نەگىزگى كولەمى تاۋار بيرجالارى ارقىلى ساتىلادى. ونىڭ كوممۋنالدىق-تۇرمىستىق قاجەتتىلىك جانە حالىق ءۇشىن كومىر باعاسى كومىر رازرەزىنىڭ جونەلتۋ باعاسىنان (ازىرلەۋ جاعدايىنا بايلانىستى تونناسىنا 3-6 مىڭ تەڭگە), تاسىمالداۋعا كەتكەن تەمىر جول تاريفتەرىنەن, جىلجىمالى قۇرامدى كۇتىپ-ۇستاۋ, كومىردىڭ بيرجالىق قۇنىنان, سونداي-اق حالىققا جەتكىزەتىن دەلدالدىق ۇيىمداردىڭ جانە جەكە تۇلعالاردىڭ مارجاسىنان قالىپتاسادى.
كومىر ەكسپورتى شامامەن 28 ملن توننانى نەمەسە 2018 جىلمەن سالىستىرعاندا 96% قۇرادى. كومىردىڭ ەڭ ۇلكەن كولەمى رەسەي, قىرعىزستان, وزبەكستان, بەلارۋس, ۋكراينا جانە تۇركياعا جونەلتىلدى.
قازاقستاندا كومىر ونەركاسىبىنىڭ بارلىق نەگىزگى سەگمەنتى بار, الايدا ەنەرگەتيكالىق كومىردى ءوندىرۋ مەن پايدالانۋ ەرەكشە دامىعان. كومىر ونەركاسىبى ەكونوميكانىڭ ءىرى سالالارىنىڭ ءبىرى جانە ەلەكتر ەنەرگياسىنىڭ شامامەن 70% ءوندىرىسىن, كوكس-حيميا ءوندىرىسىنىڭ تولىق تيەلۋىن قامتاماسىز ەتەدى, كوممۋنالدىق-تۇرمىستىق سەكتور مەن حالىقتىڭ وتىنعا دەگەن قاجەتتىلىگىن تولىق قاناعاتتاندىرادى. قازاقستانداعى كومىر قورى 34 ملرد توننانى نەمەسە الەمدىك قوردىڭ 4% قۇرايدى. كومىر قورى بويىنشا قازاقستان الەمدەگى ون كوشباسشى ەلدەردىڭ قاتارىنا كىرەدى.
كومىر ونەركاسىبىن دامىتۋ ماقساتىندا 2019 جىلى «قازاقستان رەسپۋبليكاسىنىڭ كومىر سالاسىن دامىتۋ جونىندەگى 2019-2021 جىلدارعا ارنالعان جول كارتاسى» بەكىتىلدى, سونداي-اق «2019-2020 جىلدارعا ارنالعان كوممۋنالدىق-تۇرمىستىق قاجەتتىلىكتەر مەن حالىققا ارنالعان كومىر ونىمدەرىنە قاجەتتىلىك جوسپارى» جاسالدى.
كومىر حيمياسىن دامىتۋ, سونداي-اق قوسىلعان قۇنى جوعارى ونىمدەردى الۋ ءۇشىن كومىردى تەرەڭ كەشەندى قايتا وڭدەۋ ماسەلەلەرى باستى نازارعا الىندى. زاماناۋي تەحنولوگيالار كومىردەن وڭدەلگەن ءونىمنىڭ 5 مىڭنان استام ءتۇرىن وندىرۋگە مۇمكىندىك بەرەدى. ولاردىڭ قاتارىندا فەرروقورىتپالار, مەتالل كرەمني, قۇرىلىس ماتەريالدارى, تەحنيكالىق كومىرتەگى, كومىرتەگى سوربەنتتەرى جانە تاعى باسقا بار. بۇل وتاندىق بيزنەس سالاسىن دامىتۋ ءۇشىن ۇلكەن مۇمكىندىكتەر بەرەدى.
