«قازىر قازاق كۇرەسىنىڭ 100 ساعاتتىق وقۋ باعدارلاماسى دايىندالدى. ول وقۋ باعدارلاماسىندا قازاق كۇرەسىنىڭ الىپبيىنەن باستاپ, وزىندىك سپورت ءتۇرى رەتىندە بارلىق قىرلارى, وقىتۋ جولدارى قامتىلعان. الداعى وقۋ جىلدارى قاناتقاقتى جوبا رەتىندە نۇر-سۇلتان قالاسىنىڭ 5 مەكتەبىندە دەنە شىنىقتىرۋ پاندەرىنە قازاق كۇرەسى ەنگىزىلەدى. بارلىق مەكتەپكە قازاق كۇرەسى ساباعىن ەنگىزۋ ءۇشىن ماماندار تاپشىلىعى بايقالۋى مۇمكىن», دەيدى داۋرەن اباەۆ.
ونىڭ ايتۋىنشا, وسى رەتتە ماماندار دايىندايتىن قازاق كۇرەسى اكادەمياسىن اشۋدى جوسپارلاپ وتىرعانىن ايتتى.
«سوندىقتان ءبىز ماماندار دايارلايتىن قازاق كۇرەسى اكادەمياسىن اشۋدى جوسپارلاپ وتىرمىز. اكادەميا مامانداردى عانا وقىتىپ قويماي, تورەشىلەردىڭ بىلىكتىلىگىن ارتتىرۋ, ۇلتتىق كۇرەستىڭ عىلىمي-پراكتيكالىق تۇرعىدا زەرتتەلۋىن قامتاماسىز ەتەدى. بارلىق الەمدىك سپورت تۇرلەرى سياقتى قازاق كۇرەسىن عىلىمي تۇرعىدان زەردەلەۋىمىز كەرەك. سولاي عانا ءتول كۇرەسىمىزدى الەمدىك دەڭگەيگە كوتەرە الامىز. قازىر حالىقارالىق ارەنادا قازاق كۇرەسىنىڭ اتاۋىن وزگەرتۋ تۋرالى ءجيى ايتىلىپ ءجۇر. وسى ورايدا ءبىز زەرتتەۋشى عالىمدار توبىنا قازاق كۇرەسىنە قاتىستى تەرميندەردى جۇيەلەۋدى تاپسىرىپ وتىرمىز», دەدى فەدەراتسيا پرەزيدەنتى.
قازاق كۇرەسى فەدەراتسياسىنىڭ باس حاتشىسى باقداۋلەت ءسابيتوۆتىڭ ايتۋىنشا, بيىلعى «قازاق كۇرەسىنەن 2020 جىلعا ارنالعان سپورتتىق-بۇقارالىق ءىس-شارالاردىڭ بىرىڭعاي رەسپۋبليكالىق كۇنتىزبەسىندە» بالالار, جاسوسپىرىمدەر, جاستار جانە ەرەسەكتەر اراسىندا 104 سپورتتىق شارا ۇيىمداستىرۋ جوسپارلانعان. ونىڭ ىشىندە, «بالا بالۋان» ءتۋرنيرى, قازاقستان وقۋشىلار گيمنازياداسى, قازاقستان كوللەدج ستۋدەنتتەرى اراسىنداعى سپارتاكيادا, قازاق كۇرەسىنىڭ ءبىر تارماعى سانالاتىن بەلدەسۋدەن «قازاق ارلانى», «دالا ارلانى» سياقتى سپورتتىق شارالارى تۇڭعىش رەت وتكەلى تۇر.
ال ەرەسەكتەر اراسىنداعى قازاقستان رەسپۋبليكاسىنىڭ چەمپيوناتى مەن «قازاقستان بارىسى», «حالىق بارىسى», «ەۋرازيا بارىسى» جوبالارى جانە رەسپۋبليكالىق ءىرى تۋرنيرلەر جىل سايىنعى ءداستۇر بويىنشا تۇراقتى تۇردە ۇيىمداستىرىلا بەرمەك.
